തിരുവനന്തപുരം: ഇന്ന് ലോക ആത്മഹത്യ പ്രതിരോധ ദിനം. ആത്മഹത്യക്കെതിരെ ലോകവ്യാപകമായ ബോധവത്കരണം നടത്താൻ ഉദ്ദേശിച്ചാണ് ലോകാരോഗ്യ സംഘടന സെപ്റ്റംബർ 10ന് ലോക ആത്മഹത്യാ പ്രതിരോധ ദിനമായി ആചരിക്കുന്നത്. കേരളത്തിൽ കഴിഞ്ഞ 10 വർഷത്തിനിടെ ഏറ്റവും കൂടുതൽ ആത്മഹത്യകൾ നടന്നത് തിരുവനന്തപുരം ജില്ലായിലാണെന്ന ഞെട്ടിക്കുന്ന വിവരമാണ് സംസ്ഥാന ക്രൈം റെക്കോർഡ്‌സ് ബ്യുറോയുടെ കണക്കുകൾ വ്യക്തമാക്കുന്നത്.
കോഴിക്കോട് ആസ്ഥാനമായ തണൽ ആത്മഹത്യ പ്രതിരോധ കേന്ദ്രം നൽകിയ വിവരാവകാശ രേഖ പ്രകാരം ലഭിച്ച കണക്കുകളാണ് ഞെട്ടിക്കുന്ന വിവരങ്ങൾ വിശദീകരിക്കുന്നത്. ഇന്നലെയാണ് ആത്മഹത്യകൾ ഓരോ വർഷവും വർദ്ധിക്കുന്നതായി തെളിയിക്കുന്ന കണക്കുകൾ പുറത്തു വന്നത്. 2013 മുതൽ 2023 വരെയുള്ള കണക്കുകൾ പ്രകാരം ഏറ്റവും കൂടുതൽ പേർ ആത്മഹത്യ ചെയ്‌തത് 2023 ലാണ്. 96335 പേരാണ് 10 വർഷത്തിനിടെ സംസ്ഥാനത്താകെ ആത്മഹത്യ ചെയ്‌തത്. ഇതിൽ കഴിഞ്ഞ വർഷം മാത്രം 10972 പേരാണ് ജീവനൊടുക്കിയത്.
ആത്മഹത്യകളിലെ പുരുഷ സ്ത്രീ അനുപാതം 80 : 20 ആണ്. കുടുംബമൊട്ടാകെയുള്ള ആത്മഹത്യകളും ഏറ്റവും കൂടുതൽ തിരുവനന്തപുരത്താണ്. 50 പേരാണ് കുടുംബത്തോടെ 2023 ൽ മാത്രം ആത്മഹത്യാ ചെയ്‌തത്. മരിച്ചവരിൽ 75% വിവാഹിതരാണ്. 47.4 ശതമാനം പേരും കുടുംബ പ്രശ്‌നങ്ങൾ കാരണമാണ് ജീവനൊടുക്കിയത്. മരണപ്പെട്ടവരിൽ 80.7 ശതമാനം പേരും തൂങ്ങിമരിച്ചവരാണ്. ഏറ്റവും കുറവ് ആത്മഹത്യകൾ നടന്ന മലപ്പുറം ജില്ലയിൽ മാത്രം കഴിഞ്ഞ വർഷം 515 പേർ ആത്മഹത്യ ചെയ്‌തു.
45 വയസിന് മുകളിലുള്ളവരാണ് മരിച്ചവരിൽ 56 ശതമാനവും. യു പി മുതൽ പ്ലസ് ടു വരെ പഠിച്ചവരാണ് മരിച്ചവരിൽ 88 ശതമാനം പേരും. 37.2 ശതമാനം പേർ ദിവസ കൂലിക്കാരാണ്. ക്രൈം റെക്കോർഡ്‌സ് ബ്യുറോയിൽ നിന്നും ലഭിച്ച കണക്കുകൾ അവലോകനം ചെയ്‌ത് തണൽ ആത്മഹത്യ പ്രതിരോധ കേന്ദ്രത്തിന്‍റെ ഫൗണ്ടർ ഡയറക്‌ടറായ ഡോ പി എൻ സുരേഷ് കുമാറാണ് ആത്മഹത്യകൾ കൂടുന്നു എന്ന തലക്കെട്ടിൽ റിപ്പോർട്ട് പ്രസിദ്ധീകരിച്ചത്.
2023 ൽ സംസ്ഥാനത്ത് നടന്ന ആത്മഹത്യയുടെ ജില്ല തിരിച്ചുള്ള കണക്കുകൾ
തിരുവനന്തപുരം - 1611
കൊല്ലം - 1208
തൃശൂർ - 1060
എറണാകുളം -1007
പാലക്കാട്‌ - 937
കോഴിക്കോട് - 894
കണ്ണൂർ - 784
ആലപ്പുഴ - 729
കോട്ടയം - 591
മലപ്പുറം - 515
ഇടുക്കി - 508
പത്തനംതിട്ട - 405
കാസർഗോഡ് - 358
വയനാട് - 354
2013 മുതൽ 2023 വരെ നടന്ന ആത്മഹത്യയുടെ കണക്ക്
2013 - 8646
2014 - 8446
2015 - 7692
2016 - 7705
2017 - 7870
2018 - 8237
2019 - 8556
2020 - 8500
2021 - 9549
2022 - 10162
2023 - 10972
