ശരീരത്തിലെ ഏറ്റവും വലുതും പ്രധാനപ്പെട്ടതുമായ അവയവമാണ് കരൾ. 75% വരെ കേടുപാടുകൾ സംഭവിച്ചാലും സ്വയം പ്രതിരോധിക്കാനുള്ള കഴിവ് കരളിനുണ്ട്. അപ്പോഴും ചെറിയ രീതിയിലുള്ള കേടുപാടുകൾ പോലും കരളിന്‍റെ പ്രവർത്തനം തകരാറിലാക്കാറുണ്ട്. കരളിനെ ദോഷകരമായി ബാധിക്കുന്ന രണ്ട് ശീലങ്ങളാണ് മദ്യപാനവും പുകവലിയും. എന്നാൽ നമ്മൾ കഴിക്കുന്ന ചില ഭക്ഷണങ്ങൾ ഇതിനേക്കാൾ വലിയ അപകടമുണ്ടാക്കുന്നുവെന്ന് എത്രപേർക്കറിയാം. കരളിന്‍റെ ആരോഗ്യത്തെ ദോഷകരമായി ബാധിക്കുന്ന ഭക്ഷണങ്ങൾ ഏതെല്ലാമാണെന്ന് തിരിച്ചറിയേണ്ടതുണ്ട്. ഹൈദരാബാദിലെ പ്രമുഖ നൂട്രീഷനിസ്‌റ്റ് ഡോ. അഞ്ജലി ദേവി കരളിന് ഹാനികരമായ ഭക്ഷണങ്ങൾ ഏതൊക്കെയെന്ന് വിശദീകരിക്കുന്നു.
കൂൾ ഡ്രിങ്ക്സ്
പഞ്ചസാര അടങ്ങിയ പാനീയങ്ങൾ കഴിക്കുന്നത് കരളിൻ്റെ ആരോഗ്യത്തിന് വളരെയധികം ദോഷകരമാണ്. അധികമായി കഴിക്കുന്ന പഞ്ചസാര കരളിൽ കൊഴുപ്പായി ശേഖരിക്കപ്പെടുകയും ക്രമേണ ഇത് കരളിൻ്റെ പ്രവർത്തനത്തെ തകരാറിലാക്കും ചെയ്യുന്നു.
ഉപ്പ്
ഉപ്പിന്‍റെ അമിത ഉപയോഗം ശരീരത്തിൽ കൂടുതൽ ജലാംശം നിലനിർത്താൻ കാരണമാകുന്നു. ഇത് കരളിന്‍റെ പ്രവർത്തനത്തെ ബാധിക്കുകയും മാരകമായ കരൾ രോഗത്തിലേക്ക് നയിക്കുകയും ചെയ്യുന്നു. പൂരിത കൊഴുപ്പും സോഡിയവും ഉയർന്ന അളവിലുള്ളതിനാൽ ചിപ്‌സ്, ഉപ്പിട്ട ബിസ്‌ക്കറ്റ്, ലഘുഭക്ഷണം തുടങ്ങിയ പായ്ക്കറ്റ് ഭക്ഷണങ്ങൾ ഒഴിവാക്കുകന്നതാണ് നല്ലത്.
കൊഴുപ്പടങ്ങിയ ഭക്ഷണങ്ങൾ
വെണ്ണ, നെയ്യ്, ചീസ്, ചുവന്ന മാംസം തുടങ്ങിയ കൊഴുപ്പ് കൂടിയ ഭക്ഷണങ്ങൾ കരളിൻ്റെ ആരോഗ്യത്തിന് നല്ലതല്ല. ഈ ഭക്ഷണങ്ങളിൽ കൊഴുപ്പ് അടങ്ങിയിട്ടുള്ളതിനാൽ തന്നെ ഇത് അമിതമായി കഴിച്ചാൽ കരൾ രോഗങ്ങൾക്ക് കാരണമാകുന്നു. മാത്രമല്ല പൂരിത കൊഴുപ്പുകൾ കൊളസ്‌ട്രോളിന്‍റെ അളവ് കൂട്ടുകയും ഇതിലൂടെ ഹൃദ്രോഗങ്ങൾക്ക് കാരണമാകുകയും ചെയ്യുന്നു.
സംസ്‌കരിച്ച ഭക്ഷണങ്ങൾ
ഫാസ്റ്റ് ഫുഡ്, ജങ്ക് ഫുഡ് തുടങ്ങീ കൃത്രിമ നിറങ്ങളും ചേരുവകളും ചേർത്തുണ്ടാക്കുന്ന ഭക്ഷണങ്ങൾ കരളിന് ദോഷം ചെയ്യുന്നു. ഈ ഉൽപ്പന്നങ്ങളിലെ പഞ്ചസാരയും അഡിറ്റീവുകളും (ഭക്ഷണപദാർഥത്തിൽ ചേർക്കുന്ന ഒരു തരം വസ്‌തു) കരളിന്‍റെ പ്രവർത്തനത്തെ തകരാറിലാക്കുന്നു.
രാസവസ്‌തുക്കൾ ഉപയോഗിച്ച് ഉത്പാദിപ്പിക്കുന്ന ഭക്ഷണങ്ങൾ
രാസവസ്‌തുക്കളും കീടനാശിനികളും ഉപയോഗിച്ചുണ്ടാക്കിയ പച്ചക്കറികളും പഴങ്ങളും ഒഴിവാക്കുന്നതാണ് കരളിന്‍റെ ആരോഗ്യത്തിന് നല്ലത്. ജൈവരീതിയിൽ ഉത്പാദിപ്പിച്ച പച്ചക്കറികളും പഴങ്ങളും തിരഞ്ഞെടുക്കുന്നതിലൂടെ കരൾ രോഗങ്ങളുടെ സാധ്യത കുറയ്ക്കാൻ സഹായിക്കും.
പഞ്ചസാരയും ബേക്കറി ഉൽപ്പന്നങ്ങളും
പഞ്ചസാര പൊതുവെ വെളുത്ത വിഷമെന്നാണ് അറിയപ്പെടുന്നത്. അമിത പഞ്ചസാരയുടെ ഉപയോഗം കരളിൽ കൊഴുപ്പ് അടിഞ്ഞുകൂടാൻ കാരണമാകുന്നു. വെള്ള ബ്രഡ്, പേസ്ട്രികൾ, സോഡ, മധുര പലഹാരങ്ങൾ തുടങ്ങിയ ബേക്കറി സാധനങ്ങൾ കഴിക്കുന്നത് പരമാവധി ഒഴിവാക്കുകയോ മിതമാക്കുകയോ ചെയ്യാം.
കാർബോഹൈഡ്രേറ്റ്സ്
കാർബോഹൈഡ്രേറ്റ് ഉയർന്ന അളവിൽ കഴിക്കുന്നത് കരളിന് അമിതഭാരം ഉണ്ടാക്കാൻ ഇടയാക്കുന്നു. ഇത് ഫാറ്റി ലിവർ രോഗം പിടിപെടാൻ കാരണമായേക്കാം. കരളിൻ്റെ ആരോഗ്യം നിലനിർത്തുന്നതിന് കാർബോഹൈഡ്രേറ്റ് അടങ്ങിയ ഭക്ഷണങ്ങൾ കഴിക്കുന്നത് കുറയ്ക്കുന്നതാണ് നല്ലത്.
റെഡ് മീറ്റ്
മലയാളികളുടെ ഇഷ്‌ടഭക്ഷണത്തിൽ പ്രധാനിയാണ് റെഡ് മീറ്റ്. രാസവസ്‌തുക്കൾ ഉപയോഗിച്ച് സംസ്‌കരിച്ച റെഡ് മീറ്റ് വളരെയധികം കരളിന് ഹാനികരമാണ്. എന്നാൽ റെഡ് മീറ്റിൽ അടങ്ങിയിരിക്കുന്ന ഉയർന്ന അളവിലുള്ള പ്രോടീൻ ദഹിപ്പിക്കാൻ കരളിന് വളരെയധികം ബുദ്ധിമുട്ടുണ്ടാക്കുന്നു. ഇത് പ്രോടീൻ അടിഞ്ഞുകൂടാൻ കാരണമാകുകയും നോൺ-ആൽക്കഹോളിക് ഫാറ്റി ലിവർ ഡിസീസിലേക്ക് നയിക്കുകയും ചെയ്യുന്നു. റെഡ് മീറ്റിന്‍റെ ഉപയോഗം നിയന്ത്രിക്കേണ്ടത് കരളിന്‍റെ ആരോഗ്യത്തിന് അത്യാവശ്യമാണ്.
ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.
Also Read: ഫോൺ ഉപയോഗം ഉറക്കത്തെ ബാധിക്കുമോ? പഠനം പറയുന്നതിങ്ങനെ...
