പോഷക സമ്പുഷ്‌ടമായ ഒരു ധാന്യമാണ് ചോളം അഥവാ സ്വീറ്റ് കോൺ. ഫൈബര്‍, പ്രോട്ടീൻ, വിറ്റാമിനുകള്‍, ധാതുക്കൾ, ആന്‍റി ഓക്‌സിഡന്‍റുകൾ എന്നിവയുടെ സമ്പന്ന ഉറവിടമാണിത്. അയേണ്‍, മഗ്നീഷ്യം, കോപ്പര്‍, ഫോസ്‌ഫറസ്, സിങ്ക്, തുടങ്ങിയവയും ചോളത്തിൽ അടങ്ങിയിട്ടുണ്ട്. ഉദരാരോഗ്യം മെച്ചപ്പെടുത്താനും ദഹന പ്രശ്‌നങ്ങൾ പരിഹരിക്കാൻ ഇത് സഹായിക്കും. ചോളത്തിൽ പ്രോട്ടീനും ഫൈറ്റോകെമിക്കലുകളും അടങ്ങിയിട്ടുള്ളതിനാൽ വീക്കങ്ങളിൽ നിന്ന് ശരീരത്തെ സംരക്ഷിക്കാനും ഗുണം ചെയ്യും. കാൻസർ കോശങ്ങളുടെ വളർച്ച തടയാൻ സഹായിക്കുന്ന സംയുക്തങ്ങളും ചോളത്തിലുണ്ട്. ഡയറ്റിൽ ചോളം ഉൾപ്പെടുന്നത് വഴി ലഭിക്കുന്ന ആരോഗ്യഗുണങ്ങൾ എന്തൊക്കെയെന്ന് അറിയാം.
ഹൃദയാരോഗ്യം
നാരുകൾ, ആൻ്റി ഓക്‌സിഡൻ്റുകൾ, അവശ്യ പോഷകങ്ങൾ എന്നിവയുടെ കലവറയാണ് സ്വീറ്റ് കോൺ. ഇത് ചീത്ത കൊളസ്‌ട്രോൾ കുറയ്ക്കുകയും ഹൃദയധമനികളുടെ പ്രവർത്തനത്തെ പിന്തുണയ്ക്കുകയും ചെയ്യും. ഇതിലൂടെ ഹൃദ്രോഗ സാധ്യത കുറയ്ക്കാനും ഹൃദയാരോഗ്യം മെച്ചപ്പെടുത്താനും സഹായിക്കുമെന്ന് ദി അമേരിക്കൻ ജേണൽ ഓഫ് ക്ലിനിക്കൽ ന്യൂട്രീഷനിൽ പ്രസിദ്ധീകരിച്ച പഠനത്തിൽ പറയുന്നു. പൊട്ടാസ്യം ധാരാളം അടങ്ങിയിട്ടുള്ളതിനാൽ രക്തസമ്മർദ്ദം നിയന്ത്രിക്കാനും ചോളം സഹായിക്കും.
കണ്ണിന്‍റെ ആരോഗ്യം
കരോട്ടിനോയിഡുകൾ, ഫിനോളിക് സംയുക്തങ്ങൾ തുടങ്ങീ നിരവധി ആൻ്റി ഓക്‌സിഡൻ്റുകൾ സ്വീറ്റ് കോണിൽ അടങ്ങിയിട്ടുണ്ടെന്ന് ജേർണൽ ഓഫ് അഗ്രികൾച്ചറൽ ആൻഡ് ഫുഡ് കെമിസ്ട്രിയിൽ പ്രസിദ്ധീകരിച്ച ഒരു പഠനത്തിൽ പറയുന്നു. ഇത് കണ്ണിൻ്റെ ആരോഗ്യത്തെ സഹായിക്കുകയും പ്രായവുമായി ബന്ധപ്പെട്ട മാക്യുലാർ ഡീജനറേഷൻ, തിമിരം എന്നിവയുടെ സാധ്യത കുറയ്ക്കുകയും ചെയ്യും.
രക്തത്തിലെ പഞ്ചസാരയുടെ അളവ് നിയന്ത്രിക്കാൻ
കാർബോഹൈഡ്രേറ്റ് അടങ്ങിയിട്ടുണ്ടെങ്കിലും താരതമ്യേന ഗ്ലൈസമിക് സൂചിക കുറഞ്ഞ ഭക്ഷണമാണ് ചോളം. ഇത് രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുമെന്ന് ജേണൽ ഓഫ് ഫുഡ് സയൻസിൽ പ്രസിദ്ധീകരിച്ച ഒരു ഗവേഷണത്തിൽ പറയുന്നു. അതിനാൽ പ്രമേഹ രോഗികൾക്കും ഡയറ്റിൽ ഉൾപ്പെടുത്താവുന്ന ഒരു ഭക്ഷണമാണ് ചോളം.
ശരീരഭാരം കുറയ്ക്കാൻ
ചോളത്തിൽ ഉയർന്ന അളവിൽ ജലാംശവും ഫൈബറും അടങ്ങിയിട്ടുള്ളതിനാൽ ശരീരഭാരം കുറയ്ക്കാൻ ഇത് സഹായിക്കും. കലോറി ഉപഭോഗം കുറയ്ക്കാനും അമിതമായി ഭക്ഷണം കഴിക്കാനുള്ള പ്രവണത കുറയ്ക്കാനും ചോളം ഉത്തമമാണെന്ന് അപ്പെറ്റൈറ്റ് ജേണലിലെ ഒരു പഠനം കണ്ടെത്തി.
ചർമ്മത്തിൻ്റെ ആരോഗ്യം
വൈറ്റമിൻ സി, കരോട്ടിനോയിഡുകൾ എന്നിവ അടങ്ങിയിട്ടുള്ളതിനാൽ ചർമ്മത്തിന്‍റെ ആരോഗ്യം പ്രോത്സാഹിപ്പിക്കാനും ചോളം സഹായിക്കും. കൊളാജൻ ഉത്പാദനത്തെ പിന്തുണയ്ക്കുകയും അൾട്രാവയലറ്റ് കിരണങ്ങളിൽ നിന്ന് ചർമ്മത്തെ സംരക്ഷിക്കാനും ഇത് ഗുണം ചെയ്യും. ചർമ്മത്തിൻ്റെ ഇലാസ്‌തികത നിലനിർത്താനും ചോളം കഴിക്കുന്നത് നല്ലതാണ്.
ശ്രദ്ധിക്കുക: ഇവിടെ കൊടുത്തിരിക്കുന്ന എല്ലാ ആരോഗ്യ വിവരങ്ങളും നിർദ്ദേശങ്ങളും നിങ്ങളുടെ അറിവിലേക്കായി മാത്രമുള്ളതാണ്. ശാസ്ത്രീയ ഗവേഷണം, പഠനങ്ങൾ, ആരോഗ്യ പ്രൊഫഷണലുകൾ നൽകുന്ന ഉപദേശങ്ങൾ എന്നിവയുടെ അടിസ്ഥാനത്തിലാണ് ഈ വിവരങ്ങൾ നൽകുന്നത്. എന്നാൽ, ഇവ പിന്തുടരുന്നതിന് മുമ്പ് ഒരു ഡോക്‌ടറുടെ നിർദേശം തേടേണ്ടതാണ്.
Also Read : ലഘുഭക്ഷണമായി സ്‌നാക്‌സിന് പകരം ഇത് കഴിക്കാം; ആരോഗ്യ ഗുണങ്ങള്‍ നിരവധി
