ആർകെ എന്നറിയപ്പെടുന്ന രാധാകൃഷ്‌ണന്‍... റിട്ടയേഡ് കേന്ദ്രസർക്കാർ ഉദ്യോഗസ്ഥന്‍.. വയസ്സ് 70.. ഒരു അറ്റാക്കിനെ തുടർന്നുള്ള ശാരീരിക അസ്വസ്ഥതകളുമായി ശിഷ്‌ട ജീവിതം കേരളത്തിൽ കഴിച്ചു കൂട്ടുന്നു. ശാരീരിക അസ്വസ്ഥതകളേക്കാൾ അലട്ടുന്ന ഒറ്റപ്പെട്ട ജീവിതം.
എല്ലാമായിരുന്ന ഭാര്യ സുമം, മൂന്ന് വർഷങ്ങൾക്ക് മുമ്പ് ശ്വാസാകോശ സംബന്ധമായ ഒരു അസുഖത്തെ തുടർന്ന് മരണപ്പെട്ടു. രണ്ടു മക്കളും വിവാഹിതരായി, വിദേശത്ത് താമസമാക്കി. ആകെയുള്ള ആശ്രയം, വിധവയായ സഹോദരി ലീല മാത്രം.
ഡെല്‍ഹിയില്‍ സർവ്വീസില്‍ ഉണ്ടായിരുന്ന കാലത്ത്, ആർകെയുടെ അരികിലേക്ക് അടിക്കടി ഓടിയെത്തുന്ന ഭാര്യയും മക്കളും.. അവരോടൊപ്പം ചിലവഴിച്ച അസുലഭ മുഹൂർത്തങ്ങൾ... മൊബൈൽ സാങ്കേതിക വിദ്യ എത്തുന്നതിന് മുമ്പ് ബന്ധങ്ങളുടെ ഊഷ്‌മളത പരസ്‌പരം പങ്കിട്ടിരുന്ന കത്തുകൾ... എല്ലാം അയവിറക്കി ഇന്ന് ഒറ്റപ്പെടലിൻ്റെ മനോവേദനയിലാണ് ആർകെ.
ഇത്തരം ആർകെമാരുടെ എണ്ണം വർദ്ധിച്ചു വരുന്ന ഈ സാമൂഹികാന്തരീക്ഷത്തിൽ, അതിലേയ്‌ക്കൊരു തിരി വെളിച്ചം പകരുകയാണ് 'വെട്ടം' എന്ന ടെലി സിനിമ. വെട്ടത്തിൽ ആർകെയെ അവതരിപ്പിക്കുന്നത് 'നല്ല വിശേഷം', 'കാപ്പു ചീനോ', 'ചീനാ ട്രോഫി' തുടങ്ങി ചിത്രങ്ങളിലൂടെ ശ്രദ്ധേയനായ ശ്രീജി ഗോപിനാഥനാണ്.
ശ്രീജി ഗോപിനാഥന് പുറമെ ദീപാ ജോസഫ്, വീണ മിൽട്ടൻ, ബേബി മൈത്രേയി ദീപക്, നസീർ മുഹമ്മദ്, മാനുവൽ ടി മലയിൽ, ജയാമേരി എന്നിവരും അഭിനയിക്കുന്നുണ്ട്. ഓണത്തോടനുബന്ധിച്ച് തിരുവോണം നാളിൽ മലയാളത്തിലെ പ്രമുഖ ചാനലിൽ വെട്ടം സംപ്രേഷണം ചെയ്യും.
അജിതൻ ആണ് 'വെട്ട'ത്തിന്‍റെ രചനയും സംവിധാനവും നിര്‍വഹിച്ചിരിക്കുന്നത്. പ്രവാസി ഫിലിംസ് നിര്‍മാണവും നിര്‍വഹിച്ചു. നൂറുദീൻ ബാവ ഛായാഗ്രഹണവും ഇബ്രു മുഹമ്മദ് എഡിറ്റിംഗും നിര്‍വഹിച്ചു.
ഗാനരചന - ശ്രീരേഖ പ്രിൻസ്, സംഗീതം - ജിജി തോംസൺ, പശ്ചാത്തല സംഗീതം - പ്രമോദ് സാരംഗ്, കല- മിൽക്ക് ബോട്ടിൽ ക്രിയേറ്റീവ്സ്, ചമയം - മഹേഷ് ചേർത്തല, കോസ്റ്റ്യൂം - മരിയ, അസോസിയേറ്റ് ഡയറക്‌ടർ - ബാലു നാരായണൻ, പ്രൊഡക്ഷൻ കൺട്രോളർ - സനൂപ് മുഹമ്മദ്, അസിസ്റ്റൻ്റ് ഡയറക്‌ടർ - സിബി, അക്കൗണ്ട്സ് - സതീഷ്, ക്രിയേറ്റീവ് ഡയറക്‌ടർ - എം സജീഷ്, സ്‌റ്റുഡിയോ - കെ സ്‌റ്റുഡിയോസ്, ഡിസൈൻസ് - സജീഷ് എം ഡിസൈൻസ്, സ്‌റ്റിൽസ് - അജീഷ് ആവണി, പിആർ - അജയ് തുണ്ടത്തിൽ എന്നിവരാണ് മറ്റ് അണിയറപ്രവര്‍ത്തകര്‍.
Also Read: രക്തരക്ഷസുകളെ തുരത്താൻ മുജീബ്; '13' ഹ്രസ്വചിത്രം റിലീസ് ചെയ്‌തു - 13 Short Film Released
