പ്രഖ്യാപനം മുതൽ പ്രേക്ഷക സ്വീകാര്യത നേടിയ സിനിമയാണ് മെഗാസ്റ്റാർ മമ്മൂട്ടിയുടെ മാസ് ആക്ഷൻ കോമഡി ചിത്രം 'ടർബോ'. ഇപ്പോഴിതാ ജനപ്രീതിയുടെ അടിസ്ഥാനത്തിൽ ഐഎംഡിബിയിലെ മോസ്റ്റ് ആന്‍റിസിപ്പേറ്റഡ് ഇന്ത്യൻ മൂവീസ് (ഏറെ പ്രതീക്ഷയോടെ കാത്തിരിക്കുന്ന ഇന്ത്യൻ സിനിമ) ലിസ്റ്റിൽ രണ്ടാംസ്ഥാനം സ്വന്തമാക്കിയിരിക്കുകയാണ് 'ടർബോ'. സിനിമയുടെ ടീസർ, ട്രെയിലർ എന്നിവ പുറത്തുവരുന്നതിന് മുന്നേതന്നെ പ്രേക്ഷകർ ഏറ്റവുമധികം പ്രതീക്ഷയോടെ കാക്കുന്ന ഇന്ത്യൻ സിനിമയായി 'ടർബോ' മാറിക്കഴിഞ്ഞു എന്നാണ് റിപ്പോർട്ട്.
ഉലകനായകൻ കമൽഹാസന്‍റെ 'ഇന്ത്യൻ 2', രാജ്‌കുമാർ റാവുവിന്‍റെ 'ശ്രീകാന്ത്' തുടങ്ങിയ സിനിമകളെ പിന്നിലാക്കിയാണ് 'ടർബോ' രണ്ടാംസ്ഥാനത്തേക്ക് മുന്നേറിയത്. മമ്മൂട്ടി കമ്പനിയുടെ ബാനറിൽ എത്തുന്ന ഈ ചിത്രം സംവിധാനം ചെയ്യുന്നത് വൈശാഖാണ്. മിഥുൻ മാനുവൽ തോമസാണ് ഈ ബിഗ് ബജറ്റ് ചിത്രത്തിനായി തിരക്കഥ ഒരുക്കിയത്. മെയ് 23ന് ലോകമെമ്പാടുമുള്ള തിയേറ്ററുകളിൽ 'ടർബോ' റിലീസ് ചെയ്യും.
'പോക്കിരിരാജ', 'മധുരരാജ' എന്നീ ചിത്രങ്ങൾക്ക് ശേഷം വൈശാഖും മമ്മൂട്ടിയും ഒന്നിക്കുന്ന മൂന്നാമത്തെ സിനിമയാണ് 'ടർബോ', മമ്മൂട്ടി കമ്പനിയുടെ ബാനറിൽ നിർമിക്കുന്ന അഞ്ചാമത്തെ ചിത്രവും. 'ടർബോ ജോസ്' എന്ന കഥാപാത്രത്തയാണ് ഈ ചിത്രത്തിൽ മമ്മൂട്ടി അവതരിപ്പിക്കുന്നത്. ജീപ്പ് ഡ്രൈവറായ ജോസിന്‍റെ കഥയാണ് 'ടർബോ' പറയുന്നത്. കന്നഡ താരം രാജ് ബി ഷെട്ടിയും തെലുഗു നടൻ സുനിലും 'ടർബോ'യിൽ സുപ്രധാന വേഷങ്ങളിൽ എത്തുന്നുണ്ട്.
ആക്ഷൻ രംഗങ്ങൾക്ക് ഏറെ പ്രാധാന്യം നൽകിയാണ് 'ടർബോ' ഒരുക്കിയത്. വിയറ്റ്നാം ഫൈറ്റേർസാണ് ആക്ഷൻ രംഗങ്ങൾ കൈകാര്യം ചെയ്യുന്നത് എന്നതും ശ്രദ്ധേയമാണ്. വിഷ്‌ണു ശർമ്മയാണ് 'ടർബോ' സിനിമയുടെ ഛായാഗ്രാഹകൻ.
200 കി.മീ. സ്‌പീഡ് ചേസിങ് വരെ ഷൂട്ട് ചെയ്യാൻ സാധിക്കുന്ന, ഹോളിവുഡ് സിനിമകളിലെ ചേസിങ് സീനുകളിൽ ഉപയോഗിക്കുന്ന ഡിസ്‌പ്ലേ മോഷൻ ബ്ലർ മെഷർമെന്‍റിന് അനുയോജ്യമായ 'പർസ്യൂട്ട് ക്യാമറ'യാണ് 'ടർബോ'യിൽ ഉപയോഗിച്ചിരിക്കുന്നത്. 'ട്രാൻഫോർമേഴ്‌സ്', 'ഫാസ്റ്റ് ആൻഡ് ഫ്യൂരിയസ്' പോലുള്ള ഹോളിവുഡ് ചിത്രങ്ങളിലും ബോളിവുഡിൽ 'പഠാൻ' ഉൾപ്പടെയുള്ള ചിത്രങ്ങളിലും ഈ ക്യാമറയാണ് ഉപയോഗിച്ചത്.
ക്രിസ്റ്റോ സേവ്യറാണ് ഈ സിനിമയ്‌ക്ക് പശ്ചാത്തല സംഗീതം ഒരുക്കുന്നത്. ഷമീർ മുഹമ്മദാണ് 'ടർബോ'യുടെ എഡിറ്റർ. ജോർജ് സെബാസ്റ്റ്യൻ എക്‌സിക്യുട്ടീവ് പ്രൊഡ്യൂസറുമാണ്.
പ്രൊഡക്ഷൻ ഡിസൈനർ : ഷാജി നടുവിൽ, ആക്ഷൻ ഡയറക്‌ടർ : ഫീനിക്‌സ് പ്രഭു, ലൈൻ പ്രൊഡ്യൂസർ : സുനിൽ സിങ്, സഹസംവിധാനം : ഷാജി പടൂർ, കോസ്റ്റ്യൂം ഡിസൈനർ : മെൽവി ജെ & ആഭിജിത്ത്, മേക്കപ്പ് : റഷീദ് അഹമ്മദ് & ജോർജ് സെബാസ്റ്റ്യൻ, പ്രൊഡക്ഷൻ കൺട്രോളർ : ആരോമ മോഹൻ, ചീഫ് അസോസിയേറ്റ് ഡയറക്‌ടർ : രാജേഷ് ആർ കൃഷ്‌ണൻ, പബ്ലിസിറ്റി ഡിസൈൻസ് : യെല്ലോ ടൂത്ത്, ഡിജിറ്റൽ മാർക്കറ്റിങ് : വിഷ്‌ണു സുഗതൻ, പിആർഒ : ശബരി.
ALSO READ: 'ആരോ വിരൽ നീട്ടി'യ വിദ്യാസാഗർ മാജിക്‌; പാട്ടുവന്ന വഴി...
