മലയാള സിനിമാസ്വാദകരെ ആവേശത്തിലാക്കി, നയൻതാര - നിവിൻ പോളി കൂട്ടുകെട്ട് ബിഗ്‌ സ്‌ക്രീനിൽ വീണ്ടും ഒന്നിക്കുന്ന 'ഡിയർ സ്റ്റുഡൻസ്' സിനിമയുടെ വമ്പൻ അപ്‌ഡേറ്റ് പുറത്ത്. ധ്യാൻ ശ്രീനിവാസൻ സംവിധാനം ചെയ്‌ത 'ലവ് ആക്ഷൻ ഡ്രാമ'യ്‌ക്ക് ശേഷം നയൻതാരയും നിവിൻ പോളിയും ഒരിക്കൽ കൂടി കൈകോർക്കുന്ന 'ഡിയർ സ്റ്റുഡൻസിന്‍റെ ചിത്രീകരണം ആരംഭിച്ച വാർത്തയാണ് പുറത്ത് വന്നിരിക്കുന്നത്. പൂജ ചടങ്ങോടെയാണ് സിനിമയ്‌ക്ക് ആരംഭമായത്.
നവാഗതരായ സന്ദീപ് കുമാറും ജോർജ് ഫിലിപ്പും ചേർന്ന് സംവിധാനം ചെയ്യുന്ന 'ഡിയർ സ്റ്റുഡൻസ്', നിവിൻ പോളിയുടെ പോളി ജൂനിയർ പിക്‌ചേഴ്‌സ്, നയൻതാര, വിഘ്നേഷ് ശിവൻ എന്നിവരുടെ ഹോം പ്രൊഡക്ഷൻ ഹൗസായ റൗഡി പിക്‌ചേഴ്‌സ് എന്നിവർ സംയുക്തമായാണ് നിർമിക്കുന്നത്. അടുത്തിടെയാണ് നയൻതാരയുടെ സിനിമയിലെ പങ്കാളിത്തം ഉറപ്പിച്ചുകൊണ്ട് നിവിൻ പോളി തന്‍റെ എക്‌സ് ഹാൻഡിൽ ഒരു കൺസെപ്റ്റ് വീഡിയോ പങ്കുവച്ചത്. നയൻസിനെ സ്വാഗതം ചെയ്‌തുകൊണ്ടുള്ളതായിരുന്നു ഈ വീഡിയോ.
"ഡിയർ സ്റ്റുഡൻസിന്‍റെ രസകരവും ത്രസിപ്പിക്കുന്നതുമായ ലോകത്തേക്ക്, അവിശ്വസനീയമായ, എക്കാലത്തെയും പ്രസന്നയായ നയൻതാര ചേരുന്നു" എന്നായിരുന്നു താരത്തിന്‍റെ പോസ്റ്റ്. അമേരിക്കൻ പതാകയുടേതിന് സമാനമായ, നീലയും ചുവപ്പും നിറങ്ങളിലുള്ള ഷേഡുകൾ ഉൾക്കൊള്ളുന്ന പോസ്റ്ററിൽ നയൻതാരയുടെ ഒരു സിലൗറ്റും ഉൾക്കൊള്ളിച്ചിരുന്നു.
- " class="align-text-top noRightClick twitterSection" data="">
തെന്നിന്ത്യയിലാകെ എണ്ണിയാലൊടുങ്ങാത്ത ആരാധക പിന്തുണയുള്ള നയൻസിന്‍റെ മലയാളത്തിലേക്കുള്ള മടങ്ങിവരവ് ആഘോഷമാക്കുകയാണ് ആരാധകർ. സമ്മിശ്ര പ്രതികരണങ്ങൾ ലഭിച്ചിട്ടും ബോക്‌സ് ഓഫിസിൽ മികച്ച പ്രകടനം കാഴ്‌ചവയ്‌ക്കാൻ 'ലവ് ആക്ഷൻ ഡ്രാമ'യ്‌ക്ക് സാധിച്ചിരുന്നു. അതുകൊണ്ടുതന്നെ ഈ ഹിറ്റ് കോംബോ വീണ്ടും ബിഗ്‌ സ്‌ക്രീനിൽ എത്തുമ്പോൾ ആരാധകരും ഏറെ ആവേശത്തിലാണ്.
പൃഥ്വിരാജ് സുകുമാരനൊപ്പം അൽഫോൺസ് പുത്രന്‍റെ 'ഗോൾഡി'ൽ ആണ് നയൻതാര മലയാളത്തിൽ ഏറ്റവും ഒടുവിൽ വേഷമിട്ടത്. ഷാരൂഖ് ഖാനൊപ്പം 'ജവാൻ' എന്ന ചിത്രത്തിലൂടെ ബോളിവുഡിലും നയൻസ് തന്‍റെ വരവറിയിച്ചിരുന്നു. ബോക്‌സോഫിസിൽ തകർപ്പൻ പ്രകടനം കാഴ്‌ചവച്ച ഈ ചിത്രം താരത്തിന്‍റെ കരിയറിൽ തന്നെ ഒരു പൊൻതൂവലായി മാറി. 'ഇരൈവൻ', 'അന്നപൂരണി: ദി ഗോഡ്‌സ് ഓഫ് ഫുഡ്' തുടങ്ങിയ തമിഴ് സിനിമകളിലും അവർ സമീപകാലത്ത് വേഷമിട്ടു. ഇതിനിടെ 'അന്നപൂരണി' വിവാദങ്ങളുടെ നൂലാമാലകളിൽ കുടുങ്ങിയതും വാർത്തയായി. ഹിന്ദു ഗ്രൂപ്പുകളുടെ പരാതിയെ തുടർന്ന് നെറ്റ്ഫ്ലിക്‌സിൽ നിന്ന് ഈ ചിത്രം നീക്കം ചെയ്യപ്പെട്ടിരുന്നു.
ALSO READ: കാത്തിരിപ്പിന് അവസാനം; ധനുഷിന്‍റെ 'രായൻ' വരുന്നു, ആദ്യ ഗാനം ഉടൻ
