ഗാന്ധിനഗർ: 69-ാമത് ഫിലിംഫെയർ അവാർഡ് നിശയുടെ താരപ്രഭയില്‍ മുങ്ങി 'ഗുജറാത്ത് ഇൻ്റർനാഷണൽ ഫിനാൻസ് ടെക്-സിറ്റി' (ഗിഫ്റ്റ് സിറ്റി). ബോളിവുഡ് താരങ്ങളായ രൺബീർ കപൂർ, കാർത്തിക് ആര്യൻ, കരീന കപൂർ തുടങ്ങിയവര്‍ ഗിഫ്റ്റ് സിറ്റിയിലെ പ്രൗഢ ഗംഭീര പരിപാടിയുടെ ഭാഗമായി. ഗുജറാത്ത് മുഖ്യമന്ത്രി ഭൂപേന്ദ്ര പട്ടേൽ, ആഭ്യന്തര സഹമന്ത്രി ഹർഷ് സംഘാവി, ബിജെപി സംസ്ഥാന അധ്യക്ഷൻ സിആർ പാട്ടീൽ എന്നിവർ ചേർന്ന് താരങ്ങളെ സ്വാഗതം ചെയ്‌തു (69th Filmfare Awards 2024 at GIFT City Gujarat).
ശനിയാഴ്‌ച മഹാത്മാ മന്ദിർ കൺവെൻഷൻ ആൻഡ് എക്‌സിബിഷൻ സെൻ്ററിൽ നടന്ന പരിപാടിയില്‍ അപർശക്തി ഖുറാനയും കരിഷ്‌മ തന്നയും അവതാരകരായി. ടൂറിസം കോർപ്പറേഷൻ ഓഫ് ഗുജറാത്ത് ലിമിറ്റഡ് (ടിസിജിഎൽ) വേൾഡ് വൈഡ് മീഡിയയുമായി സഹകരിച്ചാണ് പരിപാടി നടത്തുന്നത്. 2022-ൽ അവതരിപ്പിച്ച ഗുജറാത്തിൻ്റെ സിനിമാറ്റിക് ടൂറിസം നയത്തിന്‍റെ ചുവടുപിടിച്ചാണ് ടിസിജിഎൽ ഫിലിംഫെയർ അവാർഡ് നിശ നടത്തുന്നത്. രാജ്യത്തെ സിനിമ, വെബ് സീരീസ് ചിത്രീകരണങ്ങൾക്കുള്ള പ്രധാന ഹബ്ബാക്കി ഗുജറാത്തിനെ മാറ്റാനാണ് സിനിമാറ്റിക് ടൂറിസം നയം ലക്ഷ്യമിടുന്നത്.
ഇന്നലെ (ഞായർ) രാത്രി നടന്ന അവാർഡ് ദാന ചടങ്ങ് ബോളിവുഡിലെ പവർ കപ്പിൾസായ ആലിയ ഭട്ടിനും രൺബീർ കപൂറിനും ഇരട്ടി മധുരം പകരുന്നതായി. വിധു വിനോദ് ചോപ്രയുടെ 12-ത് ഫെയിലും സന്ദീപ് റെഡ്ഡി വംഗയുടെ ആനിമലും പുരസ്‌കാരങ്ങൾ തൂത്തുവാരി. കരൺ ജോഹർ, ജാൻവി കപൂർ, നുഷ്രത്ത് ബറൂച്ച തുടങ്ങിയ താരങ്ങൾ വേദിയില്‍ തിളങ്ങി.
അവാർഡ് ജേതാക്കൾ ഇവർ:
- മികച്ച ചിത്രം (ജനപ്രിയം): 12-ത് ഫെയില്‍
- മികച്ച ചിത്രം (നിരൂപകര്‍): ജോറാം
- മികച്ച സംവിധായകന്‍: വിധു വിനോദ് ചോപ്ര, 12-ത് ഫെയില്‍
- മികച്ച നടൻ (ജനപ്രിയം): രൺബീർ കപൂർ, ആനിമൽ എന്ന ചിത്രത്തിലെ അഭിനയത്തിന്
- മികച്ച നടൻ (നിരൂപകര്‍): വിക്രാന്ത് മാസെ, 12-ത് ഫെയില്‍
- മികച്ച നടി: ആലിയ ഭട്ട്, റോക്കി ഔർ റാണി കി പ്രേം കഹാനി
- മികച്ച നടി (നിരൂപകര്‍): റാണി മുഖർജി, മിസിസ് ചാറ്റർജി Vs നോർവേ
- മികച്ച സഹനടൻ: വിക്കി കൗശൽ, ഡങ്കി
- മികച്ച സഹനടി: ശബാന ആസ്‌മി, റോക്കി ഔർ റാണി കി പ്രേം കഹാനി
- മികച്ച വരികൾ: അമിതാഭ് ഭട്ടാചാര്യ, തേരേ വാസ്തേ-സാരാ ഹത്കെ സാരാ ബച്ച്കെ
- മികച്ച സംഗീത ആൽബം: ആനിമൽ
- മികച്ച പിന്നണി ഗായകൻ: ഭൂപീന്ദർ ബബ്ബൽ, ആനിമൽ
- മികച്ച പിന്നണി ഗായിക: ശിൽപ റാവു, പത്താൻ
- മികച്ച കഥ: അമിത് റായ്, ഒഎംജി 2
- മികച്ച തിരക്കഥ: വിധു വിനോദ് ചോപ്ര, 12-ത് ഫെയില്‍
- മികച്ച സംഭാഷണം: ഇഷിത മൊയ്ത്ര, റോക്കി ഔർ റാണി കി പ്രേം കഹാനി
Also Read: 'അതിമനോഹരം, പ്രചോദനം നൽകുന്നതും ഹൃദയസ്‌പർശിയായതും'; 'ട്വൽത്ത് ഫെയിലി'ന് കയ്യടിച്ച് ആലിയ ഭട്ട്
ജവാനിലെ മികച്ച ആക്ഷൻ രംഗങ്ങൾക്ക് സ്‌പിറോ റസാതോസ്, അൻൽ അരസു, ക്രെയ്‌ഗ് മക്‌റേ എന്നിവര്‍ പുരസ്‌കാരം സ്വന്തമാക്കി. ആനിമലിലെ പശ്ചാത്തല സംഗീതമൊരുക്കിയ ഹർഷവർദ്ധൻ രാമേശ്വര്‍, 3 ഓഫ് അസ് എന്ന ചിത്രത്തിലെ ഛായാഗ്രഹണത്തിന് അവിനാഷ് അരുൺ ധവാരെ എന്നിവരും ഫിലിംഫെയർ അവാർഡ് നേടി.
