കേന്ദ്ര ഉന്നത വിദ്യാഭ്യാസ വകുപ്പ്, ഒന്നാം വർഷ ബിരുദ വിദ്യാർഥികൾക്കും ബിരുദാനന്തര ബിരുദ വിദ്യാര്‍ഥികള്‍ക്കും നൽകുന്ന സെൻട്രൽ സെക്‌ടർ സ്കോളർഷിപ്പിന് ഓൺലൈൻ ആയി അപേക്ഷിക്കാം. ഹയര്‍ സെക്കന്‍ഡറി പരീക്ഷയിലെയും ബിരുദ പരീക്ഷയിലെയും മാര്‍ക്കിന്‍റെ അടിസ്ഥാനത്തിലാണ് സെന്‍ട്രല്‍ സെക്‌ടര്‍ സ്‌കോളര്‍ഷിപ്പ് നല്‍കുന്നത്. അര്‍ഹരായ വിദ്യാര്‍ഥികള്‍ക്ക് ഡിസംബർ 15 വരെ അപേക്ഷിക്കാം. മുന്‍വര്‍ഷങ്ങളില്‍ സ്‌കോളര്‍ഷിപ്പ് ലഭിച്ചവര്‍ക്ക് പുതുക്കാനും അവസരമുണ്ട്.
ഓരോ വര്‍ഷവും 82,000 വിദ്യാര്‍ഥികള്‍ക്കാണ് ദേശീയ തലത്തില്‍ സ്‌കോളര്‍ഷിപ്പ് ലഭിക്കുന്നത്. എന്‍എസ്‌പി (National Scholarship Portal) യുടെ വെബ്സൈറ്റിലൂടെ ഒരു വിദ്യാർഥിയ്ക്ക് ഒരു സ്കോളർഷിപ്പിന് മാത്രമേ അപേക്ഷിക്കാൻ സാധിക്കു എന്നതിനാൽ സെൻട്രൽ സെക്‌ടർ സ്കോളർഷിപ്പിന് അപേക്ഷിക്കുന്ന വിദ്യാർഥികൾക്ക് മറ്റു സ്കോളർഷിപ്പുകളായ പോസ്റ്റ്‌ മെട്രിക് സ്കോളർഷിപ്പ് ഫോർ മൈനോറിറ്റീസ്, പോസ്റ്റ്‌ മെട്രിക് സ്കോളർഷിപ്പ് ഫോർ ഡിസബിൽഡ്, മെറിറ്റ് കം മീൻസ് എന്നിവയ്ക്ക് അപേക്ഷിക്കാൻ അവസരമുണ്ടാകില്ല.
സ്‌കോളര്‍ഷിപ്പ് ആനുകൂല്യം
സ്‌കോളര്‍ഷിപ്പിന് അര്‍ഹരാകുന്നവര്‍ക്ക് നിർദിഷ്‌ട മാനദണ്ഡങ്ങളോടെ തുടർച്ചയായി അഞ്ചു വർഷം സ്കോളർഷിപ്പ് ലഭിക്കാന്‍ അവസരമുണ്ട്. ബിരുദ തലത്തിൽ പ്രതിവർഷം 12,000 രൂപയും ബിരുദാനന്തര ബിരുദ തലത്തിൽ പ്രതിവർഷം 20,000 രൂപയുമാണ് സ്കോളർഷിപ്പായി ലഭിക്കുക.
യോഗ്യത
അപേക്ഷകർക്ക് പ്ലസ്‌ടു തലത്തിൽ 80ാം പേര്‍സന്‍റയിലിന് (90%) മുകളില്‍ മാർക്ക് ഉണ്ടായിരിക്കണം. അപേക്ഷകരുടെ കുടുംബ വാർഷിക വരുമാനം 4.5 ലക്ഷം രൂപയിൽ കൂടുതലാകരുത്. പ്രായം 18നും 25നും ഇടിയില്‍ ആയിരിക്കണം. ഒന്നാം വർഷ ബിരുദ വിദ്യാർഥികൾക്ക് മാത്രമേ ഫ്രഷ് വിഭാഗത്തിൽ അപേക്ഷിക്കാൻ സാധിക്കുകയുള്ളു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാന്‍ ഈ ലിങ്കില്‍ ക്ലിക്ക് ചെയ്യുക
ആർട്‌സ് ആന്‍ഡ് സയൻസ് കോളജുകളിലെ വിദ്യാർഥികൾക്കു പുറമെ പ്രൊഫഷണൽ കോഴ്‌സ് വിദ്യാർഥികൾക്കും അപേക്ഷിക്കാവുന്നതാണ്. ആകെ സ്‌കോളര്‍ഷിപ്പിന്‍റെ 50 ശതമാനം പെണ്‍കുട്ടികള്‍ക്കും 15 ശതമാനം എസ്‌സി വിഭാഗത്തിനും 7.5 ശതമാനം എസ്‌ടി വിഭാഗത്തിനും 27 ശതമാനം ഒബിസി വിഭാഗത്തിനും സംവരണം ചെയ്‌തിട്ടുണ്ട്. എല്ലാ വിഭാഗങ്ങളിലും അഞ്ച് ശതമാനം ഭിന്നശേഷിക്കാര്‍ക്ക് നീക്കിവച്ചിട്ടുണ്ട്.
സ്‌കോളര്‍ഷിപ്പ് പുതുക്കല്‍
അപേക്ഷകർ, കഴിഞ്ഞ വർഷം സെൻട്രൽ സെക്‌ടർ സ്കോളർഷിപ്പ് ലഭിച്ചിരുന്നവരും കഴിഞ്ഞ അധ്യായന വർഷത്തിൽ ചുരുങ്ങിയത് 50% മാർക്കും 75% അറ്റന്‍റൻസും ലഭിച്ചവരും ആയിരിക്കണം.
അപേക്ഷിക്കേണ്ട വിധം
ഡിസംബര്‍ 15 വരെ https://scholarships.gov.in/ വെബ്സൈറ്റ് വഴി പുതിയ അപേക്ഷ സമർപ്പിക്കുകയും പഴയവ പുതുക്കുകയും ചെയ്യാം. തുടര്‍ന്ന് അപേക്ഷയുടെ പ്രിന്‍റട്ടും അനുബന്ധ രേഖകളും അപേക്ഷകർ പഠിക്കുന്ന കോളജിൽ എത്തിക്കണം. അപേക്ഷയോടൊപ്പം, പ്ലസ്‌ടുവിൻ്റെ മാർക്ക് ലിസ്റ്റ് കോപ്പി, ജാതി സർട്ടിഫിക്കറ്റ് , ആവശ്യമെങ്കിൽ പിഡബ്ല്യുഡി സർട്ടിഫിക്കറ്റ് (ഭിന്നശേഷി വിദ്യാർഥികൾക്ക് ) എന്നിവയും സമർപ്പിക്കണം.
