ന്യൂഡൽഹി: ഉത്തർപ്രദേശിലെ മോദിപുരം ഡിപ്പോയിൽ യാത്രക്കാർക്കായി മെട്രോ സ്റ്റേഷൻ നിർമാണ പ്രവര്‍ത്തനങ്ങള്‍ പുരോഗമിച്ച്‌ നാഷണൽ ക്യാപിറ്റൽ റീജിയൻ ട്രാൻസ്‌പോർട്ട് കോർപ്പറേഷൻ (എൻസിആർടിസി). മോദിപുരം ഡിപ്പോയിൽ ട്രെയിൻ സ്റ്റേബിളിങ് യാർഡിന് പുറമെ 34 നമോ ഭാരത്, മീററ്റ് മെട്രോ ട്രെയിനുകൾ ഉൾക്കൊള്ളുന്ന മെട്രോ സ്റ്റേഷൻ നിർമ്മിക്കാനുള്ള പദ്ധതിയാണ്‌ എൻസിആർടിസി മുന്നോട്ട്‌ വച്ചിരിക്കുന്നത്‌. ഡൽഹി-ഗാസിയാബാദ്-മീററ്റ് റീജിയണൽ റാപ്പിഡ് ട്രാൻസിറ്റ് സിസ്റ്റത്തിന് (ആർആർടിഎസ്) വേണ്ടിയുള്ള രണ്ടാമത്തെ ട്രെയിൻ ഡിപ്പോയാണ് എൻസിആർടിസി മോദിപുരത്ത് നിർമിക്കുന്നത്.
ഇതില്‍ യാത്രക്കാർക്കായി ഒരു മെട്രോ സ്റ്റേഷനും നമോ ഭാരത്, മീററ്റ് മെട്രോ ട്രെയിനുകൾക്കായി ഒരു ട്രെയിൻ സ്റ്റേബിളിങ് യാർഡും ഉൾപ്പെടുമെന്ന്‌ എൻസിആർടിസി ചീഫ് പബ്ലിക് റിലേഷൻസ് ഓഫിസർ (സിപിആർഒ) പുനീത് വാട്‌സ്‌ പറഞ്ഞു. മീററ്റ് മെട്രോയ്ക്കായി 13 സ്റ്റേഷനുകളാണ് നിർമിക്കുന്നത്. അവയുടെ നിർമാണം അവസാന ഘട്ടത്തിലാണ്. അവസാനഘട്ട ജോലികൾ അതിവേഗം പുരോഗമിക്കുകയാണ്.
രാജ്യത്ത് ആദ്യമായി മീററ്റ് മെട്രോ ആർആർടിഎസിന്‍റെ അടിസ്ഥാന സൗകര്യങ്ങളിൽ പ്രവർത്തിക്കും. മീററ്റ് സൗത്ത് സ്റ്റേഷനിൽ നിന്ന് മോദിപുരം ഡിപ്പോയിലേക്ക് യാത്ര സാധ്യമാകും. മീററ്റ് സെൻട്രൽ, ഭൈൻസലി, ബെഗംപുൾ സ്റ്റേഷനുകൾ അണ്ടര്‍ഗ്രൗണ്ടിലും ബാക്കിയുള്ളവ ഉയർത്തിയുമാണ്‌ നിര്‍മാണം. കൂടാതെ, മീററ്റ് സൗത്ത്, ശതാബ്‌ദി നഗർ, ബേഗംപുൾ, മോദിപുരം എന്നിവിടങ്ങളിൽ നിന്ന് നമോ ഭാരത് ട്രെയിനിലേക്ക് യാത്രക്കാർക്ക് പ്രവേശനമുണ്ട്.
മറ്റ് സ്റ്റേഷനുകളിൽ മീററ്റ് മെട്രോ മാത്രമെ സർവീസ് നടത്തൂ. അടുത്ത വർഷത്തോടെ മുഴുവൻ ആർആർടിഎസും മീററ്റ് മെട്രോ പദ്ധതിയും പൂർത്തീകരിക്കുകയാണ് ലക്ഷ്യമെന്ന്‌ വാറ്റ്സ് പറഞ്ഞു. എൻസിആർടിസി പ്രകാരം, മോദിപുരം ഡിപ്പോ സ്റ്റേഷനെ മീററ്റ്-ഹരിദ്വാർ പ്രധാന റോഡുമായി ബന്ധിപ്പിക്കുന്നത്, പുതുതായി നിർമ്മിച്ച 30 മീറ്റർ വീതിയുള്ള അപ്രോച്ച് റോഡ് വഴി തടസമില്ലാത്ത കണക്റ്റിവിറ്റി ഉറപ്പാക്കും. അറ്റ്-ഗ്രേഡ് സ്റ്റേഷനിൽ യാത്രക്കാരുടെ സൗകര്യാർഥം രണ്ട് എൻട്രി-എക്‌സിറ്റ് ഗേറ്റുകൾ ഉണ്ടായിരിക്കും.
കൂടാതെ, ഡിപ്പോയിൽ ഒരു സ്ക്രാപ്പ് യാർഡ്, ലോജിസ്റ്റിക്‌സ്‌ ഓഫിസ്, കംപ്രസർ റൂം എന്നിവ ഉൾപ്പെടും. വിപുലമായ മരങ്ങളും ചെടികളും നട്ടുപിടിപ്പിച്ച് മുഴുവൻ ഡിപ്പോയും ഗ്രീൻ ഏരിയയായി വികസിപ്പിക്കും. പുനരുപയോഗ ഊർജം ഉത്‌പാദിപ്പിക്കുന്നതിന് മേൽക്കൂരകളിൽ സോളാർ പാനലുകൾ സ്ഥാപിക്കാനും പദ്ധതിയുണ്ട്.
മോദിപുരം ഡിപ്പോയും മെട്രോ സ്റ്റേഷനും യാത്രക്കാർക്ക് എളുപ്പത്തിൽ പ്രവേശനം നൽകും. സർവകലാശാലയ്ക്ക് സമീപമുള്ള റെയിൽവേ ലൈനിലൂടെ സഞ്ചരിക്കാൻ യാത്രക്കാരെ സഹായിക്കുന്നതിനായി ഒരു ഫുട്ട് ഓവർ ബ്രിഡ്‌ജ്‌ നിർമ്മിക്കുന്നുണ്ടെന്ന് എൻസിആർടിസി അധികൃതർ പറഞ്ഞു.
ALSO READ: ടോയ് ട്രെയിൻ മറിഞ്ഞ് അപകടം; പരിക്കേറ്റ് ചികിത്സയിലിരിക്കേ 11 വയസുകാരന്‍ മരിച്ചു
