ഹൈദരാബാദ്: റാമോജി റാവുവിന്‍റെ 88-ാം ജന്മദിനത്തില്‍ മാർഗദർശി ചിറ്റ് ഫണ്ട് തെലങ്കാനയിൽ മൂന്ന് പുതിയ ശാഖകൾ തുറന്നു. വനപർത്തി, ഷംഷാബാദ്, ഹസ്‌തിനപുരം എന്നിവിടങ്ങളിലെ മൂന്ന് പുതിയ ശാഖകൾ എംഡി ശൈലജ കിരൺ ഉദ്ഘാടനം ചെയ്‌തു. ആന്ധ്രാപ്രദേശ്, തെലങ്കാന, തമിഴ്‌നാട്, കർണാടക എന്നീ സംസ്ഥാനങ്ങളില്‍ ആറ് പതിറ്റാണ്ടിലേറെയായി സേവനം അനുഷ്‌ഠിക്കുന്ന മാർഗദർശി ഇന്ന് 118 ശാഖകളായി പ്രവര്‍ത്തിക്കുന്നു.
മാർഗദർശി ചിറ്റ് ഫണ്ട് എംഡി ശൈലജ കിരൺ റാമോജി ഫിലിം സിറ്റിയിൽ നിന്ന് വെർച്വലായി വനപർത്തിയിലെ ശാഖ ഇന്ന് രാവിലെ ഉദ്ഘാടനം ചെയ്‌തു. പുതിയ ശാഖയുടെ ഉദ്ഘാടന വേളയിൽ ജീവനക്കാർക്ക് ശാഖാ മാനേജ്‌മെന്‍റ് ആശംസകൾ അറിയിച്ചു. സിഒഒ മധുസൂദനൻ, വൈസ് പ്രസിഡന്‍റ് ബലരാമകൃഷ്‌ണ എന്നിവർ ദീപം തെളിയിച്ച് ശാഖയുടെ പ്രവർത്തനങ്ങൾക്ക് തുടക്കമിട്ടു.
117-ാമത് ഷംഷാബാദ് ബ്രാഞ്ച് മാർഗദർശി ചിറ്റ് ഫണ്ട് എംഡി ശൈലജ കിരൺ റാമോജി ഫിലിം സിറ്റിയിൽ നിന്ന് വെർച്വലായി ഉദ്ഘാടനം നിര്‍വഹിച്ചു. വൈസ് പ്രസിഡന്‍റ് രാജാജിക്കൊപ്പം സിഇഒ സത്യനാരായണ, ബ്രാഞ്ച് മാനേജർ അരുൺകുമാർ എന്നിവർ ചേർന്ന് ദീപം തെളിയിച്ചു. രംഗറെഡ്ഡി ജില്ലയിലെ ഹസ്‌തിനപുരത്തുള്ള 118-ാമത് ശാഖയും മാർഗദർശി എംഡിയാണ് ഉദ്ഘാടനം ചെയ്‌തത്. സംവിധായകൻ വെങ്കിടസ്വാമി ചടങ്ങിൽ പങ്കെടുത്തു.
മാര്‍ഗദര്‍ശിയില്‍ വലിയ വിശ്വാസത്തോടെയാണ് ജനങ്ങള്‍ കഷ്‌ടപ്പെട്ട് സമ്പാദിച്ച പണം സ്വരൂപിക്കുന്നതെന്ന് ശൈലജ കിരണ്‍ പറഞ്ഞു. അവർക്ക് മികച്ച സേവനങ്ങൾ നൽകുന്നതിന് നൂതന സാങ്കേതിക വിദ്യയാണ് മാർഗദർശി ഉപയോഗിക്കുന്നതെന്നും അവർ വ്യക്തമാക്കി. എല്ലാ വിഭാഗങ്ങളില്‍പെട്ടവര്‍ക്കും ഒരേ തരത്തിലുള്ള സേവനങ്ങളാണ് മികച്ച പരിശീലനം ലഭിച്ച ജീവനക്കാർ നൽകുന്നതെന്നും ശൈലജ കൂട്ടിച്ചേര്‍ത്തു.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
"ഇന്ന്, റാമോജി റാവുവിന്‍റെ ജന്മവാർഷികത്തോടനുബന്ധിച്ച്, ഞങ്ങൾ വനപർത്തി, ഷംഷാബാദ്, ഹസ്‌തിനപുരം എന്നിവിടങ്ങളിൽ പുതിയ ശാഖകൾ ആരംഭിച്ചു. അങ്ങനെ, കൂടുതൽ ആളുകൾക്ക് സാമ്പത്തിക സേവനങ്ങള്‍ നൽകുന്നതിന് ഞങ്ങളുടെ ജീവനക്കാർ നിരന്തരം പ്രവർത്തിക്കുന്നു. നിങ്ങളെ സേവിക്കാൻ മാർഗദർശി എപ്പോഴും തയ്യാറാണ്" - ശൈലജ കിരൺ പറഞ്ഞു.
1962-ൽ സ്ഥാപിതമായത് മുതൽ സഹകരണ ധനകാര്യ സേവനങ്ങളിലെ മുൻനിരക്കാരാണ് മാര്‍ഗദര്‍ശി ചിറ്റ്. ആന്ധ്രപ്രദേശ്, തെലങ്കാന, തമിഴ്‌നാട്, കർണാടക സംസ്ഥാനങ്ങളിലായി പടര്‍ന്നുകിടക്കുന്ന മാര്‍ഗദര്‍ശിയുടെ ശൃംഖല കമ്പനിയുടെ പാരമ്പര്യത്തെ ഉയർത്തിപ്പിടിക്കുന്നതാണ്. വിശ്വാസം, സുതാര്യത, സാമ്പത്തിക ശാക്തീകരണം തുടങ്ങിയ മൂല്യങ്ങള്‍ മുറുകെപ്പിടിച്ചാണ് മാര്‍ഗദര്‍ശിയുടെ ജൈത്രയാത്ര. സാമ്പത്തിക പരിഹാരങ്ങൾ എല്ലാ വീട്ടിലും പ്രാപ്യമാക്കുകയാണ് മാർഗദർശിയുടെ ലക്ഷ്യം.
