ന്യൂഡല്‍ഹി: രാജ്യത്ത് അടിയന്തരാവസ്ഥ ഏര്‍പ്പെടുത്തി ഭരണഘടനയെ അവഹേളിക്കാൻ ശ്രമിച്ചതിന്‍റെ പേരിലായിരിക്കും കോണ്‍ഗ്രസ് ഓര്‍മ്മിക്കപ്പെടുകയെന്ന് പ്രധാനമന്ത്രി നരേന്ദ്ര മോദി. ഭരണഘടനയുടെ 25-ാം വാര്‍ഷികം ആഘോഷിക്കുമ്പോഴാണ് കോണ്‍ഗ്രസ് രാജ്യത്ത് അടിയന്തരാവസ്ഥ ഏർപ്പെടുത്തുകയും ഭരണഘടനാപരമായ അവകാശങ്ങൾ വെട്ടിക്കുറയ്ക്കുകയും ചെയ്‌തത്. അടിയന്തരാവസ്ഥ ഏര്‍പ്പെടുത്തിയതിലൂടെയുണ്ടായ കറ കഴുകി കളയാൻ കോണ്‍ഗ്രസിന് കഴിയില്ലെന്നും പ്രധാനമന്ത്രി പാര്‍ലമെന്‍റിലെ ഭരണഘടന ചര്‍ച്ചയ്‌ക്കിടെ പറഞ്ഞു.
ഗാന്ധി കുടുംബം ഭരണഘടനയെ എല്ലായിപ്പോഴും വെല്ലുവിളിക്കുക മാത്രമാണ് ചെയ്‌തിട്ടുള്ളത്. ഓരോ ഘട്ടത്തിലും ഭരണഘടന വിരുദ്ധമായ പ്രവര്‍ത്തികള്‍ കോണ്‍ഗ്രസ് ചെയ്‌തു. അഭിപ്രായസ്വാതന്ത്ര്യത്തിനുള്ള അവകാശം തടയാൻ കോണ്‍ഗ്രസ് ശ്രമിച്ചുണ്ടെങ്കിലും അതെല്ലാം പരാജയപ്പെടുകയാണുണ്ടായത്.
ഭരണ നിര്‍വഹണത്തിന് ഭരണഘടന തടസമാണെങ്കില്‍ അത് ഭേദഗതി ചെയ്യണമെന്ന് ചൂണ്ടിക്കാട്ടി മുഖ്യമന്ത്രിമാര്‍ക്ക് കത്തയച്ചിട്ടുള്ള ആളാണ് ജവഹര്‍ലാല്‍ നെഹ്‌റു എന്നും മോദി ആരോപിച്ചു. ഭരണഘടനയുടെ ആത്മാവിനെ പോലും കോണ്‍ഗ്രസ് വ്രണപ്പെടുത്തിയെന്നും മോദി പറഞ്ഞു. സ്വന്തം കസേര സംരക്ഷിക്കുന്നതിനായാണ് നെഹ്‌റു-ഗാന്ധി കുടുംബം അടിയന്തരാവസ്ഥ പേലും രാജ്യത്ത് ഏര്‍പ്പെടുത്തിയത്.
തീവ്രവാദികള്‍ക്കൊപ്പം നിന്ന് ഭരണഘടനയുടെ ആത്മാവിനെ ബലികഴിപ്പിച്ച വ്യക്തിയാണ് രാജീവ് ഗാന്ധി. അധികാര കേന്ദ്രം പാര്‍ട്ടി അധ്യക്ഷയാണെന്ന് മുൻ പ്രധാനമന്ത്രി മൻമോഹൻ സിങ് പറഞ്ഞിട്ടുണ്ട്. പാർട്ടി അധ്യക്ഷ പറഞ്ഞാൽ തനിക്ക് അനുസരിക്കേണ്ടിവരുമെന്നും അദ്ദേഹം പറഞ്ഞിട്ടുണ്ട്. ചരിത്രത്തില്‍ ആദ്യമായി ഒരു സര്‍ക്കാര്‍ പാര്‍ട്ടിക്ക് വഴങ്ങിയത് അന്നായിരുന്നുവെന്നും മോദി പറഞ്ഞു.
നെഹ്‌റു സംവരണത്തെ എതിര്‍ത്തു: ഭരണഘടനയുടെ പരിധിയില്‍ വരുന്നതാണ് ഏകീകൃത സിവില്‍ കോഡും. അധികാരത്തില്‍ വരുന്ന സര്‍ക്കാര്‍ രാജ്യത്ത് യുസിസി നടപ്പാക്കണമെന്ന് നീണ്ട ചര്‍ച്ചകള്‍ക്ക് ശേഷമാണ് തീരുമാനിച്ചത്. മതപരമായ വ്യക്തി നിയമങ്ങള്‍ രാജ്യത്ത് ഇല്ലാതാക്കണം എന്നതായിരുന്നു അംബേദ്‌കറിന്‍റെയും ലക്ഷ്യം. അതുകൊണ്ടാണ് ഏകീകൃത സിവില്‍ കോഡ് നടപ്പിലാക്കാൻ ഞങ്ങള്‍ കഠിനമായി പരിശ്രമിക്കുന്നതെന്നും മോദി വ്യക്തമാക്കി.
ദീര്‍ഘവീക്ഷണമുണ്ടായിരുന്ന വ്യക്തിയാണ് ബിആര്‍ അംബ്‌ദേകര്‍. രാജ്യത്തിന്‍റെ ഒരു ഭാഗവും ദുര്‍ബലപ്പെടരുത് എന്ന ആശങ്ക അദ്ദേഹത്തിനുണ്ടായിരുന്നു. സമത്വത്തിന് വേണ്ടിയാണ് അദ്ദേഹം നിലകൊണ്ടത്.
എന്നാല്‍, ജവഹര്‍ലാല്‍ നെഹ്‌റു സംവരണത്തെ ദുരുപയോഗം ചെയ്‌തു. സംവരണത്തിനെതിരെ അദ്ദേഹം പ്രസംഗങ്ങള്‍ നടത്തി, കത്തുകള്‍ എഴുതിയെന്നും മോദി ആരോപിച്ചു. വോട്ട് ബാങ്കിനെ തൃപ്‌തിപ്പെടുത്താനാണ് കോണ്‍ഗ്രസ് മതപരമായ സംവരണം പോലും ഏര്‍പ്പെടുത്തിയതെന്നും മോദി പറഞ്ഞു.
സ്വന്തം പാര്‍ട്ടിയുടെ ഭരണഘടന അംഗീകരിക്കാത്തവരാണ് കോണ്‍ഗ്രസ്: ഭരണഘടന കോണ്‍ഗ്രസിന് ജനങ്ങളെ പേടിപ്പിക്കാനുള്ള ഒരു ഉപകരണം മാത്രമാണ്. സ്വന്തം പാര്‍ട്ടിയുടെ ഭരണഘടന പോലും അംഗീകരിക്കാൻ അവര്‍ തയ്യാറായിട്ടില്ല. രാജ്യത്തിന്‍റെ പ്രഥമ പ്രധാനമന്ത്രിയായി 12 സംസ്ഥാന കോൺഗ്രസ് കമ്മിറ്റികൾ പോലും അംഗീകരിച്ചത് സര്‍ദാര്‍ വല്ലഭായ് പട്ടേലിനെ ആയിരുന്നു.
പാര്‍ട്ടി ഭരണഘടന പ്രകാരം ഈ സാഹചര്യത്തില്‍ പ്രധാനമന്ത്രിയാകേണ്ടിയിരുന്നതും സര്‍ദാര്‍ വല്ലഭായ് പട്ടേലായിരുന്നു. ഒരു കോണ്‍ഗ്രസ് കമ്മിറ്റിയുടെയും പിന്തുണ നെഹ്‌റുവിന് ഉണ്ടായിരുന്നില്ല. സ്വന്തം പാര്‍ട്ടിയുടെ ഭരണഘടന പോലും പിന്തുടരാത്തവര്‍ എങ്ങനെ രാജ്യത്തിന്‍റെ ഭരണഘടനയെ പിന്തുടരുമെന്നും മോദി ചോദിച്ചു.
മൂന്നാം സമ്പദ്‌ശക്തിയായി ഇന്ത്യ മാറും: ഇന്ന്, ഇന്ത്യൻ ഭരണഘടനയുടെ 75 വര്‍ഷം അഭിമാനത്തിന്‍റേയും ആഘോഷത്തിന്‍റെയും വിഷയമാണെന്നും അദ്ദേഹം പറഞ്ഞു. ജനാധിപത്യത്തിന്‍റെ മാതാവാണ് ഇന്ത്യ. ഭാരതീയ സംസ്‌കാരം ലോകത്തിന് മാതൃകയാണ്. അതുപോലൊരു രാജ്യത്ത് വനിതാ ശാക്തീകരണത്തിന് അടിത്തറയായത് ഭരണഘടനയാണ്.
തുടക്കം മുതല്‍ തന്നെ വനിതകള്‍ക്കും വോട്ടവകാശം നല്‍കിയ രാജ്യമാണ് ഇന്ത്യ. സ്‌ത്രീകള്‍ നയിക്കുന്ന വികസനമാണ് ഇന്ത്യ പിന്തുടരുന്നത്. നമ്മുടെ രാഷ്‌ട്രപതി ഒരു വനിതയാണെന്നത് ഏറെ സന്തോഷം പകരുന്ന ഒരു കാര്യമാണ്. രാജ്യത്തിന്‍റെ ഓരോ മേഖലയിലും സ്‌ത്രീകളുടെ പ്രാതിനിധ്യം വര്‍ധിക്കുകയാണ്. സ്വാതന്ത്ര്യത്തിന്‍റെ ഒരു നൂറ്റാണ്ട് ആഘോഷിക്കുമ്പോള്‍ ഇന്ത്യ ഒരു വികസിത രാഷ്‌ട്രമായി മാറുമെന്നും അദ്ദേഹം പറഞ്ഞു.
ഏകത്വമാണ് ഇന്ത്യൻ ഭരണഘടനയുടെ മുഖമുദ്ര. ഭരണഘടനയിലെ 370-ാം അനുച്ഛേദം രാജ്യത്തിന്‍റെ ഐക്യത്തിന് തടസമായിരുന്നു. അത് നീക്കം ചെയ്യാൻ ഞങ്ങള്‍ക്കായി. ഐക്യത്തിന് വേണ്ടിയാണ് 'ഒരു രാജ്യം, ഒരു നികുതി കൊണ്ടുവന്നത്'. ഇന്ത്യയെ ഒന്നിപ്പിക്കുന്നതില്‍ ഒരു രാജ്യം, ഒരു റേഷന്‍ കാര്‍ഡ്, ജിഎസ്‌ടി, ഒറ്റ ആരോഗ്യ കാര്‍ഡ് എന്നിവ വലിയ പങ്കുവഹിച്ചുവെന്നും അദ്ദേഹം കൂട്ടിച്ചേര്‍ത്തു.
ബിജെപി ഇന്നും പിന്തുടരുന്നത് മനുസ്‌മൃതിയെന്ന് രാഹുല്‍ ഗാന്ധി: ഭരണഘടന ചര്‍ച്ചയില്‍ കേന്ദ്ര സര്‍ക്കാരിനും ബിജെപിക്കുമെതിരെ പ്രതിപക്ഷ നേതാവ് രാഹുല്‍ ഗാന്ധി ആഞ്ഞടിച്ചിരുന്നു. രാജ്യത്തെ പിന്നിലേക്ക് കൊണ്ടുപോകാനാണ് ബിജെപിയുടെ ശ്രമിക്കുന്നത്. നവീന ഇന്ത്യയുടെ രേഖയാണ് ഭരണഘടനയെന്നും ഗാന്ധിയുടെയും നെഹ്റുവിന്‍റെയും അംബ്ദേക്കറിന്‍റെയും ആശയങ്ങളാണ് ഭരണഘടനയിലുള്ളതെന്നും അദ്ദേഹം പറഞ്ഞു.
ഭരണഘടനയുടെ ചെറിയ പതിപ്പ് കയ്യില്‍ കരുതിയാണ് രാഹുല്‍ പാര്‍ലമെന്‍റില്‍ സംസാരിച്ചുതുടങ്ങിയത്. ചര്‍ച്ചയില്‍ വിഡി സവര്‍ക്കറെയും രാഹുല്‍ ഗാന്ധി വിമര്‍ശിച്ചു. ഭരണഘടനയില്‍ ഇന്ത്യയുടേതായി ഒന്നുമില്ല എന്നായിരുന്നു സവര്‍ക്കറുടെ അഭിപ്രായം.
മനുസ്‌മൃതിയാണ് ഔദ്യോഗിക രേഖ എന്നായിരുന്നു അദ്ദേഹത്തിന്‍റെ വാദം. ഭരണഘടനയെ സംരക്ഷിക്കുമെന്ന് ബിജെപി പറയുന്നത് സവര്‍ക്കറെ അപമാനിക്കുന്നതിന് തുല്യമാണ്. ഭരണഘടനയല്ല, മനുസ്‌മൃതിയാണ് ഇന്നും ബിജെപിയുടെ നിയമസംഹിത.
ഇടിവി ഭാരത് കേരള വാട്‌സ്‌ആപ്പ് ചാനലില്‍ ജോയിന്‍ ചെയ്യാം
ബിജെപി ഭരിക്കുന്ന യുപിയില്‍ മനുസ്‌മൃതിയാണ് അവര്‍ പിന്തുടരുന്നത്. ഹത്രാസില്‍ കൂട്ട ബലാത്സംഗത്തിനിരയായ കുട്ടിയുടെ കുടുംബത്തെ ഭരണസംവിധാനം ഒറ്റപ്പെടുത്തി. രാജ്യത്തെ രാഷ്ട്രീയ, സാമൂഹിക, സാമ്പത്തിക തുല്യത ഇല്ലാതായി. ജാതി സെൻസസ് കൊണ്ടുവരാത്തത് തുല്യതയില്ലായ്‌മയുടെ തെളിവാണെന്നും രാഹുല്‍ ചൂണ്ടിക്കാട്ടി.
രാജ്യത്തെ പിന്നോട്ട് കൊണ്ടുപോകാനാണ് ബിജെപിയുടെ ശ്രമം എന്നും ചൂണ്ടിക്കാട്ടിയ രാഹുല്‍ ചര്‍ച്ചയില്‍ ഏകലവ്യന്‍റെ കഥയും പരാമര്‍ശിച്ചു. ഇന്ത്യയില്‍ യുവാക്കളുടെ സ്ഥിതി ഏകലവ്യൻ്റെ വിരൽ മുറിച്ച പോലെയാണ്. അദാനിക്കും ലാറ്ററല്‍ എൻട്രിക്കും അവസരം നല്‍കി യുവാക്കളുടെ അവസരം ഇല്ലാതാക്കുകയാണ്. കര്‍ഷകരുടെയും വിരല്‍ രാജ്യത്ത് മുറിക്കുകയാണ്. വിരല്‍ നഷ്‌ടപ്പെട്ട കയ്യാണ് ഇന്നത്തെ മുദ്ര. ഭരണഘടനയ്‌ക്കൊപ്പം തന്നെ നീതി നിഷേധവും ചര്‍ച്ച ചെയ്യപ്പെടണമെന്നും രാഹുല്‍ ഗാന്ധി പറഞ്ഞു.
വിഷയത്തില്‍ പ്രിയങ്കാ ഗാന്ധി കഴിഞ്ഞ ദിവസം നടത്തിയ പ്രസംഗവും ശ്രദ്ധ നേടിയിരുന്നു. കേന്ദ്ര സര്‍ക്കാരിനെ കടന്നാക്രമിക്കുന്ന ശൈലിയിലായിരുന്നു പ്രിയങ്ക സംസാരിച്ചത്. പ്രിയങ്കയുടെ പ്രസംഗം ഒരുഘട്ടത്തില്‍ പോലും തടസപ്പെടുത്താൻ ഭരണകക്ഷിയിലെ അംഗങ്ങള്‍ തയ്യാറായിരുന്നില്ല. എന്നാല്‍, ഇന്ന് രാഹുല്‍ ഗാന്ധിയുടെ പ്രസംഗത്തിനിടെ സഭയില്‍ ബഹളം ഉയര്‍ന്നിരുന്നു.
രാഹുലിന്‍റെ പ്രസംഗത്തെ പരിഹസിച്ച് ബിജെപി രംഗത്തെത്തിയിരുന്നു. ഇതിനെ പ്രതിരോധിച്ച കെസി വേണുഗോപാല്‍ എംപിയെ സ്‌പീക്കറും വിമര്‍ശിച്ചു. രാഹുലിന്‍റെ പ്രസംഗത്തിനെതിരെ അനുരാഗ് താക്കൂറും രംഗത്തെത്തി. ഭരണഘടനയെ കുറിച്ച് രാഹുല്‍ ഗാന്ധിക്ക് ഒന്നും അറിയില്ലെന്ന് അദ്ദേഹം പറഞ്ഞു.
Also Read : ഒരു രാജ്യം, ഒരു തെരഞ്ഞെടുപ്പ്; ബില്ല് ഡിസംബർ 16ന് ലോക്‌സഭയില്‍
