ബെംഗളൂരു (കർണാടക) : അനധികൃത സ്വത്ത് സമ്പാദന കേസിൽ രേഖകൾ സമർപ്പിക്കാൻ കർണാടക ഉപമുഖ്യമന്ത്രി ഡികെ ശിവകുമാറിന് കർണാടക ലോകായുക്തയുടെ നോട്ടിസ് അയച്ചു. ഡികെ ശിവകുമാറിനെതിരായ അനധികൃത സ്വത്ത് സമ്പാദന കേസിൽ എല്ലാ രേഖകളും സമർപ്പിക്കണമെന്ന് കർണാടക ലോകായുക്ത ആവശ്യപ്പെട്ടു.
മുൻപ് ഭരിച്ച ബിജെപി സർക്കാർ പുറപ്പെടുവിച്ച കേന്ദ്ര ഏജൻസി അന്വേഷണത്തിനുള്ള അനുമതി സിദ്ധരാമയ്യ സർക്കാർ പിൻവലിച്ചതിനെ തുടർന്നാണ് കേസ് ലോകായുക്തയ്ക്ക് കൈമാറിയത്. കേസുമായി ബന്ധപ്പെട്ട എല്ലാ രേഖകളും കൃത്യമായി ഹാജരാക്കാൻ ശിവകുമാറിനോട് ആവശ്യപ്പെട്ടിട്ടുണ്ട്. കൂടാതെ കേസ് അന്വേഷിക്കാൻ സെൻട്രൽ ബ്യൂറോ ഓഫ് ഇൻവെസ്‌റ്റിഗേഷന് (സിബിഐ) നൽകിയ അനുമതി 2023 നവംബർ 23ന് കോൺഗ്രസ് സർക്കാർ പിൻവലിച്ചിരുന്നു. തുടർന്നാണ് കോൺഗ്രസ് സർക്കാർ കേസ് ലോകായുക്തയ്ക്ക് കൈമാറിയത്.
ശിവകുമാറിനെതിരായ കുറ്റപത്രം സമർപ്പിക്കുന്നതിന്‍റെ അവസാന ഘട്ടത്തിലാണെന്ന് അവകാശപ്പെട്ട് കർണാടക സർക്കാരിന്‍റെ തീരുമാനത്തെ സിബിഐ കോടതിയിൽ ചോദ്യം ചെയ്‌തിരുന്നു. 2013 മുതൽ 2018 വരെ 74.93 കോടി രൂപയുടെ സ്വത്ത് സമ്പാദിച്ചെന്ന കേസിൽ ഡികെ ശിവകുമാറിനെതിരായ സിബിഐ അന്വേഷണം സംസ്ഥാന സർക്കാർ റദ്ദാക്കിയിരുന്നു.
ഇതു സംബന്ധിച്ച് കേസിന്‍റെ ലോകായുക്ത അന്വേഷണ ഉദ്യോഗസ്ഥൻ എം എച്ച് സതീഷ് ബുധനാഴ്‌ച ഡി.കെയ്‌ക്ക് നോട്ടിസ് അയച്ചു. സിബിഐ അന്വേഷണ ഉദ്യോഗസ്ഥർക്ക് നേരത്തെ നൽകിയ വിവരങ്ങളും രേഖകളും ലോകായുക്തയ്ക്ക് സമർപ്പിക്കണമെന്നാണ് നോട്ടിസിൽ പറയുന്നത്.
2013 ഏപ്രിൽ 1 നും 2018 ഏപ്രിൽ 30 നും ഇടയിൽ ശിവകുമാർ 74.93 കോടി രൂപയുടെ അനധികൃത സ്വത്ത് സമ്പാദിച്ചതായി സിബിഐ ആരോപിച്ചിരുന്നു. ഇതുമായി ബന്ധപ്പെട്ട് 2019 സെപ്റ്റംബർ 9 ന് അന്നത്തെ സംസ്ഥാന സർക്കാരിന്‍റെ നേതൃത്വത്തിലുള്ള എൻഫോഴ്‌സ്‌മെന്‍റെ് ഡയറക്‌ടറേറ്റിന്‍റ് കത്തിന്‍റെ അടിസ്ഥാനത്തിൽ അഴിമതി നിരോധന നിയമപ്രകാരം അന്വേഷണം നടത്താൻ ബിഎസ് യെദ്യൂരപ്പ സിബിഐക്ക് അനുമതി നൽകി.
ഇത് ചോദ്യം ചെയ്‌തുകൊണ്ട് ശിവകുമാർ ഹൈക്കോടതിയിൽ അപേക്ഷ നൽകി. അതിനിടെ, സിബിഐക്ക് നൽകിയ അനുമതി റദ്ദാക്കി കോൺഗ്രസ് നേതൃത്വത്തിലുള്ള സംസ്ഥാന സർക്കാർ ഉത്തരവിട്ടു. ഇതുമായി ബന്ധപ്പെട്ട് സിബിഐയും ഹൈക്കോടതിയെ സമീപിച്ചിട്ടുണ്ട്. വിചാരണ പുരോഗമിക്കുകയാണ്.
