ഹൈദരാബാദ് : നമ്മുടെ രാജ്യത്ത് ആയിരക്കണക്കിന് ദമ്പതികളാണ് സന്താനങ്ങളാൽ അനുഗ്രഹിക്കപ്പെടാത്തതിന്‍റെ ആശങ്കയിൽ ജീവിക്കുന്നത്. രാജ്യാന്തര ദത്തെടുക്കൽ നമ്മുടെ രാജ്യത്തും വർധിച്ച് വരുകയാണ്. അതുപോലെ തന്നെ ഏറ്റവും കൂടുതൽ ആളുകൾ ദത്തെടുക്കുന്നത് പെൺകുട്ടികളെയാണ് എന്നതും ഏറെ ശ്രദ്ധേയമാണ്. പെൺകുട്ടികൾ ആൺകുട്ടികളേക്കാൾ കുടുംബങ്ങൾക്ക് കൂടുതൽ സന്തോഷം നൽകുമെന്നാണ് വിശ്വാസം. അതിനാൽ, ദത്തെടുക്കുന്ന പെൺകുട്ടികളുടെ എണ്ണം ഉയരുന്നതിൽ അതിശയിക്കാനില്ല.
പെൺകുട്ടികളെ പ്രവസിക്കുന്ന അമ്മമാർ ദാരിദ്ര്യം മൂലമോ മറ്റെന്തെങ്കിലും കാരണത്താലോ ആകാം ആ കുഞ്ഞിനെ ഉപേക്ഷിക്കുന്നത്. എന്നാൽ കുട്ടികളില്ലാത്ത ദമ്പതിമാർ ആൺകുട്ടികളെ ദത്തെടുക്കാൻ അവസരമുണ്ടെങ്കിലും മുൻഗണന നൽകുന്നത് പെൺകുട്ടികൾക്കാണ്. പെൺകുട്ടികൾ ഭാഗ്യം കൊണ്ടുവരും എന്ന വിശ്വാസമാണ് ഇതിന് പിന്നിലുള്ളത്. നാല് വർഷത്തിനിടെ തെലങ്കാനയിൽ നിന്ന് 798 കുട്ടികൾ ദത്തെടുക്കപ്പെട്ടിട്ടുണ്ട്, അതിൽ 527 പേരും പെൺകുട്ടികളാണ്.
റിപ്പോർട്ടുകൾ തയ്യാറാക്കുന്നതിൽ കാലതാമസം : കുട്ടികളില്ലാത്ത ദമ്പതികൾ നിയമപരമായ ദത്തെടുക്കലിനായി സെൻട്രൽ അഡോപ്ഷൻ റിസോഴ്‌സ് ഏജൻസിയിൽ (CARA) അപേക്ഷിക്കുന്നു. ഇത് പ്രകാരം നടത്തുന്ന ദത്തെടുക്കൽ സാധുവാണ്. മറ്റ് മാർഗങ്ങളിലൂടെ ദത്തെടുക്കാൻ ശ്രമിക്കുന്നത് കുറ്റകരവുമാണ്. ഇതുമൂലം നിരവധി ദമ്പതികൾ 'സിഎആർഎ'യെ ആശ്രയിക്കുന്നു.
ദത്തെടുക്കലിനായി രജിസ്‌റ്റർ ചെയ്‌ത ശേഷം, ശിശുക്ഷേമ വകുപ്പ് ഉദ്യോഗസ്ഥർ അവരുടെ സാമൂഹിക, ആരോഗ്യ, സാമ്പത്തിക, വ്യക്തിഗത വിശദാംശങ്ങൾ ശേഖരിക്കുകയും അവ പരിശോധിച്ച് മൂന്ന് മുതൽ ആറ് മാസത്തിനുള്ളിൽ റിപ്പോർട്ട് തയ്യാറാക്കുകയും ചെയ്യണം. അതിനുശേഷം മാത്രമേ ദത്തെടുക്കാൻ ആഗ്രഹിക്കുന്ന ദമ്പതികളെ സീനിയോരിറ്റി പട്ടികയിൽ ഉൾപ്പെടുത്തൂ.
എന്നാൽ, ഭരണപരമായ പിഴവുകളും ചില ഉദ്യോഗസ്ഥരുടെ അനാസ്ഥയും കാരണം ഈ നടപടി പൂർത്തീകരിക്കുന്നതിൽ ഗുരുതര കാലതാമസമാണ് ഉണ്ടാകുന്നത്. അടുത്തിടെ നടന്ന അവലോകന യോഗത്തിൽ ശിശുക്ഷേമ വകുപ്പ് ഉദ്യോഗസ്ഥരുടെ അനാസ്ഥയിൽ മുഖ്യമന്ത്രി രേവന്ത് റെഡി രോഷം പ്രകടിപ്പിച്ചിരുന്നു. റിപ്പോർട്ടുകൾ അടിയന്തരമായി തയ്യാറാക്കി വെയ്റ്റിങ് ലിസ്‌റ്റിലുള്ളവരുടെ എണ്ണം കുറയ്‌ക്കണമെന്നായിരുന്നു നിർദേശം.
കാത്തിരിക്കേണ്ടി വരുന്നത് രണ്ട് മുതൽ അഞ്ച് വർഷം വരെ : ദരിദ്രരും നിരാലംബരുമായ കുടുംബങ്ങൾ ഉപേക്ഷിക്കുന്ന കുട്ടികൾ, വഴിയോരങ്ങളിൽ കാണുന്ന കുട്ടികൾ, മാതാപിതാക്കൾ ഇല്ലാത്ത കുട്ടികൾ എന്നിവരെ പരിപാലിക്കുന്നത് ശിശുക്ഷേമ വകുപ്പ് ഉദ്യോഗസ്ഥരാണ്. ശിശുക്ഷേമ സമിതിയുടെ (ഡബ്ല്യുസി) അംഗീകാരത്തോടെ അവരെ ശിശു വിഹാറിലും ശിശു ഗൃഹത്തിലും പുനരധിവസിപ്പിക്കുന്നു.
തെലങ്കാനയിൽ, ഹൈദരാബാദ് ശിശുവിഹാറിനൊപ്പം, ജില്ലകളിലെ ശിശു ഗൃഹങ്ങളാണ് കുട്ടികളുടെ സംരക്ഷണ കേന്ദ്രങ്ങൾ. കുറച്ച് ദിവസം മാത്രം പ്രായമുള്ള കുട്ടികൾ മുതൽ മൂന്നു വയസുവരെയുള്ള കുട്ടികൾക്ക് പ്രത്യേക പരിചരണമാണ് ഇവർ നൽകുന്നത്. നിയമനടപടികൾ പൂർത്തിയാക്കിയ ശേഷം, കുട്ടികളില്ലാത്ത ദമ്പതികൾക്ക് 'സിഎആർഎ' നിയമങ്ങൾ പ്രകാരം ദത്തെടുക്കാൻ അനുമതിയുണ്ട്. എന്നിരുന്നാലും, ദത്തെടുക്കലിനായി രജിസ്‌റ്റർ ചെയ്‌ത ദമ്പതികൾക്ക് രണ്ട് മുതൽ അഞ്ച് വർഷം വരെ കാത്തിരിക്കണം.
തെലങ്കാനയിൽ നിന്ന് കൂടുതൽ : രാജ്യമൊട്ടാകെ നോക്കിയാൽ തെലങ്കാനയിൽ നിന്ന് ദത്തെടുക്കുന്നവരുടെ എണ്ണം കൂടുതലാണ്. കഴിഞ്ഞ രണ്ട് വർഷത്തിനിടെ, തെലങ്കാന സംസ്ഥാനം ആഭ്യന്തര ദത്തെടുക്കലിൽ ഏഴാം സ്ഥാനത്താണ്. മഹാരാഷ്‌ട്ര, ഉത്തർപ്രദേശ് എന്നീ സംസ്ഥാനങ്ങളാണ് ആദ്യ രണ്ട് സ്ഥാനങ്ങളിൽ.
എന്നാൽ, രണ്ട് വർഷമായി വിദേശ ദത്തെടുക്കലിൽ തെലങ്കാന രണ്ടാം സ്ഥാനത്താണ്. വിവിധ സംസ്ഥാനങ്ങളിൽ നിന്നും വിദേശത്ത് നിന്നുമുള്ള ദമ്പതികൾ ദത്തെടുക്കുന്ന കുട്ടികളുടെ ക്ഷേമത്തെക്കുറിച്ച് ശിശുക്ഷേമ വകുപ്പ് ഉദ്യോഗസ്ഥർ ബോധവാന്മാരാണ്.
ALSO READ : കുഞ്ഞിനെ ദത്തെടുത്തത് പ്രശസ്‌തിക്ക് വേണ്ടിയെന്ന് പരാതി ; ബിഗ് ബോസ് താരം അറസ്‌റ്റില്‍
