ന്യൂഡല്‍ഹി: സ്വതന്ത്രവും നിഷ്‌പക്ഷവുമായ തെരഞ്ഞെടുപ്പ് ഉറപ്പാക്കാന്‍ നടപടികള്‍ കൈക്കൊള്ളണമെന്ന് ചീഫ് സെക്രട്ടറിമാര്‍ക്കും പൊലീസ് മേധാവികള്‍ക്കും കേന്ദ്ര സുരക്ഷ ഏജന്‍സികളുടെ തലവന്‍മാര്‍ക്കും തെരഞ്ഞെടുപ്പ് കമ്മീഷന്‍റെ നിര്‍ദ്ദേശം. മുന്‍കാല അനുഭവങ്ങളുടെ പശ്ചാത്തലത്തില്‍ വര്‍ഗീയ ലഹളകള്‍ക്കുള്ള സാധ്യത മുന്നില്‍ കണ്ട് അവ തടയാനുള്ള നടപടികള്‍ കൈക്കൊള്ളണമെന്നും നിര്‍ദ്ദേശിച്ചിട്ടുണ്ട്.
മണിപ്പൂരിലെ സംഘര്‍ഷങ്ങളും അവിടെ സമാധാനപരമായ തെരഞ്ഞെടുപ്പ് നടത്താനുള്ള സാധ്യതകളും വിലയിരുത്തണമെന്നും നിര്‍ദേശമുണ്ട്. സംഘര്‍ഷത്തെ തുടര്‍ന്ന് മറ്റിടങ്ങളിലേക്ക് പലായനം ചെയ്‌തവരുടെ പങ്കാളിത്തവും തെരഞ്ഞെടുപ്പില്‍ ഉറപ്പാക്കണമെന്ന് നിര്‍ദ്ദേശിച്ചിട്ടുണ്ട്.
യാതൊരു കളങ്കവുമില്ലാത്ത തെരഞ്ഞെടുപ്പ് നടത്തുകയാണ് ദൗത്യമെന്നും മുഖ്യതെരഞ്ഞെടുപ്പ് കമ്മീഷണര്‍ രാജീവ് കുമാര്‍ ഉദ്യോഗസ്ഥരുടെ യോഗത്തില്‍ ചൂണ്ടിക്കാട്ടി. എല്ലാ അഞ്ച് വര്‍ഷം കൂടുമ്പോഴും നടക്കുന്ന നിര്‍ണായക യോഗമാണ് ഇതെന്നും അദ്ദേഹം പറഞ്ഞു. അയല്‍സംസ്ഥാനങ്ങളിലെയും കേന്ദ്രഭരണപ്രദേശങ്ങളിലെയും ഉദ്യോഗസ്ഥരുടെ പരസ്‌പര സഹകരണത്തോടെ വേണം തെരഞ്ഞെടുപ്പ് പ്രക്രിയ കൊണ്ടുപോകാനെന്നും അദ്ദേഹം പറഞ്ഞു. കേന്ദ്ര സേനകളുടെ കൃത്യമായ വിന്യാസം വേണമെന്നും, സുരക്ഷ സേനയ്ക്ക് ആവശ്യമായ സൗകര്യങ്ങള്‍ ചെയ്‌ത് കൊടുക്കണമെന്നും കമ്മീഷന്‍ ആവശ്യപ്പെട്ടു.
മയക്കുമരുന്ന്, മദ്യം, ആയുധങ്ങള്‍,സ്ഫോടക വസ്‌തുക്കള്‍ തുടങ്ങിയവ അതിര്‍ത്തി കടന്ന് എത്തുന്നത് തടയാനാവശ്യമായ നടപടികള്‍ വേണമെന്നും കമ്മീഷന്‍ ചൂണ്ടിക്കാട്ടി. ഇവ എത്തുന്ന ഇടങ്ങള്‍ കണ്ടെത്തി തന്നെ തടയാനാവശ്യമായ നടപടികള്‍ കൈക്കൊള്ളണം. ചില സംസ്ഥാനങ്ങളിലെ അനധികൃത കഞ്ചാവ് കൃഷിയ്ക്കെതിരെയും നടപടി വേണം. അരുണാചല്‍ പ്രദേശ്, ഛത്തീസ്ഗഡ്, മഹാരാഷ്‌ട്ര അടക്കമുള്ള പതിനൊന്ന് പ്രശ്ന ബാധിത സംസ്ഥാനങ്ങളിലേക്ക് തെരഞ്ഞെടുപ്പ് സാമഗ്രികള്‍ കൊണ്ടുപോകാന്‍ ഇന്ത്യന്‍ വ്യോമസേനയുടെയും വ്യോമയാന വകുപ്പിന്‍റെയും സേവനം ഉറപ്പാക്കണം.
സ്ഥാനാര്‍ത്ഥികളുടെയും രാഷ്‌ട്രീയ നേതാക്കളുടെയും സുരക്ഷ ഉറപ്പാക്കാന്‍ വേണ്ട നടപടി കൈക്കൊള്ളണമെന്നും നിര്‍ദ്ദേശമുണ്ട്, പ്രത്യേകിച്ച് ഛത്തീസ്ഗഡ് തുടങ്ങിയ സംസ്ഥാനങ്ങളിലും ജമ്മു കശ്‌മീര്‍ പോലുള്ള കേന്ദ്രഭരണ പ്രദേശങ്ങളിലും. കേന്ദ്ര സുരക്ഷാ സേനകളിലെ ഉദ്യോഗസ്ഥര്‍, തീരസംരക്ഷണസേന, സംസ്ഥാനചീഫ് സെക്രട്ടറിമാര്‍, പ്രതിരോധ-റെയില്‍വേ മന്ത്രാലയങ്ങളിലെ ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.
Also Read: മുഴുവന്‍ വിവിപാറ്റും എണ്ണണമെന്ന് ഹര്‍ജി; സുപ്രീംകോടതി അടുത്തയാഴ്‌ച വാദം കേള്‍ക്കും
