ന്യൂഡൽഹി : മദ്യനയ അഴിമതിക്കേസിൽ ഡൽഹി മുഖ്യമന്ത്രി അരവിന്ദ് കെജ്‌രിവാൾ എൻഫോഴ്‌സ്‌മെൻ്റ് ഡയറക്‌ടറേറ്റിന് മുൻപിൽ ഇന്ന് ഹാജരാകില്ല. സമൻസ് നിയമവിരുദ്ധമാണെന്ന് അദ്ദേഹം പറഞ്ഞു. ഇതോടെ എട്ടാമത്തെ സമൻസാണ് കെജ്‌രിവാൾ തളളുന്നത്.
അതേസമയം മാർച്ച് 12 ന് ശേഷമുളള ഏതെങ്കിലും ദിവസം വീഡിയോ കോൺഫറൻസിങ് വഴി ഹിയറിംഗിന് ഹാജരാകാമെന്ന് അന്വേഷണ ഏജൻസിയെ അദ്ദേഹം അറിയിച്ചിട്ടുമുണ്ട്. ഡൽഹി എക്സൈസ് പോളിസി 2021-22 കേസിലെ ക്രമക്കേടുകളുമായി ബന്ധപ്പെട്ട കള്ളപ്പണം വെളുപ്പിക്കൽ കേസില്‍ ഫെബ്രുവരി 27നാണ് ഒടുവില്‍ ഇഡി, മുഖ്യമന്ത്രിയും ആം ആദ്‌മി പാർട്ടി കൺവീനറുമായ കെജ്‌രിവാളിന് സമൻസ് അയച്ചത്.
മാർച്ച് 4 ന് ഹാജരാകാൻ ഇഡി അദ്ദേഹത്തോട് ആവശ്യപ്പെട്ടിരുന്നു. നേരത്തെ നല്‍കിയ സമൻസുകളെല്ലാം നിയമവിരുദ്ധവും രാഷ്‌ട്രീയ പ്രേരിതവുമാണെന്നാണ് കെജ്‌രിവാൾ പറഞ്ഞത്. കൂടാതെ ഈ വിഷയത്തിൽ അന്വേഷണ ഏജൻസി ഇതിനകം കോടതിയെ സമീപിച്ചതിനാൽ സമൻസ് അയയ്ക്കുന്നത് നിർത്തി കോടതിയുടെ തീരുമാനത്തിനായി കാത്തിരിക്കണമെന്ന് എഎപി ഇഡിയോട് ആവശ്യപ്പെടുകയും ചെയ്‌തിരുന്നു.
