ബംഗളൂരു: ആമസോൺ പാക്കേജ് തുറന്നപ്പോൾ ജീവനുള്ള വിഷപാമ്പിനെ ലഭിച്ച ദുരവസ്ഥ വെളിപ്പെടുത്തി ബെംഗളൂരുവിലെ ദമ്പതികൾ. സർജാപൂരിൽ നിന്നുള്ള ഐടി പ്രൊഫഷണലുകളായ ദമ്പതികൾക്കാണ് ഓർഡർ ചെയ്‌ത സാധനത്തിന് പകരം മൂർഖൻ പാമ്പിനെ ലഭിച്ച ഭയപ്പെടുത്തുന്ന അനുഭവമുണ്ടായത്. പാർസൽ ബോക്‌സ് ഒട്ടിക്കാൻ ഉപയോഗിച്ച ടേപ്പിനുള്ളിൽ കുടുങ്ങിയ നിലയിലായിരുന്നു പാമ്പെന്ന് ഇരുവരും പറയുന്നു.
പാക്കേജ് അൺബോക്‌സ് ചെയ്യുന്നതിന്‍റെ വീഡിയോ സമൂഹ മാധ്യമങ്ങളിൽ വൈറലാണ്. എക്‌സ്‌ബോക്‌സ് കൺട്രോളർ ആയിരുന്നു ഇവർ ആമസോണിൽ നിന്നും ഓർഡർ ചെയ്‌തത്. ഡെലിവറി പാർട്‌ണർ നേരിട്ടാണ് തങ്ങൾക്ക് പാക്കേജ് കൈമാറിയതെന്നും ഇവർ പറഞ്ഞു. മുഴുവൻ ദൃശ്യങ്ങളും ക്യാമറയിൽ പകർത്തിയിട്ടുണ്ടെന്നും സംഭവത്തിൽ ദൃക്‌സാക്ഷികളുണ്ടെന്നും ദമ്പതികൾ പ്രസ്‌താവനയിൽ അവകാശപ്പെട്ടു.
അതേസമയം സംഭവത്തെ കുറിച്ച് കമ്പനി അന്വേഷിക്കുകയാണെന്ന് ആമസോൺ ഇന്ത്യ വക്താവ് പ്രതികരിച്ചു. 'ഞങ്ങളുടെ ഉപഭോക്താക്കൾ, ജീവനക്കാർ, സഹകാരികൾ എന്നിവരുടെ സുരക്ഷയാണ് ഞങ്ങൾ മുൻഗണന നൽകുന്നത്. ഉപഭോക്താക്കൾക്ക് വിശ്വസനീയമായ ഒരു ഷോപ്പിങ് അനുഭവം നൽകുന്നതിന് ഞങ്ങൾ കഠിനമായി പരിശ്രമിക്കുന്നു.
അവർക്ക് കാര്യങ്ങൾ ശരിയായ നിലയിൽ നടക്കുക എന്നത് ഞങ്ങളുടെ പ്രതിബദ്ധതയാണ്. എല്ലാ ഉപഭോക്തൃ പരാതികളും ഞങ്ങൾ ഗൗരവമായി കാണുന്നു. ഈ സംഭവം അന്വേഷിക്കുകയാണ്'- വക്താവ് വ്യക്തമാക്കി.
ഉപഭോക്താവിനുണ്ടായ അസൗകര്യത്തിൽ ഖേദം പ്രകടിപ്പിച്ച് ആമസോൺ എക്‌സിൽ പോസ്റ്റ് ചെയ്‌തിട്ടുണ്ട്. സംഭവം പരിശോധിക്കുമെന്നും തങ്ങളുടെ ടീം ഉടൻ തന്നെ ഉപഭോക്താവുമായി ബന്ധപ്പെടുമെന്നും ആമസോൺ പോസ്റ്റിൽ വ്യക്തമാക്കി.
അതേസമയം, തങ്ങൾക്ക് പൂർണമായ റീഫണ്ട് ലഭിച്ചതായി ദമ്പതികൾ പറഞ്ഞു. എന്നാൽ ഇത് വ്യക്തമായും ആമസോണിൻ്റെ അശ്രദ്ധയും അവരുടെ മോശം ഗതാഗതം/വെയർഹൗസിങ് ശുചിത്വം, മേൽനോട്ടം എന്നിവ മൂലം സംഭവിച്ച സുരക്ഷ ലംഘനമാണെന്നും അവർ ആരോപിച്ചു.
