ममतांच्या 'स्कूटी'ने नंदीग्राममध्येच पडायचं ठरवलंय, तर त्याला आम्ही काय करणार? - पंतप्रधान मोदी

पश्चिम बंगाल विधानसभा निवडणुकीसाठी, पंतप्रधान नरेंद्र मोदी यांची पहिली प्रचारसभा आज पार पडली. कोलकात्याच्या ब्रिगेड मैदानात झालेल्या या सभेत मोदींनी ममता बॅनर्जी यांच्यावर निशाणा साधला. इंधन दरवाढीविरोधात आंदोलन करण्यासाठी ममतांनी गेल्या आठवड्यात स्कूटी चालवली होती. याबाबत मोदी म्हणाले, की काही दिवसांपूर्वी तुम्ही जेव्हा स्कूटी चालवत होता, तेव्हा सर्व लोक तुमच्यासाठी प्रार्थना करत होते. तुम्ही खाली पडून तुम्हाला लागू नये अशी प्रार्थना सर्व करत होते. नशीब तुम्ही खाली पडला नाही, नाहीतर ज्या राज्यात ती स्कूटी बनवण्यात आली त्या राज्यालाच तुम्ही आपले शत्रू घोषित केले असते. बरं झालं तुम्ही तेव्हा पडला नाहीत. मात्र, तुमची स्कूटी भवानीपूरला जाण्याऐवडी नंदीग्रामकडे वळालेली दिसते. आता आम्ही तर तसं सर्वांच्याच भल्याचा विचार करतो. मात्र जर तुमच्या स्कूटीने नंदीग्राममध्येच पडायचं ठरवलंय, तर त्याला आम्ही काय करणार? अशी टीका मोदींनी बॅनर्जी यांच्यावर केली..