टोरंटो : कोरोनामुळे जगभरात अनेक नागरिकांचे बळी गेल्यामुळे कोरोनाची चांगलीच दहशत पसरली आहे. मात्र महिलांपेक्षा कोरोना रुग्ण असलेल्या पुरुषांना मधुमेह होण्याचा धोका सर्वाधिक असल्याचा दावा संशोधकांनी केला आहे. त्यासह रुग्णालयात दाखल असलेल्या कोरोना बाधित पुरुषांना इतर नागरिकांच्या तुलनेत मधुमेहाचा धोका दुप्पट असल्याचेही या संशोधकांनी स्पष्ट केले आहे. जगभरातील 20 पैकी एका जणाला मधुमेहाने ग्रासल्याचेही या संशोधनात नमूद करण्यात आले आहे.
कोरोनामुळे वाढतो मधुमेहाचा धोका : कोरोनामुळे रुग्णालयात दाखल असलेल्या पुरुषांना मधुमेहाचा धोका इतर नागरिकांच्या तुलनेत दुपटीने असल्याचा दावा ब्रिटिश कोलंबिया विद्यापीठातील संशोधकांनी केला आहे. या संशोधकांनी केलेले हे संशोधन जामा नेटवर्क ओपनमध्ये प्रकाशित झाले आहे. या संशोधनात तब्बल 3 ते 5 टक्के नागरिकांना कोविडमुळे मधुमेहाची सुरुवात झाल्याचे आढळून आल्याचा दावा या संशोधकांनी केला आहे. SARS CoV 2 संसर्ग मधुमेहाशी संबंधित आहे. कोरोनाचे संक्रमण मधुमेहाचा धोका वाढवण्यास कारणीभूत ठरतात. कोविड-19 संसर्ग पोस्टअॅक्युट टप्प्यात रक्तातील ग्लुकोजचे नियमन करणाऱ्या अवयव प्रणालींशी संबंधित असल्याचा दावा ब्रिटिश कोलंबिया विद्यापीठातील संशोधक नावेद जांजुआ यांनी केला आहे.
रुग्णांना मधुमेह होण्याची शक्यता आहे तिप्पट : कोरोनामुळे अनेक नागरिकांना रुग्णालयात उपचार घ्यावे लागले आहेत. मात्र अतिदक्षता विभागात दाखल करण्यात आलेल्या रुग्णांना मधुमेह होण्याची शक्यता तिप्पट असल्याचा दावा संशोधक जंजुआ यांनी केला. कोविड-19 ची लागण झालेल्या रुग्णांची मोठी संख्या लक्षात घेऊन मधुमेहाचे रुग्ण लोकसंख्येच्या खूप मोठ्या पातळीवर जाऊ शकतात. त्यामुळे आरोग्यसेवेवर परिणाम होऊ शकतो. कोविडसाठी पीसीआर चाचणी घेतलेल्या 6 लाख 29 हजार 935 नागरिकांच्या या संशोधकांनी नोंदी तपासल्या. त्यामध्ये कोरोना विषाणूंसाठी सकारात्मक चाचणी घेतलेल्या नागरिकांना एका वर्षात मधुमेह होण्याची शक्यता 17 टक्के जास्त असल्याचा दावाही या संशोधकांनी केला आहे.
हेही वाचा - Fruit Vegetables Lower Miscarriage Risk : गरोदरपणात फलाहारामुळे गर्भपाताचा धोका होतो कमी, जाणून घ्या फायदे
