यवतमाळ - जिल्ह्यातील राळेगाव मधील झोटींगधरा शाळेचे छत पाच वर्षापूर्वी वादळात कोसळले. आज पाच वर्षे उलटून गेले तरी अजूनही कोणी लक्ष दिलेले नाही. पण अशा परिस्थितीतही या शाळेतील शिक्षिका एकच वर्गखोली आणि व्हरांड्यात विद्यार्थ्यांना शिक्षणाचे धडे देत आहेत.
झोटींगधरा हे गाव शंभर टक्के आदिवासी असणारे कोलाम समाजातील लोकवस्तीचे गाव आहे. इथे वर्ग एक ते चार पर्यंत 30 विद्यार्थी शिक्षण घेतात. आदिवासी विद्यार्थ्यांना शिक्षणाच्या प्रवाहात आणून त्यांचा शैक्षणिक विकास व्हावा या दृष्टीने जिल्हा परिषदेने शाळा उघडल्या खऱ्या, मात्र शाळेची अवस्था कशी आहे याकडे वर्षानुवर्षे कोणीच पाहत नाही. झोटींगधरा शाळेचे छत पाच वर्षापूर्वी वादळात उडून गेले. वारंवार तक्रार, अर्ज, विनंत्या करूनही या शाळेकडे कोणीही लक्ष दिले नाही. आता या शाळेच्या वर्गखोली मध्ये 7 ते 8 फूट उंच झाड तयार झाले आहे. त्यामुळे इयत्ता पहिली ते चौथीच्या विद्यार्थ्यांना एकाच वर्गखोलीत आणि व्हरांड्यात शिक्षणाचे धडे घ्यावे लागत आहेत.
शाळेत विद्यार्थ्यांना शिकवण्यासाठी दोन शिक्षिका आहेत. शाळेचे छत पडल्यानंतर ते दुरुस्त करून द्या, म्हणून अनेकदा जिल्हा परिषदेच्या अधिकाऱ्यांना, शिक्षण अधिकाऱ्यांना, पंचायत समिती राळेगाव यांना यासंदर्भात माहिती दिली. अनेकवेळा पत्रव्यवहार केला. मात्र त्यावर कुठलीही कारवाई झाली नाही. यामुळे उन्हाळा असो, की पावसाळा विद्यार्थ्यांना एकत्र एकाच वर्गात आणि व्हरांड्यात शिक्षण घ्यावे लागते, असे येथील शिक्षिकांनी सांगितले.
शाळेचे छत उडाले ते दुरुस्ती न करता पाच वर्षे झाली. मात्र शाळेसाठी वॉल कंपाऊंड तयार व्हावे म्हणून विटा मागविण्यात आल्या आहेत. त्यामुळे आता विद्यार्थ्यांना वर्गखोली हवी की वॉल कंपाऊंड ? हे आता शिक्षण विभागाला कोण सांगणार, हा खरा प्रश्न आहे.
