यवतमाळ - विधानपरिषदेची पोटनिवडणूक अंतिम टप्प्यात आली आहे. निवडणुकांमध्ये मतांच्या विभाजनाचे राजकारण केले जाते. शिवाय उमेदवारांना पळवून राजकिय गणित जुळवले जातात. त्यामुळे आपल्या मतदारांना सुरक्षितस्थळी हलवण्याची पद्धत सुरू झाली आहे. महाविकास आघाडी आणि भाजपच्या मतदारांना देखील आलिशान ट्रॅव्हल्सने वेगवेगळ्या ठिकाणी परिवारासह सहलीला रवाना करण्यात आले आहे.
यवतमाळ विधानपरिषद निवडणुकित महाविकास आघाडीकडून शिवसेनेचे दुष्यंत चतुर्वेदी रिंगणात आहेत. तर त्यांच्या विरोधात भाजपने सुमित बाजोरिया यांना उमेदवारी मिळाली आहे. दोन्ही उमेदवारांमध्ये मोठी चुरस निर्माण झाली आहे. या निवडणुकीत एकूण 489 मतदार असून महाविकास आघाडीकडे 250 पेक्षा अधिक मतदार असल्याचा दावा करण्यात आला आहे. तर भाजपकडून देखील 275 मतदार असल्याचे सांगण्यात येत आहे. मतदार फुटण्याच्या भीतीने आज भाजपने अनेक ठिकाणच्या नगरसेवक आणि इतर मतदारांना पेंचला जंगल सफारीसाठी पाठवण्यात आल्याची माहिती आहे. भाजपचे सर्व नगरसेवक 30 जानेवारी पर्यंत सहलीवर असणार आहे. त्यानंतर 31 जानेवारीला नागपूर येथे या सर्व सहलीला गेलेल्या मतदारांना एकत्रित करून मतदानासाठी पाठविले जाणार आहे.
भाजप आणि महाविकास आघाडी या दोन्ही उमेदवारांना मतदार फुटण्याची भीती आहे. शिवाय घोडेबाजाराची सुद्धा शक्यता नाकारता येत नाही. त्यामुळे मतदारांना सहलीला पाठवण्याचा फंडा उपयोगात आणला जात आहे. भाजप उमेदवाराबद्दल अनेक अफवा पसरवल्या जात आहे. अफवांवर विश्वास ठेवू नका, बाहेरून आलेले उमेदवार बाहेरच राहतील आणि आपल्या गावाला परत जातील, अशी अप्रत्यक्ष टीका महाविकास आघाडीच्या उमेदवारावर भाजपचे नेते माजी मंत्री आ. मदन येरावार यांनी केली आहे. असे असले तरी निवडणुकीत नेमकी कोण बाजी मारणार हे निवडणूक निकालानंतरच स्पष्ट होईल.
