पूजा चव्हाण प्रकरणी वानवाडी पोलीस ठाण्याचे पथक यवतमाळ जिल्हा रुग्णालयात दाखल

पुणे येथील पूजा चव्हाण आत्महत्या प्रकरणात वानवाडी पोलीस ठाण्याचे पथक यवतमाळ येथील जिल्हा रुग्णालयात दाखल झाले आहे.

यवतमाळ - पुणे येथील पूजा चव्हाण आत्महत्या प्रकरणात वानवाडी पोलीस ठाण्याचे पथक यवतमाळ येथील जिल्हा रुग्णालयात दाखल झाले आहे. मृतक पूजा चव्हाण हिने या जिल्हा रुग्णालयात खरोखरच उपचार घेतले का? या बाबतची तपास हे पथक करणार आहे. आज सायंकाळीच्या सुमारास हे पथक आले असून त्याबाबतची साणा यवतमाळ येथील शहर पोलीस ठाण्यात नोंद करण्यात आलेली आहे.

अधिष्ठाता यांच्याकडेही मागीतली माहिती-

पुणे येथील वानवाडी पोलीस ठाण्याचे पोलीस निरीक्षक जयवंत जाधव यांच्यासह चारजण आल्याची माहिती आहे. त्याबाबतची माहिती अधिष्ठाता डॉ. मिलिंद कांबळे यांनाही माहिती विचारण्यात आली आहे. सदर तरुणीच्या मृत्यू पुणे येथे झाला असून 2 ते 5 फेब्रुवारीच्या दरम्यान तिने या जिल्हा रुग्णालयात उपचार घेतले का? केव्हा घेतले याचा तपास करण्यात येणार आहे. त्यामुळे आता या तपासात काय बाबी पुढे येतात याकडे सर्वांचे लक्ष लागले आहे.

काय आहे प्रकरण -

पुण्यातील हडपसर येथील एका सोसायटीच्या तिसऱ्या मजल्यावरून पूजा चव्हाण या 22 वर्षीय तरुणीने उडी घेत आत्महत्या केली. याबाबतची तक्रार वानवडी पोलीस ठाण्यात दाखल करण्यात आलेली आहे. त्यानंतर तिच्या आत्महत्या प्रकरणाशी कथितरित्या निगडीत असलेल्या काही ऑडिओ क्लिपही व्हायरल झाल्या आहेत. भाजपच्या महिला नेत्या चित्रा वाघ यांनी संपूर्ण घडामोडी आणि समोर येणाऱ्या माहितीच्या आधारावर शिवसेनेचे मंत्री संजय राठोड यांना जबाबदार धरत कारवाईची मागणी केली. पूजा चव्हाण ही मुळची बीड जिल्ह्यातील परळीची रहिवासी आहे. ती पुण्यात स्पोकन इंग्लिशच्या क्लाससाठी गेली होती, अशी माहिती समोर येत आहे.

हेही वाचा- समाज माध्यमांनी आमची बदनामी थांबवावी; पूजाच्या वडीलांचे आवाहन