यवतमाळ - पंतप्रधान नरेंद्र मोदी शनिवारी (१६ फेब्रुवारी) महिला बचत गटांच्या महिला सदस्यांना मार्गदर्शन करण्यासाठी पांढरकवडा येथे येणार आहेत. त्यांच्या सभेच्या तयारी अंतिम टप्प्यात आली आहे. साधारणत: ३२ एकर परिसरामध्ये ही सभा पार पडणार असून सभास्थळी किमान ३ लाख महिलांना बसण्याची व्यवस्था करण्यात आली आहेत.
नुकतेच विशेष सुरक्षा दलाने (एसपीजी) या मैदानाचा ताबा घेतला असून पोलीस महानिरीक्षक रवींद्र कदम, पोलीस उपमहानिरीक्षक श्रीकांत तरवडे, जिल्हा पोलीस अधीक्षक एम. राज कुमार, जिल्हाधिकारी राजेश देशमुख, यांनी या मैदानाची पाहणी केली. हे सभेचे मैदान व हेलिपॅड परिसर एसपीजीकडे सुपूर्त केला आहे. या विराट सभेकरिता ३० बाय ६० चा मंच उभारण्यात आला आहे. तसेच संपूर्ण ग्राउंडमध्ये ग्रीन मॅट टाकण्यात येणार आहे.
असा असेल पोलीस बंदोबस्त-
मैदानाकडे येण्यासाठी विविध १५ रस्ते असून २ व्हीआयपी रस्ते असणार आहे. मंचावरती १ मोठी एलईडी स्क्रीन तर ग्राऊंडमध्ये नागरिकांच्या सोयीसाठी १० एलईडी स्क्रीन लावण्यात येणार आहेत. सुरक्षिततेच्या दृष्टीकोनातून मागील ३ दिवसांपासून विशेष पोलीस महानिरीक्षक रवींद्र कदम, पोलीस उपमहानिरीक्षक श्रीकांत तरवडे, जिल्हा पोलीस अधीक्षक एम. राज कुमार यांच्यासह ४ अप्पर पोलीस अधीक्षक, २७ पोलीस उपअधीक्षक, ९० पोलीस निरीक्षक, २८० पोलीस उपनिरीक्षक, २१०० पोलीस कर्मचारी यांच्यासह एसपीजी, एनएसजी, एसआयडी, एसआरपी सुरक्षेच्या दृष्टीकोनातून तैनात करण्यात आली आहे.
सभेदरम्यान कुठलेही आंदोलन होऊ नये यासाठी पोलीस प्रशासन कटाक्षाने जिल्ह्यातील आंदोलकांवर बारीक नजर ठेवून आहेत. पांढरकवडा शहराला सध्या पोलीस छावणीचे स्वरूप आले असून प्रत्येक ५० मीटर वरती पोलीस कर्मचारी तैनात करण्यात आला आहेत.
