यवतमाळ - जिल्ह्यात काही दिवसांपासून कोरोनाबाधित रुग्ण वाढीचा वेग मंदावला होता. एवढेच नाही तर 101 पैकी 94 रुग्ण उपचारानंतर बरे होऊन घरीसुध्दा गेले. त्यामुळे जिल्ह्यातील पॉझिटिव्ह रुग्णांची संख्या कालपर्यंत सातवर आली होती. मात्र, बुधवारी नऊ जणांचा रिपोर्ट नव्याने पॉझिटिव्ह आल्याने आता जिल्ह्यात ॲक्टिव पॉझिटिव्ह रुग्णांची संख्या 16 वर पोहोचली आहे. नव्याने पॉझिटिव्ह आलेले हे नऊ रुग्ण पुसद येथील पॉझिटिव्ह रुग्णांच्या अगदी निकटच्या (हाय रिस्क काँटॅक्ट) संपर्कातील असून यापैकी चार दिग्रस, चार पुसद आणि एक जण महागाव येथील आहे.
सद्यस्थितीत ते संस्थात्मक विलगीकरणांतर्गत कोव्हिड केअर सेंटर येथे भरती आहेत. पुसद येथील सुरुवातीच्या पॉझिटिव्ह रुग्णाच्या संपर्कातील एकूण 17 लोकांचे नमुने तपासणीकरिता पाठविण्यात आले होते. यापैकी 9 पॉझिटिव्ह, 6 निगेटिव्ह आणि 2 रिपोर्ट अप्राप्त आहे. तसेच मंगळवारी होडी (ता.पुसद) येथील मृत्यू झालेल्या 55 वर्षीय गौतम कांबळे यांचे नमुने तपासणीकरिता पाठवले असता त्यांचा रिपोर्ट निगेटिव्ह प्राप्त झाला आहे.
सुरुवातीपासून आतापर्यंत शासकीय महाविद्यालयाने एकूण 1847 नमुने तपासणीकरिता पाठविले. यापैकी आतापर्यंत 110 पॉझिटिव्ह, 1716 निगेटिव्ह रिपोर्ट प्राप्त झाले तर 21 रिपोर्ट अप्राप्त आहेत. संस्थात्मक विलगीकरणात 14 जण आणि गृह विलगीकरणात 581 जण आहेत.
कोरोनाबाधित रुग्णसंख्या वाढल्याने तालुक्यातील तसेच ग्रामीण व शहरी भागातील नागरिकांनी आरोग्याच्या दृष्टीने काळजी घ्यावी. शासन आणि प्रशासनाच्या सुचनांचे पालन करावे. कुठेही गर्दी करू नये. अनावश्यक कारणासाठी बाहेर पडू नये. घरातच सुरक्षित रहावे. बाहेर पडल्यास मास्कचा वापर तसेच सोशल डिस्टन्सिंगच्या आदेशाचे काटेकारपणे पालन करावे, असे आवाहन जिल्हाधिकारी एम.डी.सिंह यांनी केले आहे.
