यवतमाळ - शहरातील दारव्हा रोडवरील एका हॉटेलमधील सफाई कर्मचाऱ्याने १० वर्षीय मुलीचा विनयभंग केल्याची घटना घडली. ही मुलगी आपल्या आईवडिलांसोबत लग्नसमारंभासाठी आली असता, हा प्रकार घडला. ही सर्व घटना सीसीटीव्हीमध्ये कैद झाली असून पोलिसांनी आरोपीला ताब्यात घेतले आहे.
अक्षय चांदेकर, असे नराधमाचे नाव आहे. तो गेल्या काही दिवसांपासून हॉटेलमध्ये साफ-सफाईचे काम करतो. पीडित मुलगी आपल्या आईवडिलांसोबत हॉटेलमधील लग्नसमारंभात आली होती. यावेळी या नराधमाने तिला खाऊचे आमिष दाखवून एकांतात नेले. त्यानंतर मुलगी घाबरली असता, तिला जबरदस्तीने उचलून नेत तिचा विनयभंग केला. त्यानंतर मुलगी पळत सुटली आणि तिने हा सर्व प्रकार तिच्या आई-वडिलांना सांगितला.
पीडितेच्या पालकांनी तत्काळ पोलिसांना बोलावून नराधमाला त्यांच्या स्वाधीन केले. पोलिसांनी सीसीटीव्ही फुटेज ताब्यात घेतले असून पुढील तपास शहर पोलीस ठाण्याचे पोलीस करीत आहेत.
