यवतमाळ - जिल्ह्याची अर्थव्यवस्था कृषी क्षेत्रावर आधारीत आहे. निसर्ग, पाणी आदी गोष्टी आपल्या हाती नसल्या तरी योजनांची प्रभावीपणे अंमलबजावणी करण्यावर कृषी विभागाचा भर असला पाहिजे. खरीप हंगामाला सुरुवात होत आहे. त्यामुळे शेतकऱ्यांना वेळेवर दर्जेदार बियाणे आणि खते उपलब्ध करून देण्याचे नियोजन कृषी विभागाने तात्काळ करावे, अशा सूचना पालकमंत्री मदन येरावार यांनी दिल्या.
जिल्हाधिकारी कार्यालयात कृषी विभागाच्यावतीने आयोजित जिल्हास्तरीय खरीप हंगामपूर्व आढावा बैठकीत ते बोलत होते. यावेळी आमदार ख्वाजा बेग, आमदार मनोहर नाईक, जि.प.मुख्य कार्यकारी अधिकारी जलज शर्मा, विभागीय कृषी सहसंचालक सुभाष नागरे, जिल्हा कृषी अधिकारी नवनाथ कोळपकर आदी उपस्थित होते.
कृषी विभाग हा गावस्तरावरील शेतकऱ्यांपर्यंत पोहचणारा घटक आहे, असे सांगून पालकमंत्री मदन येरावार म्हणाले, कृषी विभागाच्या योजना केवळ कागदावर ठेवू नका. शेतकऱयांना हंगामात बियाणे व खतांची कमतरता जाणवणार नाही, याची काळजी घ्या. माती परिक्षणासंदर्भात जमिनीचा पोत पाहून शेतकऱयांना मार्गदर्शन करा. जलयुक्त शिवार, धडक सिंचन, शेततळ्यांमुळे शेतकऱयांना लाभ झाला आहे. या गोष्टींमध्ये सातत्य ठेवण्यासाठी कृषी विभागाने अधिक जोमाने काम करावे. पीक विमा योजनेत सर्व शेतकऱयांना सहभागी करण्याचे प्रयत्न करा असेही ते म्हणाले.
खरीप हंगामाकरिता 9 लाख 10 हजार 505 हेक्टरवर नियोजन करण्यात आले आहे. यात सोयाबीन 2 लाख 77 हजार 842 हेक्टरवर, कापूस 4 लाख 58 हजार 856 हेक्टर, तूर 1 लाख 31 हजार 191 हेक्टर, ज्वारी 15 हजार 875 हेक्टर, उडीद 7 हजार 34 हेक्टर, मूग 8 हजार 668 हेक्टर, मका 220 हेक्टर आणि इतर पिके 10 हजार 819 हेक्टर यांचा समावेश आहे.
साडे पंचवीस लाख बीटी बियाणे
जिल्ह्यात सोयाबीनची मागणी 1 लाख 56 हजार 286 क्विंटल असून आतापर्यंत 75 हजार क्विंटल बियाणे उपलब्ध झाले आहे. तर कपाशीच्या 25 लाख 44 हजार 111 पॅकटची मागणी नोंदवण्यात आली आहे. जिल्ह्यासाठी एकूण खतांची मागणी 1 लाख 90 हजार 707 मेट्रीक टन असून यापैकी 1 लाख 33 हजार 864 मेट्रीक टन खतांची उपलब्धता झाली आहे. यात युरिया, एमओपी, एसएसपी, कॉम्प्लेक्स, एनपीकेएस या खतांचा समावेश आहे.
