यवतमाळ - मुख्यमंत्री देवेंद्र फडणवीस यांच्या महाजनादेश यात्रेचे जिल्ह्यातील राळेगाव तालुक्यातील वडकी येथे जोरदार स्वागत करण्यात आले. त्यानंतर ही महाजनादेश यात्रा राळेगाव येथे पोहोचली. यावेळी यात्रेतील रथावर चढून मुख्यमंत्री आणि राज्याचे आदिवासी विकास मंत्री अशोक उईके यांनी रस्त्याच्या दुतर्फा जमलेल्या जनसमुदायाला अभिवादन केले.
ही यात्रा चंद्रपूर जिल्ह्यातून आली असून वनी मतदारसंघातील कोसारा वडकी मार्गे राळेगाव मतदार संघातील येथील न्यू इंग्लिश हायस्कूलच्या पटांगणामध्ये रात्री साडेसात वाजता दाखल झाली. यावेळी उपस्थित भाजप कार्यकर्त्यांनी भारत माता की जय, वंदे मातरम अशा घोषणा दिल्या.
या महाजनादेश यात्रेचे पुढे कळंब येथे स्वागत करण्यात येणार असून यवतमाळ येथे जाहीर सभेला संबोधित करणार आहे. तर १ ऑगस्ट पासून गुरुकुंज मोझरी येथून मुख्यमंत्र्यांची ही महाजनादेश यात्रा सुरु झाली आहे.
