यवतमाळ - दारव्हा तालुक्यातील देऊळगाव (वळसा ) येथे तेरवीचे जेवण केल्यानंतर ३० जणांना विषबाधा झाली आहे. ही घटना बुधवारी (१ मे) दुपारी घडली. विषबाधेनंतर रुग्णांना येथील उपजिल्हा रुग्णालयात उपचारासाठी दाखल करण्यात आले.
देऊळगाव येथे एका परिवाराकडे तेरवीचा कार्यक्रम होता. याठिकाणी काही जणांनी भर उन्हात जेवण केले. तर काहींनी संध्याकाळी तेच जेवण घेतले. त्याचबरोबर बॅरलचे पाणी संपल्याने गावातील विहिरीचे पाणी पिण्यात आले. त्यानंतर २५ ते ३० जणांना उलटी व जुलाबचा त्रास सुरू झाला. त्यामुळे सर्वांना दारव्हा येथील उपजिल्हा रुग्णालयात उपचारासाठी दाखल करण्यात आले.
यासंदर्भात रुग्णालयातील वैद्यकीय अधिकारी कदम आणि खरवडे यांना विचारणा केली असता अन्नातून विषबाधा झाल्याचे म्हणता येणार नाही. हा त्रास ऊन लागल्यामुळे तसेच दुषित पाण्याने होऊ शकते. कारण असे असते तर तेरवीच्या जेवणाने सर्वांनाच त्रास झाला असता. त्यामुळे हा प्रकार वेगवेगळ्या कारणाने झाला असू शकतो, असे त्यांनी सांगितले.
सायंकाळी ७ वाजेपर्यंत काही रुग्णांना डिस्चार्ज करण्यात आले. तर अद्याप ८ ते १० रुग्णांवर दारव्हा येथील उपजिल्हा रुग्णालयात उपचार सुरू आहे.
