बुलडाणा - जिल्ह्यातील मलकापूर शहरात आज (मंगळवारी) वेगवेगळ्या ठिकाणी 2 मृतदेह आढळल्याने शहरात एकच खळबळ उडाली आहे. मृतापैकी एकाची ओळख पटली असून प्रेमचंद सुरेशसिंग चौधरी (वय, 28 रा. ग्राम नेवला ता. ईगलास अलीगढ, उत्तर प्रदेश) असे मृताचे नाव आहे. तर दुसरा मृतदेह अनोळखी आहे. याप्रकरणी पोलीस तपास करत आहेत.
मलकापूर शहरातील विश्रामगृह आवारात एक अनोळखी मृतदेह असल्याची माहिती सकाळी पोलिसांना मिळाली होती. त्यानुसार पोलिसांनी घटनास्थळी पंचनामा सुरु केला. त्याचवेळी नांदुरा रोडवरील उंबरनाला परिसरात आणखी एक मृतदेह असल्याची पोलिसांना माहिती मिळाली. यामधील एकाची ओळख पटली असून दुसरा मृतदेह उपजिल्हा रुग्णालयातील शितगृहात ठेवण्यात आला आहे.
पोलिसांनी विश्रामगृह आवारातील मृताचा पंचनामा केला. त्यावेळी मृताच्या उजव्या हातावर प्रेमचंद गोंदलेले असून खिशात सापडलेल्या डायरीतील मोबाईल नंबरवर कॉल करुन त्याचे फोटो व्हॉट्सअपवर पाठवले. त्यावेळी मृताचे नाव प्रेमचंद चौधरी असल्याचे समोर आले. तर नांदुरा रोडवरील उंबरनाला परीसरात 35 वर्षीय अनोळखी व्यक्तीचा मृतदेह आढळला.
या मृतदेहाच्या अंगात राखाडी कलरचा बरमुडा असून गळ्यात भगवान येशू ख्रिस्तांचे लॉकेट आहे. त्यामुळे नातेवाईकांनी ओळख पटवण्यासाठी मलकापूर शहर पोलीस ठाण्याशी संपर्क साधावा, असे आवाहन पोलिसांकडून करण्यात आले आहे.
