वाशिम - संपूर्ण जगात थैमान घातलेल्या कोरोना विषाणूमुळे आत्तापर्यंत अनेक लोकांचा मृत्यू झाला आहे. तर, मागील २२ मार्च पासून संपूर्ण देशामध्ये 'लॉकडाऊन' करण्यात आले आहे. अशातच कोरोना या विषाणूचा प्रादुर्भाव रोखण्यासाठी प्रशासनाच्या सूचनेवरून 'शब-ए-बारात'निमित्त सर्व मुस्लिम बांधवांनी मस्जिद तसेच कब्रस्तानमध्ये न जाता घरीच इबादत केली आहे.
लॉकडाऊन असल्यामुळे तसेच प्रशासनाच्या सूचनेवरून जिल्ह्यातील मौलवी यांनी 'शब-ए-बारात'निमित्त मस्जिद तसेच कब्रस्तानला जाऊ नये, असे आवाहन केले होते. प्रशासनाच्या तसेच मौलवींच्या सूचनेवरून लोकांनी आपल्या घरीच राहून नमाज अदा करून अल्लाह (ईश्वर)ची इबादत केली आहे.
मुस्लिम समाजामध्ये शब-ए-बारात या रात्रीला अनन्यसाधारण महत्त्व आहे. या रात्रीला पूर्ण रात्रभर मुस्लिम समाजातील नागरिक 'अल्लाह'ची इबादत मशिदीमध्ये जाऊन करतात. तसेच कब्रस्तानमध्ये जाऊन आपल्या कुटुंबातील दिवंगत झालेल्या लोकांच्या 'मोक्ष'प्राप्ती करता 'अल्लाह'कडे दुवा (प्रार्थना) मागतात.
मात्र, 'लॉकडाऊन' असल्यामुळे सर्व समाज बांधवांनी घरी ईबादत केली आहे. शब-ए-बारातनिमित्त पोलीस प्रशासनाच्या वतीने जिल्ह्यातील सर्व मुस्लिम समाजातील कब्रस्तानाजवळ बंदोबस्त तैनात करण्यात आला होता.
