वर्धा - वैद्यकीय अभ्यासक्रमाला प्रवेश मिळवून देतो, असे सांगून पावकांना लाखो रुपयांचा गंडा घालण्याचा प्रकार वर्ध्यात घडला आहे. या प्रकरणात दोन पालकांना तब्बल 28 लाखांचा गंडा घालण्यात आला आहे. हा प्रकार केवळ शहरात किंवा राज्यात नाही तर, देशभरात अशी हाय प्रोफाइल दलालांची टोळी सक्रिय आहे.
वर्धा मेडीकल प्रवेश घोटाळा...
वैद्यकीय अभ्यासक्रमाला महाविद्यालयात प्रवेश मिळण्याकरीता नीटची परीक्षा द्यावी लागते. अशा परीक्षेत कमी गुण मिळाले की पालकवर्ग लाखो रुपये घेऊन खासगी कॉलेजच्या दारात उभे राहतात. अशा गरजू पालकांच्या मागावर हे दलाल असतात. वर्ध्यातही असेच प्रकरण घडले आणि 28 लाखांना गंडा घालण्यात दलाल यशस्वी झाले.
गणपती उत्सवापूर्वीच शिक्षकांच्या खात्यांवर होणार पगार जमा
नेमका हा प्रकार सुरू कसा होतो...
मध्यप्रदेशच्या अलीराजपुरचे डॉ. राजेश मिश्रा यांचा मुलगा गौरव आणि जबलपूरचे डॉ. राजेश्वरनाथ पांडे यांच्या मुलाने मेडीकल प्रवेशाकरीता परीक्षा दिली. शासकीय कोट्यातून प्रवेश मिळावे यासाठी लागणारे गुण त्यांना मिळाले नाहीत. पेशाने दोघेही स्वतः डॉक्टर असल्याने मुलांनीही वारसा चालवत डॉक्टर व्हावे यासाठी धडपड सुरू केली. कमी गुण मिळाल्याने आदित्य रॉय आणि तिवारी नामक दोघांचा फोन आले. सेवाग्रामला सेमी गव्हरमेंटमध्ये प्रवेश मिळवून देतो, यासाठी तगादा लावला. अखेर डॉक्टर होण्याचे स्वप्न पूर्ण होणार असल्याने डॉ. राजेश मिश्रा यांनीही पैशांची जुळवाजुळव केली. मागील काही वर्षातील जमापुंजी 8 लाख आणि उर्वरित 10 लाख हे 2 टक्के व्याजाने काढले आणि ठरल्या प्रमाणे पैसे दिले. असाच प्रकार राजेश्वरनाथ पांडे यांच्या सोबतही घडला आहे. त्यांनीही 10 लाख रूपये दिले. अशाच प्रकारे तिसरा व्यक्तीही फसणार होता, मात्र या प्रकरणाचे बिंग फुटले.
पैसे दिल्यानंतर प्रवेश मिळणार म्हणून आनंदात असतानाच एक संदेश व्हॅटसअ‌ॅपवर आला. यात लिहिलेला संदेशही दुःखद होता. 16 ऑगस्टला आलेला संदेशात मोठ्या प्रमाणात आलेल्या पावसामुळे मॉप अप राऊंड पुढे ढकलण्यात आल्याचे सांगितले. मात्र, यानंतर जो फोन बंद झाला तो बंदच राहिला. रॉय आणि तिवारी यांचा यानंतर संपर्क झालाच नाही. अखेर संपर्क न होत असल्याने या पालकांनी सेवाग्राम पोलीस स्टेशनला येऊन फसवणुकीची तक्रार दिली.
सेवाग्रामचे कस्तुरबा हेल्थ सोसायटी अंतर्गत महात्मा गांधी इन्स्टिट्युट ऑफ मेडिकल सायन्स येथे शासकीय कोट्यातून म्हणजेच नीट परीक्षेच्या गुणांकन आणि मेरिटच्या आधारावर प्रवेश दिला जातो. पालकांनी ऍडमिशन घेताना चौकशी केली असती तर ही फसवणूक झाली नसती. यामुळे पालकांनी यापुढे काळजी घ्यावी आणि अशा फसवणुकीला बळी पडू नये, असे आव्हान डॉ. नितीन गगणे यांनी केले आहे.
पैश्याचा व्यवहार कसा आणि कुठे झाला...
मिश्रा यांना सुरुवातीला नागपूरला बोलावण्यात आले. त्यांच्याकडून १० लाख रोख, कस्तुरबा हेल्थ सोसायटीच्या नावे २ लाख ९४ रुपयांचा चेक मागितला. त्यांना खासगी वाहनाने सेवाग्राम रुग्णालयाच्या परिसरात आणल्यानंतर एक दालनातून बाहेर आलेल्या २ जणांनी पैसे घेतले. त्यावेळी रक्कम घेतल्याबाबत एक साध्या कागदावर सही शिक्का देऊन पैसे मिळल्याचे लिहून देण्यात आले. त्यानंतर पुन्हा पैसे घेतले गेले. असाच प्रकारे या दोघांची फसवणूक करण्यात आली.
पोलिसांनी आता फसवणुकीचा गुन्हा दाखल करत संबंधितांचा शोध सुरू केला आहे. यात हे नेमके हे कोण आहेत, यांना पालकांचे मोबाईल क्रमांक कसे मिळतात. अशा अनेक प्रश्नांची उत्तरे शोधणे गरजेचे आहे. फसवणूक करणारे गुन्हेगार हे बाहेर राज्यातील असल्याचा पोलिसांचा अंदाज आहे. या प्रकरणाचा लवकरच छडा लावला जाईल, अशी माहिती सेवाग्रामचे ठाणेदार संजय बोठे यांना दिली आहे.
वैद्यकीय प्रवेशासाठी नीट ही परीक्षा घेतली जाते. या परिक्षेच्या माध्यमातून प्रकिया पारदर्शक ठेवण्याचा प्रयत्न होतो. पण या प्रकियेत पालक आणि विद्यार्थी यांचे दूरध्वनी क्रमांक अशा दलालांकडे जातातच कसे, हा प्रश्न आहे. हा प्रकार केवळ वर्ध्यात झाला असेही म्हणता येणार नाही, कारण याचा आवाका महाराष्ट्रसह इतर अनेक राज्यात असू शकतो.
