वर्धा - जिल्ह्यातील आर्वी, देवळी, हिंगणघाट आणि वर्धा विधानसभा मतदारसंघाच्या निकालासाठी अवघे काही तास शिल्लक आहेत. महाराष्ट्र राज्य विधानसभा निवडणूकीच्या मतमोजणीला सुरुवात होणार असून, वर्ध्यातील सर्व मतमोजणी केंद्रांमध्ये 14 टेबलांवर मतमोजणी होणार आहे.
जिल्हा प्रशासन मतमोजणीला सज्ज झाले असून, प्रचंड पोलीस बंदोबस्तात होणा-या मतमोजणीतून चार मतदारसंघातील 47 उमेदवारांच्या भाग्याचा फैसला होणार आहे. मतमोजणीसाठी प्रत्येक विधानसभा क्षेत्रासाठी 14 टेबल असणार आहेत. वर्धा विधानसभेची मतमोजणी एफसीआय गोडाऊन वर्धा, देवळी विधानसभेची मतमोजणी तहसील कार्यायात, हिंगणघाटची उपविभागीय अधिकारी कार्यालयात तर आर्वी विधानसभेची मतमोजणी शासकीय तंत्र निकेतन महाविद्यालयात होणार आहे. यासाठी प्रशासनाने पूर्ण व्यवस्था केली आहे.
विधानसभेच्या मतमोजणीस त्या-त्या ठिकाणी सकाळी 8 वाजता सुरवात होणार असून मतदान केंद्राच्या संख्येनुसार फेऱ्या होणार आहेत. यात वर्धा (25 फेऱ्या), देवळी (24 फेऱ्या), हिंगणघाट (25 फेऱ्या) व आर्वी (22 फेऱ्या) होतील. प्रथम टपाली मतदानाची मतमोजणी होईल, त्यानंतर ईव्हीएम मतमोजणीस सुरुवात होईल. मतमोजणीसाठी प्रती टेबल दोन मतमोजणी अधिकारी व एक सूक्ष्म निरिक्षक असे तीन अधिकारी याप्रमाणे 14 टेबलवर एकुण 42 अधिकारी एका मतदारसंघासाठी तर चार मतदारसंघांसाठी एकूण 168 अधिकारी मतमोजणीचे काम पाहणार आहेत.
मतदार संघनिहाय झालेले मतदान..
आर्वी विधानसभा मतदारसंघ (67.25 टक्के), देवळी विधानसभा मतदारसंघ (63.49 टक्के), हिंगणघाट मतदारसंघ (64.51 टक्के) आणि वर्धा (53.14 टक्के) मतदान झालेले आहे. चारही विधानसभा मतदार संघात एकुण 11 लाख 49 हजार 958 मतदारांपैकी 7 लाख 10 हजार 219 मतदारांनी आपल्या मतदानाचा हक्क बजावला. हा हक्क बजावताना कुठल्या उमेदवारला कौल मतदारांनी दिला हे स्पष्ट होण्यासाठी काही तासांची प्रतीक्षा आता राहिलेली आहे.
हेही वाचा : वर्ध्यात भाजप-काँग्रेसमध्ये तुल्यबळ लढत, कोणाचं पारड राहणार जड?
