वर्धा जिल्ह्यात अवकाळी पावसासह गारपीटीचा तडाखा

वर्धा शहरासोबतच अनेक ठिकाणी ग्रामीण भागातही पावसाच्या सरी बरसल्या आहेत. देवळी तालुक्याच्या रोहणी, शिरपूर, मलातपूर शिवारात काही भागात गारपीटीने झोडपून काढले आहे.

वर्धा - जिल्ह्यातील काही भागाला अवकाळी पावसाने जोरदार तडाखा दिला आहे. यात वर्धा शहरासोबतच अनेक ठिकाणी ग्रामीण भागातही पावसाच्या सरी बरसल्या आहेत. देवळी तालुक्याच्या रोहणी, शिरपूर, मलातपूर शिवारात काही भागात गारपीटीने झोडपून काढले आहे. जवळपास 10 ते 15 मिनिटे छोट्या आकाराची गारं पडली आहे. याचाही फटका गहू, हरभरा पिकांना बसला आहे.

हवामान खात्याने विदर्भात पावसाचा इशारा दिला होता. यात वर्ध्यात दोन दिवसांपासून ढगाळ वातावरण पाहायला मिळाले. गुरुवारी दुपारच्या वेळी देवळी तालुक्यात भागात गारपीट झाले. यामध्ये देवळी तालुक्याच्या रोहणी, विजयगोपाल, मालातपुर, शिरपूर परिसरात गारपीट झाली. गारपिटीने हरभरा आणि गहू पिकाचे नुकसान झाले आहे. १५ मिनिटे परिसरात गारांचा पाऊस पडला. अचानक आलेल्या गारांच्या पावसाने वातावरण थंड झाले. जिल्ह्यात सगळीकडे ढगाळ वातावरण तर काही ठिकाणी पावसाची रिपरिप पाहायला मिळाली.

पिकांचे नुकसान

आजच्या पावसाने रब्बीच्या गहू हरभरा पीकांना फटका बसलाच मात्र खरिपातील हाती लागलेले एकमेव पीक म्हणजे तुरीची गंजीही पाण्यात भिजली असल्याने त्याचेही नुकसान झाले आहे. सेलू तालुक्यातही गहू, हरभरा आणि केळीच्या फळ बागांना याचा फटका बसला आहे.

हेही वाचा - हिंगणघाट जळीतकांड : एप्रिल महिन्यात नोंदवणार 14व्या साक्षीदाराची साक्ष

हेही वाचा - वर्ध्यात कोरोनाच्या पार्श्वभूमीवर पुन्हा संचारबंदी; नागरिकांना काळजी घेण्याचे आवाहन