वर्धा - महात्मा गांधीजींच्या नावाने जागतिक स्तरावर ओळख मिळालेल्या जिल्ह्यात सण १९७५ पासून दारू बंदी आहे. यात दारूवर अंकुश लावण्याचे काम पोलीस विभागाकडून केले जाते. पण, पालकमंत्री चंद्रशेखर बावणकुळे यांच्या आदेशानंतर सक्रिय झालेल्या राज्य उत्पादन शुल्क विभागाने जिल्ह्याच्या इतिहासतील सर्वात मोठा दारूसाठा जप्त केला आहे. कारंजा टोलनाक्यावरून संशयित ट्रकच्या तपासणी दरम्यान ६३ लाख रूपयांच्या बाराशे पेट्यांसह ट्रक, असा एकूण ८३ लाखांचा मुद्देमाल जप्त केला असून दोघांना ताब्यात घेतले आहे. या कारवाईने राज्य उत्पादन शुल्क विभागाचे कौतूक होत आहे.
वर्धा जिल्ह्यात राज्य उत्पादन शुल्क विभागाला नागपूरमार्गे दारू जाणार असल्याची माहिती सूत्रांकडून मिळाली. यासाठी कारंजा येथील टोलनाक्यावर नजर ठेवून असताना एका ट्रकवर पोलिसांना संशय आला. ट्रकमध्ये भुसा असल्याचे सांगण्यात आले. पण, ट्रकचे चाक दबलेला असल्याने नक्कीच वजन जास्त असल्याचा संशयावरून गाडीची पाहणी करण्यात आली. यात उघडपणे भुसा दिसत होता. मात्र, काही पोते हटवत पाहणी करण्यात आली. यावेळी यात दारूच्या पेट्या आढळून आल्या. एक दोन नव्हे तर चक्क १२०० पेट्या विदेशी दारू भुस्याच्या पोत्याआड लपविण्यात आली होती.
यावेळी राज्य उत्पादन शुल्क विभागाच्या पथकाच्या हाती मोठा दारुसाठा लागला. पण, हा दारूचा माल हरियाणा, मध्यप्रदेश आणि अरुणाचल प्रदेशमध्ये विक्रीसाठी होता. परंतु, भुसा असल्याचे भासवून अमरावतीच्या अलीकडे हा साठा जात असल्याचे उत्पादन शुल्क विभागाच्या चौकशीत पुढे आले. नेमकी ही दारू कोणाच्या मालकीची आहे आणि कुठून आली याचा शोध घेण्याचे आव्हान राज्य उत्पादन शुल्क विभागाच्या अधिकाऱ्यावर आहे.
यातील हा दारुसाठा हरियाणा आणि अरुणाचल प्रदेश या २ राज्यात विक्रीसाठी असल्याचे पॅकिंगवर लिखित आहे. यामुळे हा माल दारूबंदी जिल्ह्यात आणून अवैधरित्या विक्री केला जाणार होता की अजून कुठे याचा नेणार होते, याचा शोध घेणे गरजेचे आहे.
ही कारवाई राज्य उत्पादन शुल्क विभागाचे पोलीस अधीक्षक सुभाष बोडके यांच्या मार्गदर्शनाखाली पोलीस निरीक्षक मोहन पाटील यांच्या पथकातील दिलीप वलके, मिलिंद लांबडे, हरिदास सुरजूसे, बंडू घाटूर्ले, शाहू, घुले, बावणे आदींनी कारवाई करत दोघांना गजाआड केले.
ठराविक अंतरानंतर बदलत होता वाहनचालक
वर्ध्याच्या हद्दीत असलेला हा दारूसाठ्याची ज्या ट्रकमध्ये वाहतूक होत होती याचा चालक ठराविक अंतरानंतर बदलत असल्याचे सुद्धा पुढे येत आहे. यामुळे हा नेमका माल कोणाचा याचा शोध घेणे कठीण होणार आहे. भुस्याच्या पोत्यामागे दारूसाठा आणण्याची ही पहिलीच वेळ नक्की नसेल. यामुळे यातील होणारा व्यवसाय कोण आणि केव्हापासून करत आहे. याचा शोध घेणेही तेवढेच महत्वाचे ठरणार आहे.
ती पांढरी गाडी कुठे गायब झाली..?
हा ट्रक नागपूरच्या बाहेरून एका ढाब्यावरुन घेऊन निघालेल्या चालकाला अगोदरच दुसऱ्या चालकाने सूचना दिली होती. 'ये ट्रक मत ले जा, इसमे दुसरा माल है' असे सांगून (आर जे १९ जी ए ९५३२) ट्रक घेऊन निघाला. यावेळी या चालकाचा पांढऱ्या रंगाची एक कार पाठलाग करत असल्याचे लक्षात आले. यामुळे या प्रकरणात ती कार कोणती हे सुद्धा शोधण्याचे काम उत्पादन शुल्क विभागाच्या करमचाऱ्यांना करावा लागणार आहे. अटक करण्यात आलेल्या ट्रकचालकाला हा ट्रक नागपूरपासून काही अंतरावर असणाऱ्या धाब्यावरून पुढे अमरावतीला नेणार होता. यासाठी त्याला पाच हजार रुपये मिळणार होते. पण कुठे हे सांगितले नसल्याने याचा शोध घेतला जाणार आहे.
