वर्धा - पाच वर्षांपूर्वी नरेंद्र मोदीं या फसव्या माणसाने काय काय आश्वासने दिली होती? याचीच आठवण करून देण्यासाठी आलो आहे. अनेक चुकीचे धोरण या ना.. ना.. नाटकी नरेंद्र मोदींनी राबवले, असे म्हणत खासदार राजू शेट्टी यांनी जीभ सावरली. काँग्रेस अडघाडीच्या उमेदवार चारूलता टोकस यांचा प्रचारार्थ राहुल गांधी यांच्या जाहीर सभेचे आयोजन करण्यात आले. यावेळी वर्ध्यातील स्वालंबी मैदानावर ते बोलत होते.
गेल्या २०१४ मध्ये ७ हजार रुपये कापसाला भाव देऊ म्हणाले. मात्र, कापसाची वाट लावली. सोयाबीन तुरीचे तेच हाल झाले. शेतकरी उध्वस्त झाले. शेतकरी मेला. मात्र, व्यापारी विकायला आला की माला-माल झाला, असे धोरण गेल्या ५ वर्षात दिसले. शेतकऱ्यांच्या आत्महत्या दुप्पट झाल्या. त्यांना शेतकऱ्यांचा कडकडाट लागणार, असेही ते म्हणाले.
मी कोल्हापुरी माणूस आहे. लढणारा माणूस आहे. अंगावर आले तर शिंगावर घेणार माणूस आहे. या नरेंद्र मोदींनी विश्वासघात केला. चहा विकणारा माणूस देशाचा पंतप्रधान झाला. आता बदला घ्यायचा असेल तर मत पेटीतून घ्या आणि या चहा विकणाऱ्याला पुन्हा चहा विकायला पाठवा, अशी टीका शेट्टी यांनी मोंदीवर केली.
