रायगड - अरबी समुदात कमी दाबाचा पट्टा निर्माण झाला असून त्याची तीव्रता वाढून चक्रीवादळ तयार होणार आहे. हे चक्रीवादळ पश्चिम समुद्र किनारपट्टीवर घोघवणार असून 3 तारखेला रायगडातील हरिहरेश्वरसह संपूर्ण किनारपट्टीला याचा तडाखा बसणार आहे, अशी माहिती कुलाबा वेधशाळेच्या हवामान तज्ञ शुभांगी भुत्ते यांनी दिली आहे.
कोकण किनारपट्टीवर मुसळधार पाऊस पडणार असल्याचाही अंदाज बांधला आहे. त्यामुळे जिल्हा प्रशासनाकडून खबरदारी म्हणून समुद्र किनारपट्टीतील गावांना आणि नागरिकांना सतर्क राहण्याचे आदेश दिले आहेत. तर जिल्ह्यातील सर्व यंत्रणांनाही सतर्क राहण्याचे सांगितले आहे.
अरबी समुद्रात कमी दाबाचा पट्टा निर्माण झाला असून पुढील 12 तासात अजून मोठया प्रमाणात पट्टा निर्माण होणार आहे. त्यामुळे चक्रीवादळ होण्याची संभावना हवामान खात्याने वर्तवली आहे. चक्रीवादळ हे उत्तर दिशेला असून ताशी 7 किलोमीटर वेगाने पुढे सरकणार आहे. त्यामुळे मुसळधार पाऊस पडणार आहे. तीन तारखेला हे चक्रीवादळ रायगडच्या हरिहरेश्वर समुद्रात सायंकाळी अथवा रात्री धडकणार आहे. असा अंदाज हवामान खात्याने वर्तविला आहे.
चक्रीवादळाच्या या तडाख्याने वाचण्यासाठी जिल्हा प्रशासनाने समुद्रकिनारी गावांना आणि नागरिकांना, मच्छीमाराना सतर्क राहण्याचे आदेश दिले आहेत. तर सर्व शासकीय यंत्रणांनाही सतर्क राहण्याचे आदेश जिल्हा प्रशासनाकडून देण्यात आलेले आहेत.
येणाऱ्या चक्रीवादळाच्या अनुषंगाने जिल्हा प्रशासनाने 22 जणांचे एनडीआरएफ पथक पाचारण केली असून ते अलिबाग येथे दाखल झाले आहे. मच्छीमारी बोटीही समुद्र किनारी लावण्यात आल्या असून समुद्रात जाण्यास बंदी केली आहे. त्यामुळे नागरिकानी कामाशिवाय बाहेर पडू नका असा इशारा जिल्हा प्रशासनाकडून देण्यात आला आहे.
प्रत्येकी 22 जवान असलेले एनडीआरएफचे 2 पथक जिल्ह्यात दाखल झाले आहे. एक टीम अलिबाग व दुसरी श्रीवर्धन येथे तैनात केली आहे. तसेच कोस्ट गार्ड पथक मुरुड येथे तैनात केले आहे
