ठाणे - सोमवार दिनांक २९ एप्रिल रोजी महाराष्ट्रातील चौथ्या टप्प्यातील होणाऱ्या मतदानासाठी संविधानाने दिलेल्या मताधिकाराद्वारे कार्यक्षम उमेदवाराची निवड करून लोकशाही बळकट करावी, असा संदेश बाईक रायडर्सच्या माध्यमातून आज देण्यात आला. ठाणे महानगरपालिका व ठाणे जिल्हाधिकारी कार्यालयाच्या वतीने आयोजित करण्यात आलेल्या जनजागृतीपर बाईक रॅलीला निवडणूक निरीक्षक शैली किष्णानी यांच्या शुभहस्ते ध्वज दाखवून सुरुवात करण्यात आली. आरफोरसी या सामाजिक संस्थेचे सुमारे १०० हून आधिक बाईक रायडर्स या रॅलीत सहभागी झाले होते .
यावेळी उप जिल्हाधिकारी तथा जिल्हा नोडल अधिकारी रेवती गायकर, उपायुक्त संदीप माळवी, सहायक आयुक्त तथा सहायक निवडणूक अधिकारी डॉ. चारूशीला पंडित, सहायक आयुक्त तथा सहायक निवडणूक अधिकारी डॉ. अनुराधा बाबर आदी उपस्थित होते.
"सारे काम छोड दो, सबसे पहिले वोट दो", "बाते अभी अधुरी है, वोट देना जरूरी है", अशा घोषणा देत मतदान हे आपले राष्ट्रीय कर्तव्य असून ते आपण पार पाडले पहिजे आदी जनजागृतीपर संदेश या बाईक रॅलीच्या माध्यमातून देण्यात आले. तसेच २९ एप्रिल रोजी होणाऱ्या मतदानासाठी सज्ज व्हा, असा संदेश देणारा चित्ररथ देखील या रॅलीत सहभागी करण्यात आला होता. दरम्यान गेली ३० वर्षे आपल्या बाईकवरून संपूर्ण महाराष्ट्रभर मतदान जनजागृती करणारे पुण्याचे बापूराव गुंड हेदेखील या बाईक रॅलीत सहभागी झाले होते. ठाणेकरांनी जास्तीत जास्त संख्येने मतदानात सहभागी होऊन मतदानाचा अधिकार बजावावा, असे आवाहन गुंड यांनी मतदारांना यावेळी केले.
कल्याण, ठाणे मतदारसंघात चौथ्या टप्प्यातील मतदान २९ एप्रिल २०१९ रोजी पार पडत असून सर्व निवडणूक यंत्रणा सज्ज झाली आहे. यावर्षी सामान्य नागरिक, दिव्यांगव्यक्ती, तृतीयपंथीय यांनी अधिकाधिक संख्येने मतदान करावे याकरिता स्वीप (सिस्टॅमॅटिक व्होटर एज्युकेशन ऑण्ड इलेक्ट्रोल पार्टिसिपेशन प्रोग्राम) कार्यक्रमाद्वारे विशेष प्रयत्न करण्यात आले आहेत. पथनाट्य, स्वाक्षरी मोहीम, फ्लॅशमॉब, जनजागृतीपर रॅली, व्हीव्हीपॅट मशीन प्रात्यक्षिक आदी उपक्रम राबविण्यात आले आहेत. दिव्यांगाना मतदान केंद्रावर येण्यासाठी सर्व सोयीसुविधा उपलब्ध करून देण्यात आल्या आहेत. पिण्याचे पाणी, प्रसाधनगृह आदींची सोय करण्यात आली आहे.
ठाणे जिल्हाधिकारी कार्यालय येथून या रॅलीला सुरुवात होवून पुढे तलाव पाळी - राम मारुती रोड - गोखले मार्ग - तीन हात नाका - वागळे इस्टेट मार्गे अँप्लाब सर्कल - पासपोर्ट केंद्र - कोरे टॉवर्स - उपवन तलाव - काशीनाथ घाणेकर नाट्यगृह - हॅपी व्हॅली -मानपाडा - ब्रह्मांड -कोलशेत रोड - बाळकुम फायर स्टेशन - कापूरबावडी - कोर्ट नाका - तलाव पाळी या मार्गे राम गणेश गडकरी रंगायतन येथे या रॅलीची सांगता करण्यात आली.
