ठाणे : महाविद्यालयात शिक्षण घेणाऱ्या १८ वर्षीय विद्यार्थ्यावर, दोघा विद्यार्थ्यांनी मैत्रणीच्या वादातून हल्ला करीत, त्याचा दात तोडून डोळ्याला गंभीर इजा केल्याची घटना समोर आली आहे. ही घटना डोंबीवली पूर्वेकडील मंजुनाथ महाविद्यालयाच्या समोरच घडली आहे. याप्रकरणी टिळकनगर पोलीस ठाण्यात हल्लेखोर तरुणांवर विविध कलमानुसार गुन्हा दाखल करण्यात आला आहे. फरदीन पटेल, आणि मोहित असे गुन्हा दाखल झालेल्या हल्लेखोर विद्यार्थ्यांची नावे आहेत. तर क्रिश दिनेश मिश्रा (वय १८, रा. गांधीनगर डोंबिवली पूर्व) असे गंभीर जखमी विद्यार्थांचे नाव आहे.
मैत्रीणीवरुन झाला वाद : पोलीस सूत्राने दिलेल्या माहितीनुसार, जखमी क्रिश हा डोंबिवली पूर्व भागातील गांधीनगर परिसरातील एका इमारतीमध्ये कुटूंबासह रहातो. तो डोंबीवली पूर्वेकडील मंजुनाथ महाविद्यालयात शिक्षण घेत आहे. तर हल्लेखोर दोन्ही विद्यार्थी देखील याच महाविद्यालयात शिक्षण घेत असून; गेल्या काही दिवसापासून जखमी क्रिशने महाविद्यालयातील एका विद्यार्थीनीशी मैत्री केली. यामुळे हल्लेखोर फरदीन आणि मोहित यांनी क्रिश सोबत वादही घातला होता. मात्र तरी देखील क्रिश त्या तरुणीशी मैत्रीत गप्पा करीत असल्याचे हल्लेखोरांना दिसून आले. त्यातच १७ जानेवारी रोजी सायंकाळच्या सुमारास हल्लेखोर विद्यार्थ्यांनी त्याला महाविद्यालयाच्या मुख्य प्रवेश दारावर गाठले.
क्रिश रुग्णालयात दाखल : त्यानंतर महाविद्यालयाच्या मुख्य प्रवेश दारा समोरच क्रिशला धमकी देत त्या तरुणीपासून दूर रहा, 'नही तो हम तुझे छोडेंगे नही, अशी धमकी देऊन शिवीगाळ केली. यामुळे पुन्हा वाद होऊन, दोघा हल्लेखोर विद्यार्थ्यांनी लाथाबुक्याने हल्ला करत क्रिशचा एक दात तोडला, शिवाय डोळ्यावर बुक्की मारून त्याच्या डोळ्याला गंभीर इजा केली. हल्लेखोर एवढ्यावर थांबले नाही तर, त्यांनी लगतच्या कंपाऊंडच्या लाकडी काठ्या हातात घेऊन त्याला रक्तभंबाळ होईपर्यत मारले. त्याच वेळी काही नागरिकांनी धाव घेऊन क्रिशची हल्लेखोरांच्या तावडीतून सुटका केली. त्यानंतर त्याला उपचारासाठी रुग्णालयात दाखल केले.
हल्लेखोर फरार : दरम्यान, हल्लेखोर दोघा विद्यार्थ्यांवर टिळकनगर पोलीस ठाण्यात क्रिशच्या तक्रारीवरून विविध कलमानुसार गुन्हा दाखल केला. मात्र दोघेही हल्लेखोर फरार असून; त्यांचा शोध सुरू आहे. त्यांचा ठावठिकाणा लागल्याने लवकरच दोघांनाही अटक करण्यात येणार असल्याची माहिती वरिष्ठ पोलीस निरीक्षक अजय आफळे यांनी दिली आहे.
