ठाणे - तृतीयपंथी म्हटले की, समाज आजही त्यांना वेगळ्या नजरेने पाहतो. मात्र, तृतीयपंथीयांकडे बघण्याची समाजाची मानसिकता बदलावी म्हणून अनेक तृतीयपंथी केंद्र व राज्य सरकारच्या विविध विभागात शासकीय हुद्यावर नोकरी करीत आहेत. तरी देखील त्यांच्याकडे समाजाचा बघण्याचा दृष्टीकोन बदलत नसल्याचे दिसून येत आहे. त्यातच त्यांना योग्य मार्गदर्शन मिळत नसल्याने तृतीयपंथीयांसाठी शिक्षण आणि शिक्षणाचे फायदे या उपक्रमाला कल्याण येथे सुरुवात झाली आहे. स्थानिक नगरसेविका रेखा चौधरी यांच्या माध्यमातून हा उपक्रम राबवला जात आहे. विशेष म्हणजे कल्याणमध्येही शेकडो तृतीयपंथी उच्चशिक्षित असल्याचे समोर आले आहे.
देशात 2014 ला तृतीयपंथीयांना मतदानाचा हक्क मिळाला, तेव्हा ठाणे जिल्ह्यातील कल्याण पूर्व विधानसभा मतदारसंघात सर्वात आधी मोठ्या प्रमाणात येथील तृतीयपंथीयांनी मतदार यादीत नाव नोंदणी केली होती. कल्याण पूर्वेकडील पत्रीपूल भागात शेकडो तृतीयपंथी राहतात. त्यांना शैक्षणिक प्रवाहात आणण्यासाठी वरदा महिला बहुउद्देशीय संस्था यांच्या मदतीने स्थानिक नगरसेविका रेखा चौधरी यांनी पुढाकार घेतला. संस्थेच्या अध्यक्षा वरदाताई जोशी यांनी आज पत्रीपूल येथील नगरसेविकेच्या छतावर 30 ते 40 तृतीयपंथीयांना 'center for distance education sndt women university' या माध्यमातून शिक्षणाबद्दलची पूर्ण माहिती या उपक्रमात देण्यात आली. महाराष्ट्र शासनाने त्यामध्ये धोरण व तरदूत करून ठेवली आहे, समाज आपल्याला कसा कमी लेखतो, त्यामुळे आपण पण यावर उपाय म्हणून शिक्षण घेऊ आणि सर्व समाजाला दाखवून देऊ की, आम्हाला समाज एक वेगळ्या नजरेने बघतो, तो बघू नये आता आम्हीही सन्मानाने जगू, असे मार्गदर्शन वरदा जोशी आणि रेखा चौधरी यांनी केले.
दरम्यान, हा उपक्रम आता शनिवारी व रविवारी नगरसेविका रेखा चौधरी यांच्या घराच्या छतावर राबविण्यात येणार आहे. तीन तास चालणाऱ्या या उपक्रमात सहभागी होणाऱ्या तृतीयपंथाना खाण्यापिण्याची व्यवस्थाही करण्यात आली आहे. तर पहिल्याच दिवशी शिक्षण आणि शिक्षणाचे फायदे या उपक्रमाला कल्याणमधून सुरुवात झाल्याने उपस्थितीत तृतीयपंथी यांनी आयोजकांचे आभार मानले.
