ठाणे - मनसेचे जिल्हाध्यक्ष अविनाश जाधव यांनी ठाण्याचे पालकमंत्री एकनाथ शिंदे यांच्यावर खालच्या पातळीवर टीका केली होती. या प्रकरणावरून सेनेचे आमदार, खासदारांनी मनसेला प्रतिआव्हान दिल्यानंतर रविवारी शिवसेना महिला आघाडीनेदेखील यात उडी घेतली. पालकमंत्र्यांबाबत केलेल्या वक्तव्याचा निषेध करत त्यांना उचलून दाखवण्याची हिंमत केल्यास तंगडे तोडू, असा इशारा महिला आघाडीनेच्या वतीने अविनाश जाधव यांना दिला आहे.
मनसेचे जिल्हाध्यक्ष अविनाश जाधव यांना अटक झाल्यानंतर त्यांनी ठाणे जिल्ह्याचे पालकमंत्री एकनाथ शिंदे यांच्याबद्ल अपशब्द वापरत केलेल्या टीकेमुळे शिवसेनेमध्ये संतापाची लाट उसळली आहे. स्वतः पालकमंत्री शिंदे यांनी जाधव यांना फार महत्त्व न देण्याची भूमिका घेतली असली तरी, शिवसैनिक आणि पदाधिकारी मात्र संतापले आहेत. शिवसेनेचे खासदार राजन विचारे आणि आमदार प्रताप सरनाईक यांनी जाधव यांच्या टीकेला चोख प्रत्युत्तर देत, एका रात्रीत केवळ व्हिडिओ बाईट देऊन कोणी नेता बनत नाही, असा टोला लगावला होता. तर, उचलून न्यायची भाषा करणाऱ्यांना त्यांची लायकी दाखवून देऊ, असा इशारा शिवसेना खासदार राजन विचारे यांनी दिला. लोकशाहीच्या मार्गाने आंदोलन करण्याचे स्वातंत्र्य असले तरी, याचा गैरफायदा कुणी घेऊ नये. वसंत डावखरे ,गणेश नाईक संपले आता तुम्हीही संपाल, आणि संपल्यावर घरातून उचलून घेऊन जाऊ. पालकमंत्र्यांबद्दल बोलणे चुकीचे असून आम्ही गप्प बसणाऱ्यापैकी नाही, असा इशारा आमदार प्रताप सरनाईक यांनी दिला होता.
दरम्यान, या प्रकरणावरून सोशल मीडियातही दोन्ही पक्षांच्या समर्थकांमध्ये वाकयुद्ध रंगले असून, रविवारी माजी महापौर मिनाक्षी शिंदे यांच्या नेतृत्वाखाली शिवसेना महिला आघाडीने अविनाश जाधव यांनी पालकमंत्र्याबद्दल केलेल्या वक्तव्याचा निषेध करत निर्दशने केली. पालकमंत्र्याना उचलण्याची भाषा करणाऱ्या अविनाश जाधव यांनी शिंदेना उचलून दाखवण्याची हिंमत करावी, ते ज्या पायावर चालत येतील त्यांना त्यांचे पाय तोडून त्यांच्या हातात कुबड्या दिल्याशिवाय राहणार नाही, असा इशारा दिला आहे.
आक्षेपार्ह टिप्पणी केल्याप्रकरणी शनिवारी मनसेचा समर्थक असलेल्या मंगेश माने या तरुणाला शिवसैनिकांनी चोप देऊन पोलिसांच्या हवाली केले. याप्रकरणी गुन्हा दाखल करून त्याला अटक केल्यानंतर ठाणे न्यायालयाने त्याची जामिनावर मुक्तता केली, अशी माहिती वरिष्ठ पोलीस निरिक्षक अनिल मांगले यांनी दिली.
