अखेर सावद जिल्हा कोविड रुग्णालयास ऑक्सीजन मिळाले; रुग्ण दाखल करण्यास सुरुवात

मागील वीस दिवसांपासून भिवंडी येथील सावद जिल्हा कोविड रुग्णालयाचे उदघाटन होऊनही ते सुरू झाले नव्हते. राज्यात कोरोना बाधितांची संख्या वाढत असताना हे रुग्णालय बंद असल्याने त्यावर टीका होत होती. अखेर, भिवंडी तालुक्यातील सावद येथे जिल्हा कोविड रुग्णालय सुरू झाले आहे.

ठाणे - मागील २० दिवसांपासून भिवंडी येथील सावद जिल्हा कोविड रुग्णालयाचे उदघाटन होऊनही ते सुरू झाले नव्हते. राज्यात कोरोना बाधितांची संख्या वाढत असताना हे रुग्णालय बंद असल्याने यावर अशी टीका होत होती. अखेर, भिवंडी तालुक्यातील सावद येथे जिल्हा कोविड रुग्णालय सुरू झाले आहे. यास जिल्हाधिकारी राजेश नार्वेकर यांच्या मार्गदर्शनाखाली उपविभागीय अधिकारी डॉ. मोहन नळदकर हे हॉस्पिटल सुरू झाले आहे. तब्बल 12 मेट्रिक टन ऑक्सीजन उपलब्ध झाल्याने सावद येथील 818 बेडचे कोविड जिल्हा रुग्णालयात रुग्णांच्या सेवेत सुरु झाले आहे.

रायगडच्या जेएसडब्ल्यु प्लँट मधून ऑक्सिजन....
भिवंडीचे उपविभागीय अधिकारी डॉ. मोहन नळदकर यांनी सांगितले की, जिल्हा कोविड रुग्णालय लवकर नागरिकांच्या सेवेत आणण्यासाठी जिल्हा प्रशासनाने प्रयत्न होते. परंतु, त्यास ऑक्सीजन न मिळाल्याने अडचण निर्माण होत होती. त्या अडचणींवर मात करून जिल्हाधिकारी यांनी रायगड येथील जेएसडब्ल्यु प्लँट येथून ऑक्सीजन उपलब्ध केले आहे.

सावद जिल्हा कोविड रुग्णालयातील सुविधा...

सावद येथील जिल्हा ग्रामीण कोविड रुग्णालय एकूण २ लाख ३० हजार चौरस फूट क्षेत्रफळाच्या जागेत बनविण्यात आले आहे. या अत्याधुनिक रुग्णालयात ३६० महिला ३७९ पुरुष एवढे ऑक्सीजन बेड आहेत. त्याचबरोबर ८८ अतिदक्षता बेड, २० व्हेंटिलेटर, २० बायपॅक व ४० हायफ्लो नॅशल कॅनॉल सुविधा असलेले एकूण ८१८ बेड आहेत. या रुग्णालयात, योगाभ्यास, करमणुकीसाठी कॅरम, दूरदर्शन या सुविधांसह रुग्णांना कुटुंबियांशी संवाद साधण्यासाठी दहा टॅब ठेवले आहेत. त्याचबरोबर व्हिडीओ कॉल करून कुटुंबियांशी संवाद साधता येतो. आपल्या उपचारासोबतच अडचणींही माहिती देता येणार आहे. या रुग्णालय परिसरात तब्बल ७५ सीसीटीव्ही लावण्यात आले आहेत. त्याचे नियंत्रण करण्यासाठी कंट्रोल रूम बनविण्यात आली आहे.

रुग्णांसोबत डॉक्टर नर्स यांचा थेट संपर्क नाही..

रुग्णांना ऑक्सीजन पुरवठा कमी पडू नये यासाठी तब्बल तीन ऑक्सिजन टॅंक या ठिकाणी लावण्यात आले आहेत. तर या रुग्णालयातील शौचालयसुध्दा ऑक्सीजन युक्त केले आहेत. येथील रुग्णांसोबत काम करणाऱ्या डॉक्टर नर्स यांचा थेट संपर्क येणार नाही यासाठी वेगळा "नर्स वे" बनविण्यात आला आहे. त्या ठिकाणी पीपीई कीट्स न घालता वेगळ्या वातावरणात त्यांना राहता येणार असल्याने त्यांच्यावर कामाचा ताण राहणार नाही याचीही खबरदारी घेण्यात आली आहे.

80 डॉक्टर, 150 परिचारिका उपलब्ध ..

या रुग्णालयात आरोग्य सेवा पुरवण्यासाठी वन रुपी क्लिनिकचे मॅजिक डील हेल्थ ठाणे यांना काम सोपवण्यात आले. कोरोना रुग्णांना सेवा देण्यासाठी या ठिकाणी 80 डॉक्टर, 150 परिचारिका उपलब्ध झाली आहेत.