ठाणे - बहीण भावाच्या नात्याला काळीमा फासणारी धक्कादायक घटना उघडकीस आली आहे. एका सावत्र नराधम भावाने अल्पवयीन बहिणीवर अत्याचार केला. या अत्याचारामुळे अल्पवयीन पीडितेने अपत्याला जन्म दिल्यानंतर ही धक्कादायक घटना समोर आली आहे.
हेही वाचा - आसनगावजवळ कार आणि गॅस टँकरमध्ये भीषण अपघात; २ जण जागीच ठार, २ गंभीर
ही घटना उल्हासनगरमध्ये घडली आहे. याप्रकरणी विठ्ठलवाडी पोलीस ठाण्यात बलात्कारासह पोक्सो कायद्यांतर्गत गुन्हा दाखल होताच पोलिसांनी नराधम भावाला ताब्यात घेऊन त्याला अटक केली आहे. अमोल पारधे असे नराधम आरोपीचे नाव आहे,
सूत्रांनी दिलेल्या माहितीनुसार, नराधमाची पत्नी माहेरी तर, आई कामावर गेली होती. त्यानंतर हा नराधम पीडितेवर बळजबरीने वारंवार अत्याचार करत होता. या अत्याचारामुळे अल्पवयीन पीडिता गरोदर राहिल्याने तिला गावी सोडले आणि त्या ठिकाणी तिने अपत्याला जन्म दिला. मात्र, या प्रकाराचे गावातच बिंग फुटल्याने हा धक्कादायक प्रकार समोर आला आहे.
दरम्यान, पीडित अल्पवयीन मुलीच्या नातेवाईकानी पीडितेला घेऊन विठ्ठलवाडी पोलीस ठाण्यात धाव घेऊन या प्रसंगाची माहिती पोलिसांना दिली. त्यानंतर पीडित मुलीच्या तक्रारीवरून नराधमावर विठ्ठलवाडी पोलिसांनी 376(2), 376 (2)(फ), 376(आय) 376(2)( जे ), 376 (2)(एन) सह पोक्सो कायद्याअंतर्गत गुन्हा दाखल करून नराधम भावाला बेड्या ठोकल्या आहेत. त्याला न्यायालयात हजर केले असता, तीन दिवसाची पोलीस कोठडी सुनावली असून अधिक तपास पोलीस उपनिरीक्षक सचिन साळवे करत आहेत.
