ठाणे - डोंबिवलीतील एका जिममध्ये ट्रेनर असलेल्या एकाने जिममध्ये व्यायाम करण्यास येणाऱ्या एका 26 वर्षीय तरुणीला प्रेमाच्या जाळ्यात ओढून तिला लग्नाचे आमिष दाखवून तिच्यावर बलात्कार केल्याची खळबळजनक घटना उघडकीस आली आहे. याप्रकरणी, या जीम ट्रेनरवर डोंबिवली पोलीस ठाण्यात गुन्हा दाखल करण्यात आला आहे. गुन्हा दाखल होताच तो फरार झाला आहे. सिद्धेश पाटील असे फरार झालेल्या आरोपीचे नाव आहे.
या संदर्भात अत्याचार झालेल्या तरुणीच्या वतीने अंनिस कायदा व्यवस्थापन विभागाच्या राज्य सहकार्यवाह तथा कल्याण तालुका विधी सेवा समिती पॅनलच्या पदाधिकारी अ‌ॅड. तृप्ती पाटील यांनी ही माहिती गुन्हा नोंदविलेल्या कागदपत्रांसह दिली आहे.
चॅटिंगमुळे जवळकी वाढली, अन...
डोंबिवली पूर्वेकडील राजाजी पथ रोडला राहणारी दक्षिण भारतीय 26 वर्षीय तरुणी एका खासगी कंपनीत मोठ्या हुद्द्यावर नोकरी करते. ही तरुणी डिसेंबर 2019पासून डोंबिवली स्टेशन परिसरातील एका जिममध्ये व्यायाम करण्यास जात असे. तेथे न्यूट्रिशनिस्ट म्हणून नोकरी करणारा आरोपीशी ओळख झाली. तर आरोपी हा 90 फिट रोड परिसरात राहतो. जिममध्येच ओळखी होऊन त्याचे रूपांतर मैत्रीत झाल्यानंतर दोघे एकमेकांशी चॅटींग, व्हिडीओ कॉल, फोन कॉलवर बोलणे सुरू झाले. कालांतराने एकमेकांच्या गाठी-भेटी सुरू झाल्या. त्यानंतर दगाबाज सिद्धेश याने पीडितेला प्रेमाच्या जाळ्यात ओढले आणि लग्नाचे आमिष दाखवून जवळपास वर्षभर वारंवार बलात्कार केला. यानंतर लग्नाच्या आणाभाका देणाऱ्या आरोपी सिद्धेशने लग्न करण्यास नकार दिला.
हेही वाचा - 'साहेब! आमच्या तोंडाला पीक आलंय, लाईन तोडली, आता आम्ही काय खावं?' टरबूज उत्पादक शेतकऱ्यानं हुंदके देत मांडली व्यथा
दगाबाजाचे अनेक तरुणींसोबत संबंध -
आरोपी सिद्धेश याचे या पूर्वीही अनेक युवतींशी संबंध होते. सदर मुलीशी संबंध तोडल्यानंतर लगेच दुसऱ्या मुलींबरोबर अफेअर्स सुरू केल्याचेही अ‌ॅड. पाटील म्हणाल्या. तर पीडित युवतीने डोंबिवली पोलिस ठाण्यामध्ये धाव घेऊन सविस्तर माहिती दिली. 2 फेब्रुवारीपासून फेऱ्या मारणाऱ्या युवतीने दिलेल्या माहितीच्या आधारे तृप्ती पाटील यांच्या समक्ष 11 फेब्रुवारीला जबाब नोंदविल्यानंतर पोलिसांनी भादंवि. कलम 376, 417 अन्वये सिद्धेश पाटील याच्याविरोधात गुन्हा दाखल केला. आपल्याविरोधात गुन्हा दाखल झाल्याचे कळताच दगाबाज आरोपी सिद्धेश हा घरच्यांसह परागंदा झाला आहे. सहाय्यक पोलिस निरीक्षक विकास सूर्यवंशी हे पुढील तपास करत आहे.
पीडितेला आरोपीच्या वडिलांकडून धमक्या ...
खळबळजनक बाब म्हणजे आरोपीच्या वडिलांनीही पीडित तरुणीला आणि तिच्या आईला धमकी दिली. आमच्या विरोधात कुठेही तक्रार दाखल केली तर मुलीला जीवे ठार मारू, आम्ही स्थानिक असल्यामुळे तुम्ही आमचे काहीही वाकडे करू शकणार नाही, असेही धमकावल्याचे अ‌ॅड. तृप्ती पाटील यांनी सांगितले. तर अमिषाला बळी पडलेली ही तरुणी दक्षिणात्य आहे. मात्र, अशाच प्रकारे अन्य युवतींची फसवणूक होऊ नये, असा उद्देश पीडित युवतीने हा गुन्हा दाखल करण्यामागे असल्याचे अ‌ॅड. तृप्ती पाटील यांनी सांगितले.
