ठाणे - नराधम बापाने पोटच्या अल्पवयीन मुलीवर अमानुष अत्याचार केल्याची घटना समोर आली आहे. धक्कादायक बाब म्हणजे या अत्याचारामुळे मुलगी 6 महिन्यांची गरोदर आहे. भिवंडीतील किडवाईनगर नागांव परिसरात ही घटना घडली. या घटनेने परिसरात तीव्र संताप व्यक्त केला जात आहे.
हेही वाचा - नवी मुंबईतील रेल्वे स्थानकाला गर्दुल्ल्यांचा विळखा, महिला प्रवाशांमध्ये दहशत
या घटनेप्रकरणी शांतीनगर पोलीस ठाण्यात नराधम बापाविरोधात गुन्हा दाखल केला असून नराधम बापाला पोलिसांनी अटक केली आहे. पीडित मुलगी ही घरात एकटीच असताना नराधम पित्याने वेळोवेळी मुलीवर बळजबरीने अत्याचार केला. दरम्यानच्या काळात मुलगी उत्तर प्रदेश येथे नातेवाईकांकडे लग्न कार्यक्रमासाठी गेली होती. त्यावेळी पीडित मुलीच्या मामीने तिची चौकशी केली असता, सदरचा घृणास्पद प्रकार समोर आला.
हेही वाचा - कल्याण रेल्वे स्थानकाबाहेर बॅगमध्ये महिलेचे डोके नसलेला मृतदेह आढळल्याने खळबळ
मुलीकडे अधिक चौकशी केली असता, आई व भाऊ, बहीण घराबाहेर गेल्यावर पिता तिला धमकावून तिच्याशी शारीरिक अत्याचार करत होता. या अमानुष घटनेने सर्वांनाच मोठा धक्का बसल्याने अखेर नातेवाईकांनी मुलीला धीर देऊन शांतीनगर पोलीस ठाण्यात नराधम बापाविरोधात गुन्हा दाखल केला.
या गुन्ह्याच्या आधारे सहायक पोलीस निरीक्षक दुर्गेश दुबे यांनी नराधम पित्यास तत्काळ अटक केली. त्याला रविवारी भिवंडी न्यायालयात हजर केले असता न्यायालयाने त्यास 11 डिसेंबरपर्यंत पोलीस कोठडी सुनावली.
