ठाणे - रविवारी 8 डिसेंबरच्या सकाळी कल्याण स्थानकाबाहेर आढळलेल्या बॅगमधील मुलीच्या मृतदेहाचा उलगडा झाला आहे. आंतरजातीय मुलासोबत असलेले प्रेमसंबंध मान्य नसल्यानेच बापानेच मुलीचे ३ तुकडे करून तिची निर्घृण हत्या केल्याचे उघड झाले आहे. याप्रकरणी आरोपी बापाला अटक करण्यात आली असून पोलिसांना धड शोधण्यात यश आले आहे. मात्र, शीर अद्यापही बेपत्ताच आहे. अरविंद तिवारी (वय ४५), असे या आरोपी बापाचे नाव आहे. विशेष म्हणजे पोलिसांनी अवघ्या 30 तासातच रिक्षाचालक आणि काही शाळकरी मुलांच्या सहकार्याने त्याला अटक केली. खालिद मोनीन आणि मोहंमद सलीम खान, अशी रिक्षाचालकांची नावे आहेत. पोलिसांनी या दोघांचा सत्कार केला.
रविवारी सकाळच्या सुमारास कल्याण स्थानकाबाहेर एका बॅगमध्ये एक 20 ते 25 वयोगटातील मुलीचा कमरेपासून खालचा भाग आढळून आला होता. शीर व धड नसलेला अर्धवट अवस्थेतील मृतदेह आढळून आल्याने एकच खळबळ उडाली होती. पोलिसांनी रेल्वे स्थानक परिसरातील सीसीटीव्ही फुटेज तपासले असता आरोपी टिटवाळ्यातून ट्रेनमध्ये चढल्याचे निष्पन्न झाले होते. दरम्यान, पोलिसांनी टिटवाळ्यातील रिक्षाचालकांकडे चौकशी केली असता तो टिटवाळ्यातील नांदप रोडवरील इंदिरा नगर भागात रिक्षामध्ये बसल्याचे स्पष्ट झाले होते. अखेर पोलिसांनी तपास करत आरोपीला अटक केली असून त्याने मुलीचे आंतरजातीय मुलाबरोबर असलेले प्रेमसंबंध मान्य नसल्याने तिची हत्या केल्याची त्याने कबुली दिली. तसेच तिच्या मृतदेहाचे ३ तुकडे करून शीर व धड प्लास्टिकच्या गोणीत भरून कल्याण-भिवंडी रोडवरील दुर्गाडी ब्रीजवरून खाडीत फेकून दिले असल्याची माहिती दिली. त्यानुसार पोलिसांनी अग्निशमन दलाच्या मदतीने २ दिवस शोध घेण्याचा प्रयत्न केला असता धड मिळाले. मात्र, शीर मिळू शकले नसल्याची माहिती महात्मा फुले चौक पोलिसांनी दिली.
अंगावर शहारे आणणारा खुनाचा थरारक घटनाक्रम -
आरोपी अरविंदला ४ मुली असून मृत मुलगी ही टिटवाळ्याच्या साईनाथनगर चाळीत सोबत राहत होती, तर पत्नी आणि ३ मुली मूळगावी राहत आहे. मृत मुलगीही चार महिन्यांपूर्वीच भांडुपच्या एका कॉल सेंटरला काम करीत होती. याच ठिकाणी सोबत काम करणाऱ्या एका तरुणासोबत तिचे प्रेमसंबंध निर्माण झाले. याची कुणकुण आरोपी बापाला मिळताच त्याने मुलीला विरोध केला. त्यामुळे दोघांमध्ये वादही झाले होते. या वादातून मुलीने त्या तरुणाशी लग्न करण्याचा निर्णय घेतल्याने बापाने तिचा हत्येचा कट रचला.
५ डिसेंबरलाही बाप-लेकीत वाद झाला होता -
गेल्या ५ डिसेंबरच्या रात्री बाप-लेकीत वाद झाल्याने बापाने तिची हत्या केली. ६ डिसेंबरला बाहेर जाऊन हत्यार आणि प्लास्टिकच्या गोणी आणल्या. त्यांनतर घरातच तिचे ३ तुकडे करून ३ प्लास्टिकच्या गोण्यामध्ये भरले. मुलगी गावी गेली असल्याने मी तुमच्या घरात झोपणार असल्याचे त्याने शेजाऱ्यांना सांगितले. दरम्यान, ७ डिसेंबरला सकाळच्या सुमाराला धड आणि शीर असलेल्या प्लास्टिकच्या गोण्यासोबत घेऊन टिटवाळ्यावरून लोकलने कल्याण आला. त्यांनतर कल्याण रेल्वे स्थानकाबाहेर एका रिक्षाने जाऊन दुर्गाडी पुलावरून दोन्ही गोण्या खाडीत फेकल्या होत्या.
गेल्या ८ डिसेंबरला पुन्हा एका बॅगमध्ये कमरेपासून खालचा भाग घेऊन टिटवाळ्याहून कल्याणला आला. पुन्हा ही बॅगही खाडीत फेकण्यासाठी कल्याण स्थानकाबाहेर रिक्षा पकडण्यासाठी आला. मात्र, त्यावेळी रिक्षाचालकाला त्या बॅगमधून दुर्गंधी आल्याने त्याने हटकले असता तो बॅग सोडून पळून गेला. त्यानंतर रिक्षाचालकाने पोलिसांना याबद्दल माहिती दिली. माहिती मिळताच पोलीस घटनास्थळी दाखल होऊन बॅगमधील कमरेपासून खालचा भागाचा मृतदेह उत्तरीय तपासणीसाठी रुग्णालयात पाठवला आणि रिक्षाचालकांच्या माहितीनुसार रेल्वे स्थानक परिसरातील सीसीटीव्ही फुटेज तपासले असता आरोपी टिटवाळ्यातून ट्रेनमध्ये चढल्याचे निष्पन्न झाले होते.
