ठाणे - 'बालाजी अक्वेरीयम'(शॉप नं ६, वसंत विहार) या मासे आणि पक्षी विक्री करणाऱ्या दुकानात 'इंडियन स्टार' या दुर्मिळ प्रजातीच्या कासवाची विक्री होत असल्याची माहिती वनविभागाला मिळाली होती. या माहितीच्या आधारे ठाण्यातील वनक्षेत्रपाल यांच्या पथकाने छापेमारी करत चार दुर्मिळ जिवंत कासव हस्तगत केले आहेत. याप्रकरणी आरोपी शिवा मुतुरामलिंगम नाडार(वय 32 रा. मानपाडा) याच्या विरुद्ध गुन्हा दाखल करून त्याला अटक करण्यात आली आहे.
हेही वाचा - लोणावळ्यात आढळला १२ फूट लांब अजगर; पुण्यातील कात्रज प्राणी संग्रहालयात केली रवानगी
वनविभागाच्या क्षेत्रपालांनी छापेमारी केली असता दुकान मालक शिवा नाडार याने काउंटरच्या खाली प्लास्टिक बादलीत चार दुर्मिळ जिवंत कासव विक्रीसाठी ठेवल्याचे त्यांना आढळले. वनविभागाने चार कासवे जप्त करून नाडार याला अटक केली आहे. त्याच्या विरोधात वन्यजीव संरक्षण अधिनियम १९७२ नुसार वन्य प्राणी खरेदी करणे, विक्री करणे, जवळ बाळगणे, पाळणे याअंतर्गत गुन्हा दाखल करण्यात आला आहे. उपवनसंरक्षण जितेंद्र रामगावकर, सहाय्यक वनरक्षक आणि गिरीजा देसाई यांच्या मार्गदर्शनाखाली वनक्षेत्रपाल नरेंद्र मुठे, वनपाल पवार, परदेशी, आणि ठाणे राउंड स्टाफ आदींनी ही कारवाई केली.
