ठाणे - 'लव प्यार और धोका' या हिंदी चित्रपटाच्या कथनकाला शोभेल अशी खळबळजनक घटना समोर आली आहे. 16 वर्षाची असताना त्या अल्पवयीन तरुणीला प्रेमाच्याच जाळ्यात ओढून लग्न करण्याच्या बहाण्याने तिच्या भांगेत कुंकू भरून लग्नाचे नाटक केले. त्यानंतर लग्नाचे आमिष दाखवून तिच्यावर तब्बल तीन वर्ष प्रियकराने वारंवार बलात्कार केल्याची धक्कादायक घटना उलहासनगर शहरात घडली.
याप्रकरणी हिल लाईन पोलिसांनी पीडित तरुणीच्या तक्रारीवरुन दगाबाज प्रियकराला अटक केली. इरफान खान (वय 23) असे अटक केलेल्या प्रियकराचे नाव आहे.
मिळालेल्या माहितीनुसार, उल्हासनगरमध्ये पीडित तरुणी राहते, तर तिच्याच शेजारी दगाबाज इरफान राहतो. आरोपी इरफानने तीन वर्षांपूर्वी पीडित तरुणीची ओळख निर्माण करून मैत्री केली. त्यानंतर त्याने 2016 पासून पीडित तरुणीशी प्रेमाचे नाटक करून तिला लग्नाचे आमिष दाखवत प्रियकराने तब्बल तीन वर्ष वेगवेगळ्या ठिकाणी नेऊन तिच्यावर बलात्कार केला.
दरम्यान, पीडित तरुणीची फसवणूक झाल्याचे लक्षात येताच पोलीस ठाण्यात धाव घेऊन दगाबाज इरफानविरोधात तक्रार दाखल केली. या तक्रारीनुसार पोक्सो कायद्यांतर्गत गुन्हा दाखल करत घटनेचे गांभीर्य ओळखून दगाबाज इरफानला काही तासातच अटक केली. त्याला न्यायालयात हजर केले असता न्यायालयाने 26 जुलैपर्यंत पोलीस कोठडी सुनावली आहे. या गुन्ह्याचा अधिक तपास सहाय्यक पोलीस निरीक्षक देसले करत आहेत.
