ठाणे - नवजात बालिकेची विक्री करण्यासाठी ग्राहक शोधत असल्याची गुप्त माहिती गुन्हे शाखा युनिट - १ च्या पथकाला मिळाली होती. त्यानंतर पथकाने ठाण्याच्या केसल येथील स्वागत हॉटेलमध्ये बालिकेच्या विक्रीची दीड लाखाची रक्कम घेणाऱ्या मध्यस्थी नवजात बालिकेचे आई - वडील, दोन मध्यस्थी, आईचा भाचा आणि बहीण अशा सहा जणांना बेड्या ठोकल्या आहे. अटक केलेल्या आरोपींवर राबोडी पोलीस ठाण्यात गुन्हा दाखल करण्यात आला असून अधिक तपास करीत आहेत.
हेही वाचा - BMC Pipeline burst : मुंबईला पाणीपुरवठा करणाऱ्या धरणाची पाईपलाईन फुटली; लाखो लिटर पाण्याच्या नासाडी
शुक्रवारी गुन्हे शाखा युनिट - १ च्या पथकाला याप्रकरणी माहिती मिळाली होती. माहितीच्या अनुषंगाने पोलीस पथकाने बनावट ग्राहकाच्या माध्यमातून मध्यस्थी असलेल्या दलाल महिलेला संपर्क केला. बाळाचा सौदा हा दीड लाखात ठरला. त्यानंतर बाळाची विक्री करणाऱ्या आई - वडील आणि मध्यस्थी यांना ठाण्याच्या केसल मिल येथील स्वागत हॉटेलमध्ये बोलावण्यात आले. त्यानुसार संध्याकाळी सहा वाजण्याच्या सुमारास स्वागत हॉटेल्स येथे बाळाची विक्री करण्यासाठी संबंधित सर्वच कागदपत्रांसह सहा जण उपस्थित राहिले. यात नवजात बालिकेची आई मुमताज वकील अन्सारी ( वय २९ ), रिक्षा चालक वडील वकील शकील अन्सारी ( वय ३७, रा. शांतीनगर, भिवंडी, जि. ठाणे ) महिला दलाल झिनत रशिद खान ( वय २२ रा. मुंब्रा, ठाणे ) पुरुष दलाल वसीम इसाक शेख ( वय ३६ रा. रेहमत चाळ, मुंब्रा, ठाणे ) नवजात बाळाची मावशी कायनात रिझवान खान, ( वय ३० रा. गुलमोहर चाळ मुंबा, ठाणे ) बाळाच्या आईचा भाचा मुझम्मिल रिझवान खान ( वय १८ वर्षे, रा. गुलमोहर चाळ, मुंबा, ठाणे) यांचा समावेश होता.
नवजात बालिकेचा सौदा वार्तालापानुसार दीड लाखात झाला होता. तेव्हा उपस्थित सर्व आरोपींसमोर बनावट ग्राहकाने दीड लाखाची रक्कम ही बालकाच्या आईला देताच सापळा रचून बसलेल्या पोलिसांनी शिताफीने सहाही जणांना ताब्यात घेतले. त्यांच्या चौकशीत बालिकेचे आई - वडील हे भिवंडी येथे राहणारे असून गरीब आहेत. विक्री करण्यासाठी आणलेल्या नवजात बालिकेचा जन्म ४ डिसेंबर २०२१ रोजी महाराष्ट्र शासन उपजिल्हा रुग्णालय भिवंडी येथे झालेला असून, तिला घटनास्थळी ताब्यात घेतल्यावर पुढील सुश्रुषेसह संगोपनासाठी जननी आशिष चॅरीटेबल ट्रस्ट येथे ठेवलेले असल्याची माहिती समोर आली आहे.
पोलीस पथकाने आरोपींकडून स्वीकारलेली दीड लाखाची रक्कम, नवजात बालिकेच्या जन्मासंबंधीची कागदपत्रे आणि त्यांचे मोबाईल फोन हॅन्डसेट जप्त केलेले असून त्यांच्याविरुद्ध राबोडी पोलीस स्टेशन येथे महिला पोलीस शिपाई माधुरी जाधव यांनी सरकारतर्फे दिलेल्या फिर्यादीवरून गु. रजि. क्र. २९३ / २०२१ भा.दं. सं. कलम ३७० सह द जुवेनाईल जस्टीस केअर अॅन्ड प्रोटेक्शन ऑफ चिल्ड्रेन्स अॅक्ट २०१५ चे कलम ८०, ८१ प्रमाणे गुन्हा दाखल केला आहे.
हेही वाचा - Thane Crime :...आणि बोहल्यावर चढण्याआधीच 'तो' अडकला पोलिसांच्या बेडीत, जाणून घ्या सविस्तर प्रकरण
