ठाणे - दारू आणायला उशीर झाला म्हणून पतीने पत्नीस बेदम मारहाण केली. या मारहाणीत पत्नीचा जागीच मृत्यू झाला. संतोषी पुरबिया असे मृत विवाहितेचे नाव आहे. तर प्रवीण पुरबिया असे आरोपीचे नाव आहे. विशेष म्हणजे हत्येचा हा प्रकार त्याच्या सात वर्षीय मुलीने दिलेल्या माहितीनंतर उघडकीस आला आहे. या प्रकरणी आरोपी प्रवीणला मुंब्रा पोलिसांनी ताब्यात घेतले आहे.
प्रवीण हा मुंब्रा येथील अमृतनगर परिसरात त्याची पत्नी संतोषी आणि दोन मुलांसह राहतो. गुरूवारी रात्री त्याने पत्नीला दारू आणण्यास पाठवले होते. मात्र, तिला दारू आणण्यास उशीर झाला. या कारणावरून प्रवीणने संतोषीला काठीने बेदम मारहाण केली. ही मारहाण इतकी गंभीर होती की यात तिचा जागीच मृत्यू झाला. ही घटना घडली तेव्हा त्याची दोन्ही मुले घरातच होती.
या हत्याप्रकरणात तो अडकला जाऊ नये म्हणून त्याने पत्नी संतोषीने विष पिऊन आत्महत्या केली असल्याचा बणाव केला. मात्र, पोलिसांना संशय आल्याने त्यांनी त्याच्या सात वर्षीय मुलीकडे याबाबत चौकशी केल्यानंतर हा प्रकार उघडकीस आला. त्याआधारे मुंब्रा पोलिसांनी प्रवीण विरोधात गुन्हा दाखल केला असून या गुह्यात पोलिसांनी त्याला अटक केली आहे.
