ठाणे - कल्याणमध्ये शेकडो ग्राहकांना घराचे स्वप्न दाखवत घराचा ताबा न देणाऱ्या बिल्डर विरोधात फसवणुकीचा गुन्हा दाखल करण्यात आला आहे. कोट्यावधींच्या फसवणुकीचा गुन्हा दाखल होताच बिल्डरांची चौकडी फरार झाली आहे. हसमुख पटेल, जिग्नेश मनियार, रितू वासनिक, राज गोपालन अशी फरार बिल्डर्सची नावे आहेत.
कल्याण पश्चिमेकडील बिर्ला महाविद्यालयासमोर पटेल ग्रुप ऑफ कंपनीचा मालक हसमुख पटेल याने 230 पेक्षा जास्त नविन ग्राहक तर म्हाडा वसाहतींमधील 448 ग्राहकांची फसवणूक केल्याचे समोर आले आहे. म्हाडाच्या वसाहतीचा पुनर्विकास कामाबरोबरच नियोजित नविन इमारतही बांधून पूर्ण होईल, असे आश्वासन ग्राहकांना देण्यात आले होते. तसेच एफएसआयच्या आधारे काही सदनिकांची विक्री करण्यात आली.
हेही वाचा - ठाण्यात जळीतकांड.. अज्ञात माथेफिरूने सोसायटीच्या पार्कींगमधील वाहने जाळली
ग्राहकांना दिलेल्या आश्वासनानुसार 2017पर्यंत ग्राहकांना सदनिकांचा ताबा मिळणे अपेक्षित होते. मात्र, 2019 उजाडले तरी अद्याप बांधकामही पुर्ण झालेले नाही. त्यामुळे ग्राहकांना भरलेली रक्कम परत मागे हवी आहे. तर इतके दिवस मोठी रक्कम अडकून राहिल्याने काही ग्राहकांना व्याजासहित पैसे हवे आहेत. याबाबत 11 जणांनी महात्मा फुले चौक पोलीस ठाण्यात पटेल ग्रुप ऑफ कंपनी विरोधात मागील आठवड्यात तक्रार दाखल केली.
हेही वाचा - इकबाल मिर्चीच्या संपत्तीचा लिलाव तुर्तास थांबला; बोली लावणाऱ्यांना रक्कम मान्य नाही
दरम्यान, म्हाडाची मालकी असलेल्या या भूखंडावर अनेक वर्षांपासून 448 कुटुंबे राहत होती. म्हाडाने हा भूखंड पटेल ग्रुप ऑफ कंपनीला पुनर्विकासासाठी दिला. त्यानंतर मोठा गाजावाजाकरून या भूखंडावर 'पटेल कोलेसिस' या नावाने टोलेजंग इमारती उभारण्यात सुरुवात केली होती. त्यामुळे शेकडो ग्राहकांनी पटेल कोलेसिसमध्ये सदनिका बुक केल्या. यामध्ये व्यापारी, नोकरदार वर्ग तर तत्कालीन अप्पर जिल्हाधिकाऱ्यांचाही समावेश आहे. अप्पर जिल्हाधिकाऱ्यांची 24 लाखांना फसवणूक झाली आहे.
फसवणूक झालेल्या ग्राहकांनी रेरा कायद्यांतर्गत ही तक्रार दाखल केली आहे. या तक्रारीवर अद्याप कोणताही निर्णय झालेला नाही. फरार बिल्डरांच्या चौकडीला तातडीने अटक करण्यात यावी, अशी अपेक्षा ग्राहकांना आहे.
