धक्कादायक..! कोरोना 'स्वॅब टेस्टिंग'साठी भर पावसात रांग; सोशल डिस्टन्सिंगचे तीनतेरा

कोरोनाचा प्रादुर्भाव रोखण्यासाठी कल्याण डोंबिवली महापालिकेकडून विविध उपाययोजना केल्या जात आहेत. पण, रुग्णालयातील कोरोना चाचणी केंद्राबाहेर पालिकेककडून काहीच उपाययोजना न केल्याने पावसाच्या पाण्यापासून स्वतःचा बचाव करण्यासाठी नागरिकांनी सामाजिक अंतराचा फज्जा उडवत एकमेकांना खेटून उभे होते.

कल्याण डोंबिवली (ठाणे) - एकीकडे कोरोनाचा प्रादुर्भाव रोखण्यासाठी कल्याण डोंबिवली महापालिका प्रशासनाकडून उपाययोजना राबविण्यासाठी घोषणांचा पाऊस पडताना दिसत आहे. तर दुसरीकडे महापालिकेच्याच शास्त्रीनगर रुग्णालयात कोरोना स्वॅब (घशातील स्त्राव) चाचणीसाठी रुग्णांनी भर पावसात रांग लावत गर्दी करुन सामाजिक अंतराच्या नियमांला हरताळ फासल्याचा व्हिडिओ समोर आला आहे.

कल्याण डोंबिवली महापालिका क्षेत्रात दिवसांगणिक कोरोनाबाधित रुग्णांची संख्या झपाट्याने वाढत असून त्यावर आळा घालण्यास पालिका प्रशासन सपशेल आपटल्याचे दिसून येत आहे. त्यातच कोरोना संसर्ग टाळण्यासाठी सुरक्षित अंतर ठेवण्याचे आवाहन पालिका प्रशासनाकडून करण्यात येते. मात्र, पालिकेच्या शास्त्रीनगर रुग्णालयात सामाजिक अंतराचा फज्जा उडाल्याचे दिसून आले आहे. चाचणीसाठी आलेले रुग्ण नियोजना अभावी एकमेकांना खेटून उभे असल्याचा व्हिडिओ व्हायरल झाल्याने पालिकेच्या नियोजनहीन कारभाराविरोधात संताप नागरिकांमधून व्यक्त करण्यात येत आहे. दोन दिवसांपूर्वीच असेच चित्र महापालिका मुख्यलयात वार्ड बॉयच्या भरतीवेळी दिसून आले होते. कोरोनाचा प्रसार रोखण्यासाठी प्रत्येकाने मास्क लावणे आणि 6 फुटांपेक्षा जास्त अंतर ठेवण्याचे आवाहन पालिका प्रशासनाकडून केले जात असले, तरी प्रत्यक्षात मात्र याच्या अमलबजावणीचा प्रशासनाला विसर पडल्याचे व्हायरल व्हिडीओ वरून दिसून आले.

विशेष म्हणजे रुग्णालयाच्या आवारात असलेल्या लॅबबाहेर रांगा लावण्यासाठी पालिका प्रशासनाकडून शेडची व्यवस्था करण्यात आलेली नाही. यामुळे पावसाचा पाण्यापासून बचाव करण्यासाठी या नागरिकांनी सामाजिक अंतराचे नियम झुगारून आडोसा शोधत गर्दी केल्याचे दिसून येत आहे. त्यामुळे पालिका प्रशासनाने अस्तित्वात असलेल्या कोविड रुग्णालयात रुग्नांना आधी आरोग्य सुविधा द्याव्यात. त्यानंतर 300 आणि 500 खाटांचे कोविड रुग्णालय उभारण्याच्या घोषणा कराव्यात, अश्या संतप्त प्रतिक्रीया नागरिकांकडून व्यक्त केल्या जात आहेत.

याबाबत रुग्णालय प्रशासनाच्या संबधित अधिकाऱ्याशी संपर्क साधला असता आमच्या वरिष्ठ अधिकाऱ्यांशी बोला, असे सांगण्यात आले. तर आरोग्य विभागाचे वरिष्ठ अधिकाऱ्याशी संपर्क साधला असता त्यांनी मिटिंगमध्ये असल्याचे सांगत बोलणे टाळणे.

हेही वाचा - चिंताजनक..! कल्याण डोंबिवलीत एका दिवसात वाढले 560 कोरोनाबाधित रुग्ण